Mau hi’ora’a itoito
Tāvini i te Fatu nā roto i te reo pāniora
Tē ora nei te ta’ata pāpa’i i Utah, i Marite.
E feruri na tē hōro’a mai ra tō ’oe hoa i te buka nūmera hō’ē roa tāna i tai’o. E huri ’oe i te ’api mātāmua… ’e tē ’ite ra ’oe ē, e’ita e nehenehe e tai’o. E reo ’ē teie ! E aha tā ’oe e rave ?
I te mau matahiti mātāmua o te ’Ēkālesia, ’ua nene’ihia te Buka a Moromona nā roto noa i te reo peretāne. ’Ua pi’i te peresideni Brigham Young e piti misiōnare nō te poro i te ’evanelia i Mehiko ’e nō te ’īriti i te Buka a Moromona nā roto i te reo pāniora. ’Are’a rā tītauhia te tahi ātu ā tauturu. ’Aita rātou i ’ite ri’i a’e ē, i’ō mai i te moana, tē fa’aineine ra te Atua i te hō’ē ta’ata e nehenehe e tauturu i tā rātou mau i hina’aro.
Nō roto mai ’o Meliton Gonzalez Trejo i te hō’ē ’ōpū fēti’i fāna’o moni i Pāniora. ’Ua fa’aitoito roa ’oia i te ha’api’ira’a ’e ’ua riro mai ’ei ti’a fa’atere i roto i te nu’u Pāniora. E mea au roa nāna te parau nō te fa’aro’o, ’aita rā tōna mana’o i tuea maita’i i te mau mea tāna i ’ite mai. I te hō’ē mahana, ’ua fa’aro’o ’oia i te tahi ti’a i te fa’ati’ara’a i te parau nō te hō’ē pupu ta’ata te pi’i ia rātou ’ei « feiā mo’a ». Nō roto mai rātou i Te ’Ēkālesia a Iesu Mesia i te Feiā Mo’a i te mau Mahana Hope’a nei, ’e nā te hō’ē peropheta a te Atua i arata’i ia rātou i roto i te mou’a Rocky Mountains i te Fenua Marite. ’Ua tupu i roto ia Meliton i te hina’aro pūai e fārerei ia rātou. ’Ua fa’aō ’oia iāna i roto i te hō’ē tere nu’u fa’ehau e haere i te fenua Firipino, ma te ti’aturi ē, e nā reira atu ’oia i te haere i te Fenua Marite. Nō te rahi rā o tāna ’ohipa, ha’amata a’era te fārereira’a i te feiā mo’a ’ei ’ohipa faufa’a iti a’e.
Ma’i-pāpū-hia a’enei ’o Meliton. Ha’amana’o a’era ’oia i te tumu ’oia i haere mai ai i Firipino ’e ’ua pure atura i te Atua e aha tāna e rave. I terā pō, ’ua moemoeā Meliton i te hō’ē moemoeā ta’a ’ē. ’Ua ta’a iāna ē, tītauhia ’ia reva atu ’oia i roto i te mou’a Rocky Mountains ra.
I te orara’a tōna ma’i, ’ua rave fa’ahou mai Meliton i tōna tere haere i te Fenua Marite. ’Ua tāpae ’oia i California i te 4 nō Tiurai 1874 ’e haere a’era i Roto Miti.
I te tāpaera’a Meliton i Roto Miti, ’ua fa’aruru ’oia i te hō’ē fifi : e nehenehe tāna e tai’o i te reo peretāne, ’aita rā ’oia i paraparau a’enei i te reira. ’Aita i noa’a iāna ’ia paraparau i te ta’ata ! ’Ua fa’aoti atura ’oia ē, mai te mea e’ita tāna e nehenehe e paraparau i te ta’ata, e ’ume mai ’oia i tō rātou mata maoti te tahi atu rāve’a. ’Ō’omo ihora Meliton i tōna ’ahu nu’u fa’ehau pāniora ’e hāhaere a’era ’oia nā te ’oire, i te hō’ē pae, i te tahi pae. Mai tāna i mana’o na, e rave rahi ta’ata tei ha’apa’o iāna ! Ē i te hope’a, ’itehia mai nei ’oia e te hō’ē melo nō te ’Ēkālesia, tōna i’oa ’o te taea’e Blanchard, e ’orometua ha’api’ira’a tuatoru ’oia tei ’ite i te reo pāniora. ’Ua tauturu te taea’e Blanchard ia Meliton nō tōna nohora’a i Roto Miti ’e ’ua ha’api’i iāna i te ’evanelia. ’Aita i maoro roa, ’ua bāpetizohia Meliton.
’Ua fa’afārerei ato’a te taea’e Blanchard ia Meliton ’e te peresideni Brigham Young. ’Ua parau atu Meliton i te peresideni Young ē, ’ua hina’aro roa ’oia e ’īriti i te Buka a Moromona nā roto i te reo pāniora.
’Ua ani te peresideni Young ia Meliton ia tauturu i te mau misiōnare e haere ra i Mehiko e ’īriti i te tahi mau tuha’a nō te Buka a Moromona ’ei reo pāniora. E rave rahi hepetoma tō Meliton ’īritira’a i te mau parau reo peretāne ’ei reo pāniora. I te mau pō ato’a, e hi’opo’a ’oia i tāna ’īritira’a ’e te mau misiōnare. ’Ua ’ite rāua i te parau pāniora, ’ua mana’o rā rāua ē, nō teie ’īritira’a faufa’a rahi, tītauhia te tahi ta’ata pāniora tumu. ’Ua ’ite rātou ē, e pāhonora’a ’o Meliton i tā rāua mau pure. ’Ua pūharahia teie ’īritira’a i te matahiti 1875. ’Ua pi’ihia te reira Trozos Selectos del Libro de Mormon (Te tahi mau tuha’a ta’a ’ē nō te Buka a Moromona).
Ineine a’era te mau misiōnare nō te haere i Mehiko. ’Ua rave mai rātou e 1 500 nene’ira’a nō teie mau ’īrava i ’īritihia i ni’a i te tua o te pua’ahorofenua ’e ’ua ha’amata a’era i tō rātou tere. Nō te taime mātāmua, ’ua ti’a i te ta’ata paraparau pāniora e tai’o i te Buka a Moromona nā roto i tō rātou iho reo. Noa atu ā tei te ātea ’ē ’o Meliton, tau tauasini maile te ātea i Pāniora, ’ua arata’i te Metua i te Ao ra iāna i te vāhi mau tītauhia iāna ’ia vai. Maoti te itoito o Meliton ’e tōna fa’aro’o, ’ua tauturu ’oia i te fa’atae i te parau a te Atua i te mau ta’ata e’ita e nehenehe e tai’o.