Te tāupo’o ’uo’uo nō Florence
Tē ora nei te ta’ata pāpa’i i Michigan, Marite.
’Ua haere ’o Florence Onyejekwe, ’ahuru ma toru matahiti, i tōna vāhi mātau i te mātete nō Onitsha (Nigeria) tei ’ī i te ta’ata. ’Ua apiapi te mau āroa i te feiā ho’o tao’a e pi’i haere ra i te ta’ata ho’o. E tu’u te mau vahine i te mau tauiha’a i ni’a i tō rātou upo’o ’a hāhaere noa ai. Nō fa’aoti noa nei te ha’api’ira’a nō te tau fa’afa’aeara’a, ’e ’ua ’ite ’o Florence ē, tē ’oa’oa ra tōna mau hoa i teie fa’afa’aeara’a ha’api’ira’a. Nō Florence rā, tei ni’a ïa tāna tau fa’afa’aeara’a i te ho’ora’a i te rau’ere ndolé i te mātete. ’O teie ana’e tāna rāve’a nō te ’āpī i te moni nō te ’aufau i tāna ha’api’ira’a.
’Aita rā Florence e amuamu. Inaha ho’i, e rave rahi hora tā tōna metua vahine i haere i te mātete, i te mau mahana ato’a nō te ho’o i te ufi nō te ho’o mai i te mā’a nō te ’utuāfare. E mea ’ohipa roa ho’i māmā. Nā metua to’opiti tei ’ohipa roa. Nō te fāito ha’api’ira’a ha’eha’a rā, ’o te reira ana’e tā rāua e nehenehe e rave. Fātata Florence i te oti i tāna ha’api’ira’a tuatahi. Penei a’e ’ia fa’anu’u atu ā ’oia i te ha’api’ira’a e noa’a mai iāna te tahi ’ohipa moni maita’i nō te tauturu i tōna ’utuāfare.
I tōna ho’ira’a i te fare, ’ua haere ’o Florence i tōna nā metua ma teie uira’a : « ’Ia mana’o ’ōrua, e ti’a ānei iā’u ’ia haere i te ha’api’ira’a tuarua ? ’E haere roa ato’a i te tuatoru ? »
’Ua hi’o māmā i ni’a ia Nnam (te pāpā) ma te tā’ue’ue tōna upo’o. « ’Ua rahi roa te moni nō te ha’api’ira’a tuatoru i tā tātou faufa’a », ’ua nā ’ō atu Nnam. Pi’o a’era te upo’o o Florence, tōna mata i ni’a i tōna tia’a. ’Aita pa’i ’oia i hina’aro ia māmā ’e Nnam ’ia ’ite i tōna ’oto.
Ma’a mahana i muri mai, ’ua tāpe’a Florence i te fare ma’i nō te rave mai i te tahi rā’au. Fātata ’ua ta’ata-ato’a-hia te fare ma’i mai te mātete, ’aita rā i māniania roa. ’Ua hi’o ’o Florence i te mau utuutu ma’i ’e tō rātou taupo’o ’āfaro’o maita’i ’e te ’uo’uo. ’Ua feruri ’oia iāna i roto i te ’ahu mai te reira, i te tauturura’a i te feiā ma’i ’e te aupurura’a i te mau ’aiū i roto i te hō’ē fare ma’i rahi. Penei a’e e nehenehe tāna e riro mai ’ei utuutu ma’i.
’Ua ’ite Florence ē, ’ua tano iho ā tōna nā metua—e ’ōpuara’a pa’ari mau te noa’ara’a te fāito ha’api’ira’a maita’i. ’Ua ’ite rā Florence i te aura’a nō te ’ohipa. Fa’aoti a’era ’oia i te tāmata.
Noa atu ā te mau hōpoi’a e rave rahi i ni’a iāna i roto i te hō’ē mahana, ’ua ’imi Florence i te taime nō te rave i tāna ha’api’ira’a. ’Ua manuia ’oia i te hi’opo’ara’a nō te haere i te ha’api’ira’a tuarua ’e ’ua tārahu ’o Nnam i te moni ’ia haere ’oia. I muri mai ’ua ’ite mai Florence ē, e ’aufau te fa’aterera’a hau i te ha’api’ira’a utuutu ma’i. E au ē e tupu tāna i moemoeā na !
I te taime rā nō te ha’amata i te ha’api’ira’a utuutu ma’i, ’ua fē’a’a ri’i Florence. ’E mai te mea e mea pa’ari roa ? ’E mai te mea e vai mo’emo’e ’oia ? Pi’o a’era Florence i tōna upo’o nō te pure : « E te Atua ē, e hōro’a mai na i te pūai nō te haere i te fare ha’api’ira’a utuutu ma’i ’e nō te fa’aitoito i tā’u ’ohipa. »
I te fare ha’api’ira’a utuutu ma’i, ’ua ha’api’i mai Florence nāhea i te hōro’a i te mau rā’au ’e nāhea i te tāmā i te mau tirotiro i ni’a i te mauiha’a fare ma’i. I te tahi taime, e maita’i mai tāna mau feiā ma’i, i te tahi rā taime, ’aita ïa. E pure pinepine Florence ’ia noa’a mai tōna itoito. Hope a’ere e toru matahiti roa roa, ’ua noa’a mai tā Florence parau tū’ite ma te ha’afēti’ara’a nō te pīahi maita’i roa a’e o tāna piha ha’api’ira’a. ’Ua tupu tāna moemoeā ! E ’ō’omo atura ’oia i te tāupo’o ’uo’uo nō te utuutu ma’i ; ’e ’ua ti’a atura iāna ’ia ’āpī i te moni nō te tauturu i tōna ’utuāfare.
E rave rahi matahiti i muri iho, ’ua tere Florence i te hō’ē ’āma’a na’ina’i nō te misiōni nō Ghana Accra. ’O tāna tāne, ’o Christopher Chukwurah, te peresideni misiōni i reira. ’Ua fārerei Florence i te tahi mau tamari’i o terā ’āma’a e’ita tā rātou e nehenehe e haere noa i te ha’api’ira’a. ’Aita rātou i pāpū e aha tē rave nō tō rātou ananahi. ’Ua fa’aha’amana’o rātou ’ia Florence i tōna iho vai-tamari’i-ra’a. « E aha tā’u e nehenehe e parau atu nō te tauturu ia rātou ? » ’Ua pure mū ’o Florence.
Tae mai nei te tahi muhumuhu pāpū : ’A parau ia rātou nō ni’a i tō ’oe ’ā’amu.
’Ua feruri ’o Florence i tōna orara’a. ’Ua rave ’oia i te ’ohipa nō te mau fare ma’i i Nigeria ’e i te Fenua Marite. ’Ua fa’aipoipo ’oia i te hō’ē tāne maita’i, ’e ’ua ’ite ’āmui mai rāua i Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua fānau ’oia i te tamari’i. I teienei, tē tauturu nei ’oia i te mau misiōnare ’ia maita’i tō rātou ea ’e ’ia rave pāpū i te ’ohipa. ’Ua tauturu te Metua i te Ao ra iāna ’ia riro mai ’ei utuutu ma’i. ’Ua tauturu ’oia iāna ’ia fa’aoti i te ’ohipa rahi a’e i tāna i feruri. E nehenehe ho’i tāna e nā reira ato’a nō teie mau tamari’i.
Hi’o atura Florence i te mau tamari’i ’e mata ’ata’ata a’era. « Tē ta’a ra ia ’outou te mau tāupo’o ’uo’uo a te mau utuutu ma’i ? ’Ua ’ite au i te hō’ē mai te reira ’e fa’aoti a’era vau e riro mai ’ei utuutu ma’i… »