Pe Mafai Ona Ou Lagonaina le Agaga i Loʻu Fale e Le Mama?

Saunia e Amber Weston

Ou te le’i manatu e mafai ona nofo le Agaga i lo’u fale e le’i faatulagaina. Ae sa ou sese.

E alala le tusitala i Iuta, ISA.

Sa ou aveina se fata meaai, saunia e loʻu tina faaletulafono, i totonu o se fale e le’i faatulagaina ma pefua. O le tagata nofo toatasi sa nofo i le mea e masani lava ona nofo ai, i luga o se nofoa tele ina ia mafai ona ia iloa mai le faamalama. O ona vae na fulafula na faʻaloloa i luma o ia ma lana tootoo, lea na ia faʻaaogaina ma le malosi tele, faalagolago i lona lima. Sa ataata o ia ina ua ia vaai mai ia te aʻu, faafetai mai ia te au mo le meaai, ma fesili mai ma le fiafia po o ai au. A o ou nofo i autafa o ia ma faalogologo i ana tala, sa faatumuina au i le mafanafana ma le filemu.

I le tolu tausaga mulimuli ane, sa matou i luga o le fola faatasi ma laʻu fanau laiti e toalua, sa faaluelue i luga o oʻu vae ma usuina se pese tutuu. E na o ni nai futu le mamao, o laʻu umukuka sa gasu ma na taatitia solo meataalo i luga o le fola. Na faafuasei lava ona ou lagonaina se faamautinoaga mai le Agaga o loo ou i ai i le mea e tatau ona ou i ai. O le mafanafana ma le filemu na faatumulia ai loʻu agaga, ma faatumuina ona pito matafi ma tuuina atu le malosi i mea sa leai [se malosi].

I le isi lua tausaga i luma, sa ou taoto i luga o le moega. Sa vaaia se faaputuga tagamea i luga o le fola, ma o se faaputuga o pepa na paepae i le kesi i loʻu itu agavale ao ou fafagaina loʻu atalii faatoa fanau mai mo le faa-fa i lena po. Sa ou oloina oʻu tamatamailima i ona laumata uumi, tago i lona ulu vaivai, ma sa matua fiafia lava ina ua fusi faataamilo e tamatamailima le fele o loʻu ofutino. Sa matuai faatumulia au i le mafanafana ma le filemu lea na ou le mafaufau ai na ou ala i nisi taimi i le tolu i le taeao.

I nei mataupu taitasi, na faatasi mai le Agaga Paia ia te au, ma taʻu mai ia te au o loo ou i ai i le nofoaga sao ma le faia o le mea sao, ma i nei tulaga taitasi, sa ou i ai i se fale na gasu.

Ou te manatua pea le faateia na ou lagonaina i le taimi muamua na ou faia ai lenei sootaga—sa amata ona ou fesiligia oʻu aafiaga. Aua sa ou mafaufau pea a’o ou tuputupu ae e le nofo le Agaga Paia i nofoaga le mama—o lea na ou faapea ai e aofia ai fale eleelea i lena vaega. Ma o nei mafaufauga na toeitiiti lava o mai faatasi ma se mau e faatatau i ai. Ua tatou aoaoina i le 1 Nifae 10:21 “e leai se mea e le mama e mafai ona nofo faatasi ma le Atua.” Ma ua taʻu mai e le Alii ia i tatou i le Mataupu Faavae ma Feagaiga 88:124 e “tuu le paie; [ma] tuu le le mama.”

O le maasiasi i nei mea uma ua ou misia le loloto o uiga o nei mau—o le taua o le tausiaina o o tatou lava malumalu, o o tatou mafaufau ma tino, mama—ma nai lo le oso saʻo i le uiga faaletino. Sa ou aoao mai i nei lesona uma o loʻu taua o se ava ma se tina talavou na afifi uma i le atoatoa ma le mama o loʻu fale—ma o le aafiaga o lena talitonuga na matautia.

Sa masani lava ona faatumulia a’u i le fefe ina ua le atoatoa le tulaga o loʻu fale. E masani ona ou le faalogo mo musumusuga mai le Agaga aua ou te tilotilo solo i loʻu fale ma mafaufau, “Leai, e leai se auala e mafai ai e le Agaga ona nofo iinei.”

E le mafai ona ou manatuaina le taimi tonu na ou iloaina ai e mafai ona ou lagonaina le Agaga i totonu o se aiga e mamao ese mai tulaga faatonuina o le mama faalemalumalu. Ae ou te manatua ina ua ou iloaina o le Alii, faatasi ai ma Lona mana e le iʻu mo le agaalofa ma le lagona alofa, na vaai i taumafaiga le itiiti-ma-le-atoatoa na ou ofoina atu, taliaina, ma auina mai pea ia te au le mafutaga faaleagaga na ou matua manaomia. Na te le manaomia aʻu ina ia ou atoatoa i le taimi nei—Ua na ona ia manaomia a’u ou te faia le mea sili ou te mafaia.

E le tupu i se po e tasi, ae e faifai malie lava ona ou tuuese le mea na taʻua e Elder Jeffrey R. Holland o le Korama a Aposetolo e Toasefululua e faapea o le “tulaga leaga atoatoa” (tagai “Ia Atoatoa Ona Lelei o La Outou Amio—I Le Iuga,” Ensign po o le Liahona, Nov. 2017, 42 ). Ua amata ona ou faatagaina au lava ia ou talitonu e mafai ona ou maua le Agaga Paia faatasi ma au e tusa lava pe le o ia te au le malosi e nofo ai i le po atoa ma se pepe o loo oso ni ona nifo fou ma faauma le tagamea. Nai lo lena, ou te mautinoa ou te tuuina atu le mea sili ou te mafaia, ma ou te talia le alofa na auina mai e le Tama Faalelagi. Ou te le fiu i le avea ma se tagata e sili atu ona lelei le fale, e na o lou fai atu ioe i le alofa tunoa ma musumusuga o loo taumafai le Alii e tuuina mai ia te au mo se taimi umi. Aua a ou tausia loʻu mama faaleagaga ma faia le mea na te poloai mai ou te faia, e afio mai le Agaga Paia, i le fale e gasu pe leai.