Te reo o te feiā mo’a i te mau mahana hope’a nei

’Ua tanu rātou i te hō’ē huero i roto i tō’u ’ā’au

Marta Algarve

Santa Catarina (Beresiria)

Fa’ahōho’ara’a nā John Kachik

Nō hea mai au ? E aha tā’u e rave nei i’ō nei ? I hea vau e haere ai i muri iho i teie orara’a ?

I te 29ra’a o tō’u matahiti, ’ua ho’i noa mai teie mau uira’a. ’Ua fa’aru’e mai tō’u nā metua. ’Ua heva vau nō te fa’aru’era’a mai tā’u ’aiū tamaiti fānau tahi. E toru atu ā tamari’i tā’u i aupuru ’e ’ua ’ī tō’u orara’a i te mau tāmatara’a.

’Ua ha’amata te Fatu i te pāhono i tā’u mau uira’a i te arata’ira’a ’oia e piti taure’are’a misiōnare i tō’u nei fare. I te fāri’ira’a vau ia rāua, ’ua ui mai rāua e ’ohipa ānei tā’u e mana’o ra ’ua ’ere au i roto i teie orara’a. ’Ua fa’ati’a atu vau i te parau nō tō’u nā metua ’e tā’u tamaiti. ’Ua parau atu vau ē, e ’ere i te mea tano ’ia fānau i te tamari’i ’e ’ia ha’amau i te hō’ē ’utuāfare mai te mea e hope te reira i te pohe. ’Ua ui atu vau e ti’a ānei iā’u ’ia ’ite fa’ahou i tō’u nā metua ’e tā’u tamaiti.

’Ua nā ’ō mai rāua ē : « Marta, e ti’a ia ’oe ’ia fāna’o i tō ’oe ’utuāfare ē a muri noa atu. »

’Ī a’enei tō’u ’ā’au i te ’oa’oa. Hina’aro a’era vau ’ia ’ite rahi atu ā. I te ho’ira’a mai rāua, ’ua ha’api’i mai rāua iā’u nō ni’a i te ’evanelia a Iesu Mesia. ’Ua hōro’a mai rāua i te hō’ē Buka a Moromona ma te tu’u i te ’ōpuara’a e tai’o i te reira ’e e ani i te Atua e parau ānei teie nāna. ’Ua fāriʼi au i te tītaura’a. I te purera’a vau, ’ua tae pāpū mai te pāhonora’a a te Atua mai te mahana te huru. ’Ua ’ite tō’u ’ā’au ē, e parau mau te reira.

Te vāhi ’ino rā, ’ua noa’a tā’u ’ohipa ’āpī ’e ’aita vau i fārerei fa’ahou i te mau misiōnare. I te mau ’āva’e i muri mai, ’ua ta’a vau i tā’u tāne ’e ’ua tāmata a’era vau i te ha’amata i te orara’a ’āpī ’e tā’u mau tamari’i.

Ē fa’aipoipo fa’ahou a’enei au. I te hō’ē mahana, ’ua nā ’ō mai tā’u tāne ē, tē ’ere ra te Atua i roto i tōna orara’a. ’Ua fa’aoti a’era māua e haere i te ’ēkālesia tāna i haere i te mātāmua ra. I tō mātou tomora’a i roto i terā fare, ’ua ’ite ihora vau i te hō’ē Buka a Moromona i ni’a i te ’aira’amā’a o te vāhi tomora’a. Hō’ē ā ’ēkālesia tei fa’a’itehia mai iā’u ! ’Ua au roa vau i te Vārua tā’u i putapū i reira. I te fa’aru’era’a mātou i te fare purera’a, ’ua ui au i tā’u tāne e aha tē rave nō te fa’aipoipo iā’u.

’Ua parau mai ’oia, « Tītauhia ’ia ha’api’i te mau misiōnare ia ’oe. »

’Ua pāhono atu vau, « ’Ua ha’api’ihia vau ’a pae matahiti i teienei ! »

’Ua ha’api’ihia mātou tā’u mau tamari’i i te mau ha’api’ira’a. Tō mātou mahana bāpetizora’a, ’o te mahana ’oa’oa roa a’e ïa o tō mātou orara’a.

E rave rahi matahiti i muri mai, ’ua mana’o vau e parau i te mau tuahine tei ha’api’i mātāmua iā’u ē, ’ua tomo vau i roto i te ’Ēkālesia. I ni’a ia Facebook, ’ua ’itehia mai iā’u te hō’ē pupu nō te mau misiōnare tahito o te misiōni nō Santa Maria (Beresiria). Tei roto ato’a hō’ē o nā tuahine i ha’api’i iā’u. ’Ua hāpono atu vau iāna i te hō’ē tītaura’a hoa ma te parau atu iāna ’o vai au, ’e ’ua riro mai au ’ei melo nō te ’Ēkālesia, ’ua tā’atihia tō’u ’utuāfare i roto i te hiero ’e tē tāvini ra tā’u tamaiti i te hō’ē misiōni rave tāmau. ’Ua parau atu vau iāna ē, ’ua tupu te reira maoti ’oia ’e tōna hoa misiōnare tei tanu i te huero nō te ’evanelia i fa’aho’ihia mai i roto i tō’u ’ā’au.