O Se Ato Tagamea o le Alofa
Ata na tusia e John Kachik
O la’u faaiuga e avea o se tagata o le Au Paia o Aso e Gata Ai sa faigata tele ona talia e lo’u aiga. A o ou faasilasila atu o le a ou auauna atu o se faifeautalai faamisiona e aunoa ma se totogi, e le o tagata uma sa malamalama pe faapefea pe aisea foi o le a ou manao ai e faia lena mea. Sa mananao o’u matua e fiafia faatasi ma a’u i lo’u finafinau, ae sa faigata tele ia i laua le vaai mai ua ou “tuuesea” le lotu sa la tausia mai ai a’u.
Ina ua ou mauaina lo’u valaauga i le Misiona a Honduras Tegucigalpa, sa aofia mai ai i le teutusi se lisi o mea sa manaomia ona ou aumaia. Sa maitau mai e lo’u tina o se tasi o ia aitema i luga o la’u lisi o se ato tagamea. Ia o se mea lena sa mafai ona ia malamalama ai! Sa vave lava ona ia faatau mai se ie mafiafia lanumoana ma su’ilima ai se ato tagamea faigofie, aogā sa faia ma le alofa. O se meaalofa o le a faaauau pea lava pea ona foai mai.
O lena ato tagamea sa ma o faatasi i le fale tutotonu e aoao ai faifeautalai ma oo atu ai i Honduras. Sa malaga ma a’u mai le tasi tamai nuu i le isi, ma faasolosolo lava ina tuai ma matafi mai le lanumoana malosi i le lanumoana vaivai, e pei o se ofuvae e avea ma mea e sili ona fiafia i ai ma ofi-lelei. I le faaiuga o la’u misiona, sa ou foai atu le tele o o’u lavalava i se aiga faapitoa sa matua ou alofa i ai, ae sa ou taofia lava le ato tagamea. Sa faia e lo’u tina mo a’u e ui lava na te le i malamalama i le taua o se misiona.
Toeitiiti lava 30 tausaga mulimuli ane, ua maua le valaau a le ma atalii matua i le Misiona a California Carlsbad, faatasi ai ma se lisi o aitema na te manaomia. Sa ma faitauina faatasi, ma ina ua oo atu i le “ato tagamea,” sa ma toe aumaia le ato sa faia e lo’u tima mo a’u. E ui lava e oo atu i le taimi lena ua sili atu ona matafi, ae na alu lava i Kalefonia.
I ni nai tausaga mulimuli ane, sa valaauina lo’u afafine e auauna i le Misiona a Ohio Cleveland, ma sa malaga foi o ia ma le ato iina. Ina ua foi mai o ia, sa ia aumaia i le fale ua faateleina le tuai ae sa aunoa lava ma ni masaesae tele.
O lenei ato ua faamanatu maia ia te a’u o nisi mea, e pei o lesona e aoaoina mai le auauna ai i se misiona ma mai i le faaali atu o le alofa mo isi—e pei ona faia e lo’u tina mo a’u—e mafai ona faamanuiaina pea lava pea i tatou. Ua avea ai ma vaega o se aganuu faaleaiga o auaunaga faafaifeautalai lea ou te faamoemoe o le a le mou atu lava.