Mau hoa tei fa’a’ite i tō rātou māramarama iā’u nei
Tē ora nei te ta’ata pāpa’i i Baja California, Mehiko.
E mana’o mata’u tō’u ’e te ’ōtahi. Fa’anu’u a’era vau i te tahi atu fenua ’e ’ua haere i te purera’a ’a tahi fa’ahou ra e mea maoro i teienei.
Tē ora ra vau ’e tō’u māmā i te hō’ē ’oire iti nō Mehiko, ’ua mātau pauroa te mau ta’ata. ’Ua ’ite au e aha te mea tano ’e te mea hape, ’ua rapu roa rā tō’u mana’o ’e ’o vau ana’e te tamāhine haere purera’a i roto i teie ’oire.
’Ua hina’aro vau e rave mai te tahi mau pu’era’a, ’e nō reira ’ua rave au i te hō’ē peu mātau i terā taime : ’imi i te hoa tamāroa. ’O te hō’ē noa ïa o te mau hape tā’u i ha’amata i te rave. ’Ua ha’amata vau i te pe’e i te nene’ira’a a te mau hoa ma te ti’aturi ē, ’ua pa’ari au nō te feruri nō’u iho nei, te aura’a ra, e’ita e haere fa’ahou i te purera’a nō te ora i roto i te pōiri.
Hō’ē matahiti au i te orara’a i roto i te pōiri, ’e ’ua pōiri noa ato’a atu te mau mahana. Nā roto i tā’u mau fa’aotira’a, ’ua tupu te tatama’ira’a i roto i te ’utuāfare, ’e tae mai nei te mana’o ē, e’ita e nehenehe e fa’aea fa’ahou ia rātou ra. ’Are’a rā, i te pohera’a noa te hō’ē hoa rahi feiā mo’a te putara’a mai i roto iā’u ē, e ’ohipa te toe ra. Terā rā, ’ua fa’ahapa vau i te Atua ’e te ’evanelia. ’Ua fa’aea vau i te ti’aturi ē, nō roto mai i te ha’apa’o te mau ha’amaita’ira’a. ’Ua ’ite a’era vau ē, mai te mea e’ita vau e ha’amata i te ora i te ’evanelia, e tāmau noa vau i te tāu’a ’ore i tā’u tā’amura’a i te ’Ēkālesia ’e e ora noa vau mai tō te ao nei.
Tē pārahi ra vau i ni’a i tō’u ro’i i roto i te pōiri o tō’u piha, i te ta’ira’a ’e te ’otora’a i ni’a iā’u, puta mai nei te mana’o ē, e taiā tō’u—te taiā nō te vai-’ōtahi-ra’a ’e ’aita e ta’ata e paraparau atu, te taiā nō te ’orera’a e noa’a ’ia fa’a’āfaro i te mau hape tā’u i rave, te taiā ē, ’aita hō’ē nō te fa’a’ore mai i tā’u mau hapa, te Atua iho ā rā.
Ē fa’anu’u a’era vau i Minnesota (Marite), i pīha’i iho i tō’u mau metua tūpuna e ’ere i te melo nō te ’Ēkālesia. ’Ua ’āpe’e te tāne ’āpī o tō’u metua vahine iā’u, ’e tō’u sābati mātāmua i reira, ’ua haere māua i te purera’a, nō te purera’a ’ōro’a noa rā. I te pae hope’a o te rurura’a, ’ua fa’aoti a’ena vau e fa’aru’e i te ’Ēkālesia, te mea rā i fa’ahitimahuta iā’u, ’oia ho’i i te taime ’a haere ai māua i te pere’o’o, ’ua ’ite māua i te ’episekopo i te horora’a mai ia māua. ’Ua ui mai ’oia i te tahi mau uira’a ma te ani ia māua ’ia ho’i mai i te sābati nō muri iho—’Ua nā reira māua.
I te sābati nō muri iho, ’a fa’aoti ai te purera’a ’ōro’a, hou vau ’a ti’a ai i ni’a, tē ti’a fa’a’ati ra te feiā ’āpī tamāhine o te pāroita iā’u—te feiā ’āpī tamāhine tei tauturu i te taui i tō’u orara’a.
Fa’ahōho’ara’a nā Alberto Ruggieri
E ao ta’a ’ē ihora tā’u i tomo : e ao tē vai ra te hō’ē ’episekōpo ’e te hō’ē peresideni feiā ’āpī tamāhine tē māna’ona’o ra iā’u, ’e te mea hau roa atu, e feiā ’āpī tamāhine tei tāmata i te ora i te ’evanelia i te mahana tāta’itahi, tei tūtava i te ora i te mau fa’aturera’a teitei ’e tei ti’a nō te parau ti’a. Nō te pūai o tō rātou māramarama, ’ua ti’a roa ia rātou ’ia tūrama i te ’ē’a i mua iā’u.
I reira tō’u ’itera’a e aha tā’u e rave : « ’Ia ’ana’ana ïa i mua i te aro o te ta’ata nei, ’ia hi’o rātou i [tā’u] parau maita’i, ’e ’ia ha’amaita’i i [tō’u] Metua i te ao ra » (hi’o Mataio 5:16). ’E nō reira ’ua ha’amata vau i te haere i te purera’a ’e i te mau fa’a’oa’oara’a feiā ’āpī i te mau hepetoma ato’a, i te tai’o i te Buka a Moromona ’e i te pure i te mau mahana ato’a, i te ’ō’omo i te ’ahu tano, i te parau i te parau tano a’e, i te haere i te hiero, ’e i te fa’aineine iā’u nō tā’u ha’amaita’ira’a patereareha.
’Ua taui roa vau, ’aita rā vau i ’ite ē tae roa te pūhapara’a a te Feiā ’Āpī Tamāhine, i tō’u putapūra’a i te Vārua Maita’i ’e tō’u ’itera’a ē, e ’itera’a pāpū tō’u—e ’itera’a pāpū e fa’aha’amana’o iā’u ē, ’ua here te Atua iā’u, ’e e fa’anahora’a tāna nō’u ’e ’aita ’oia i hina’aro ’ia vai ’ōtahi noa vau. E ’itera’a pāpū māramarama roa ’e te pūai tei taui iā’u. E ’itera’a pāpū e fa’a’ite ’e e tūrama i te ’ē’a tā’u e haere, e ’ere noa rā, tō vetahi ’ē ato’a. E ’itera’a pāpū ’aita e taiā ’ia ’ana’ana i roto i te pōiri.