Autalavou Matutua
Ou te Lē Atoatoa … I le Taimi Nei
E alala le tusitala i Netherlands.
O le tauivi ai ma le faafiaatoatoa sa fesoasoani ia te a’u e malamalama atili e uiga i le Togiola a le Faaola.
I le 3 Nifae 12:48, ua aoao mai Iesu, “O lea ou te manao ia outou atoatoa e pei lava o a’u, po o lo outou Tamā o le o i le lagi e atoatoa.” O lenei mau sa taia malosi ai a’u i taimi uma aua sa ou tauivi ma le faafiaatoatoa i lo’u olaga atoa. Ma e ui o se mea maoae le manao e sili le lelei o mea uma ou te faia, o le faafiaatoatoa e mafai ona matuā oona tele. Mo se taimi umi lava, soo se taimi ou te faia ai se mea sese, pe oo lava i taimi ou te manumalo ai, ou te lagona lava e le lava lava lo’u lelei.
Mana’o Tele Mo A’u Lava
Sa tele tele mea sa ou manao ai i taimi uma mo a’u lava, aemaise lava i le aoga maualuga. Ma sa masani lava ona ou toilalo ai aua sa ou taumafai e faataunuu le tele o mea i le taimi lava e tasi e faamaonia ai o a’u ua lava lo’u lelei. I se tasi tausaga sa ou fuafua ai e aoao le siva uosi, ave lesona musika, ma auai i se vaega musika. Sa ou manatu e manaomia ona ou faia le tele o mea ou te mafaia e atinae ai ma faaatoatoaina a’u taleni. Ae sa iai lava le taimi, na ou tuua ai mea uma lava aua ua matuā tele tele lava mo a’u ou te taulimaina. Sa ou matuā faitioina a’u lava. Sa ou lagonaina e pei o se tagata toilalo, ma o le toilalo o se tasi o mea e sili ona ou mata’u i ai.
Ou te iloa e le na o a’u le tagata e tauivi ma le faafiaatoatoa. E toatele i tatou o loo taumafai e faia le mea e sili i aso taitasi ma lagona le faavaivai pe a tatou le ausia mea uma lava i le atoatoa. Ae ui lava i a tatou taumafaiga uma, e leai ma se isi o i tatou o le a matuā atoatoa lelei lava iinei i le lalolagi. O lea la e mafai faapefea ona tatou taumafai mo le atoatoa pe afai o a tatou taumafaiga uma e foliga mai e le aogā? Ua faasoa mai e Elder Jeffrey R. Holland o le Korama a Aposetolo e Toasefululua se tali: “Ia Atoatoa Ona Lelei o La Outou Amio—I Le Iuga.”1
O le taumafai mo le atoatoa o se mea lelei, ae e mafai ona avea ma mea leaga pe afai e tatou te tuua e lofituina i tatou. Faatasi ai ma mea uma lava i lenei olaga o loo manaomia i tatou faaletino, faalemafaufau, faalelagona, e oo lava i le faaleagaga, e taua le aua le tuua i tatou lava e lofituina pe gasegase i le le taliaina lea o se mea i lalo ifo o le atoatoa. Ma e sili atu foi le taua o le mafaufau i le mea o loo finagalo lo tatou Tamā Faalelagi tatou te faia. E lē finagalo le Atua tatou te lofituina i le tele tele o mea o loo tatou taumafai e fai.
Sa aoao mai le Alii i le Mataupu Faavae ma Feagaiga 10:4, “Aua le momo’e televave atu pe galue sili atu nai lo le malosi ua ia te oe ma ala ua tuu atu e mafai ai ona e faaliliu; ae ia e filiga e oo i le iuga.” E mafai ona tatou faaaogaina lena poloaiga i o tatou olaga. E finagalo le Tamā Faalelagi ia tatou fiafia, ma o le a tatou fiafia pe afai tatou te faia le mea ua Ia fetalai mai ia tatou faia i le auala sili tatou te mafaia. E tusa lava pe e le i matua atoatoa lava a tatou taumafaiga.
O le Atoatoa o Lona Uiga Ua “Faaatoatoaina”
O le upu atoatoa e tupuga mai i le upu Latina perficere, lea e vaevae i le per- (“atoatoa”) ma le facere (“fai”). O lea la o le atoatoa o lona uiga moni lava o le “faaaotoatoaina.” Ma e le mafai ona tatou faaatoatoaina e aunoa ma Iesu Keriso (tagai i le Moronae 10:30). Ou te manatu o le tele o i tatou e masani ona manatu ua lē lava lo tatou lelei. Ma, ia, e lē lava! O lona uiga, a aunoa ma Keriso e le lava [lo tatou lelei]. E pei ona saunoa Amona: “Ua ou iloa o a’u o se meanoa; a faatatau i lo’u malosi ua ou vaivai; o lea ou te le mitamita ai ia te au lava ia, ae ou te mitamita i lo’u Atua, ona o lona malosi e mafai ai ona ou faia o mea uma” (Alema 26:12).
Faatasi ma Iesu Keriso, e mafai i taimi uma ona tatou taumafai e avea ma tagata lelei atu, e oo lava i se tulaga o le a tatou atoatoa ma faaatoatoaina ai i se aso auā o le a Ia faaatoatoaina o tatou lē atoatoa. “Ioe, o mai ia Keriso, ma faaatoatoaina ia te ia, ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa e mafai ai ona outou atoatoa ia Keriso” (Moronae 10:32).
I le faasologa o tausaga ua ou iloa ai ou te le i matuā malamalama ma manino atoatoa i le uiga o le Togiola a le Faaola mo a’u ma ia a’u. Sa ou faapea sa manaomia ona ou faatinoina mea uma iinei i le lalolagi e aunoa ma ni sesē ma sa tuua toatasi a’u ou te saili lava e a’u le auala e faatino ai lenei galuega. Ae o lenei ua ou iloa e le tuua toatasi lava i tatou. Afai tatou te taumafai e taula’i ia Iesu Keriso ma taofimau o Ia i o tatou loto ma o tatou mafaufau, o le a suia o tatou vaivaiga i malosiaga—e pei lava ona suia a’u tauiviga ma le faafiaatoatoa. Ou te iloa ou te le atoatoa. Ae e mafai ona fesoasoani Keriso ia i tatou e faafoia soo se vaivaiga, agasala, luitau, ma le mata’u. E malamalama o Ia ia i tatou ma silafia pe faapefea ona fesoasoani mai ia i tatou. Ou te faamoemoe o le a tatou faafiafiaina i Lona alofa e faavavau. Ma iloa e ui lava tatou te le o atoatoa i le taimi lenei, afai tatou te taumafai e mulimuli ia te Ia, o le a tatou atoatoa lava i se aso.