O le Faafitauli o le Ma’i Suka
“He hears and answers me” (Children’s Songbook, 14).
Sa ma’i le tuafafine o Joe o Sarai. E le o le ituaiga o ma’i lea e tale ai ma tiga le manava. Fai mai Mama ma Papa atonu e maua o ia i le ma’i suka.
E le i iloa e Joe poo le a le ma’i suka, ae faalogo atu pei e fefe ai. Ona faamalamalama lea e Mama ma Papa faapea o le taimi lea e iai le faafitauli i tino o tagata i le faaaogaina o le suka mai meaai latou te aai ai. Sa manaomia ona nofo Sarai i le falemai mo ni nai aso e suesue ai pe maua o ia i le ma’i suka.
O nisi taimi e faaita ai e Sarai ia Joe. Sa taumafai o ia e taaalo ma uo a Joe. Sa tasi foi le taimi sa leiloa ai foi ia ia le ki o le taaloga vitio a Joe. Ae sa matuā alofa lava Joe ia te ia. Ou te lē manao e ma’i o ia, o ona mafaufauga ia a o omai loimata i ona mata.
Sa fesoasoani tuafāfine o Joe e faasauni Sarai mo le falemai. Sa aumai i fafo e Maria le ato faafafa a Sarai. Sa fesoasoani Hana e teu ona ofumoe. Sa faaopoopo atu e Lili se palanikeke fulufulua. Sa manao foi Joe e fesoasoani foi, ae na te le i iloa pe faapefea na fesoasoani.
I se taimi vave lava ua teu uma mea a Sarai.
“Sei o tatou tatalo ae tatou te le i o,” o le tala lea a Papa. “Joe, e te faia le tatalo?”
Sa luelue atu le ulu o Joe. “Tamā Faalelagi pele e,” na amata ai o ia. “Faamolemole faamanuia Sarai ia aua nei iai ia te ia le ma’i suka. Faamolemole faamanuia o ina ia manuia.” Ina ua tatalo Joe, sa lagona e ia sina lagona lelei.
Ina ua omai faatasi le aiga mo se feofoofoaiga, sa iai se manatu o Joe.
“Faatali!” sa ia fai atu ai. Sa alu atu o ia i lona potu ma uu mai le laau ta musika lea na ia maua i lona aso fanau. Sa ia faamautinoa ua iai i totonu pese sili ona fiafia i ai Sarai.
“Ia,” na ia fai mai ai, ma tuu atu ai ia Sarai. “E mafai ona e avea le mea lea i le falemai.” Sa ataata Sarai ma uumau a o savali o ia i le taavale.
O le aso na sosoo ai, sa ave e Mama ia Joe ma ona tuafāfine i le falemai e asiasi ia Sarai. Sa lagona le fefe o Joe a o latou savavali i totonu o le falemai. “Faamolemole faamanuia o ia ia le maua i le ma’i suka,” sa tatalo ai o ia pei ua faaselau ai.
Ina ua o latou oo atu i le potu o Sarai, sa nofo mai o ia i lona moega ua iai ni faagaau o loo tata’i i ona lima. Sa ataata laitiiti o ia ina ua vaai atu i tagata uma.
“Ua maua mai suesuega,” o le tala lea a Papa. “Fai mai fomai o Sarai e maua i le ma’i suka ituaiga 1. O lona uiga ua tatau ona suia nisi o meaai tatou te aai ai o se aiga ma fesoasoani ia te ia i ana vai. Ae o le a manuia o ia!
Sa faafuasei ona pei e mole le manava o Joe. Sa alu o ia i fafo o le potu ma nofo i lalo i talaane o le faitotoa. Sa tanuma’i ona foliga i ona lima.
“O le a le mea ua tupu, Joe?” O le tala lea a Mama ao nofo atu i ona tafatafa.
“Sa ou tatalo ina ia le maua Sarai i le ma’i suka,” o le tala lea a Joe. “Aisea na lē tali mai ai Tamā Faalelagi i la’u tatalo?
Na fusi o ia e Mama. “E tali mai i taimi uma Tamā Faalelagi i a tatou tatalo. Ae e lē tali mai i taimi uma i le auala tatou te mananao ai. O nisi taimi, nai lo le aveese o mea faigata, e tali mai o Ia i le aumaia ia i tatou o le filemu ma fesoasoani ia i tatou ia malolosi. Ou te iloa o le a fesoasoani Tamā Faalelagi ia Sarai.”
Sa luelue lemu le ulu o Joe. Sa le i lagonaina e ia le filemu poo le malosi i le taimi lenei. Ae sa manatua e ia lagona lelei sa maua e ia i le taimi o le tatalo faaleaiga.
Sa la’ua toe savavali faatasi i totonu o le potu. Sa taaalo tuafafine o Joe i se taaloga pelē, e pei lava sa latou faia i le fale. Ma sa latou foliga fiafia uma, e oo lava ia Sarai.
Ona iloa atu ai lea e Joe o se mea. Sa tautau mea faalogo a Sarai i lona ua ma sa i ona vae le laau ta musika a Joe.
“E faalogologo lava o ia i pese sa e pikiina mo ia,” o le tala lea a Mama. “E matuā fesoasoani lava ia te ia e lagona le toafilemu.”
Sa lagona e Joe le mafanafana i totonu ia te ia. Sa iloa e ia o lea lava ua fesoasoani mai Tama Faalelagi ia te ia.