Hope’ara’a hanahana
Tē ora nei te ta’ata pāpa’i i Farāni.
Tā’u i mātau, e mea ’oa’oa noa tō’u hoa. E aha ra ïa tē ha’ape’ape’a ra iāna ?
Fa’ahōho’ara’a nā Reginald Swinney
Nō Farāni mai au, ’ua fa’aea rā māua tō’u tuahine hō’ē matahiti i te mau pae hiti’a o te rā nō te Fenua Marite ’ei pīahi. I terā matahiti, ’ua fārerei māua e rave rahi ta’ata, te tamāhine rā tā’u e ha’amana’o rahi ra, ’o Destiny ïa tōna i’oa. ’Ua riro roa mai māua ’ei hoa rahi. E rave rahi mau mea tā māua i rave ’āmui, i te ha’api’ira’a ’e i rāpae i te ha’api’ira’a ’e nā muri i tō’u tuahine. E mea ’oa’oa noa Destiny. ’O te mea ïa tā’u i au roa i roto iāna.
I te hō’ē rā mahana, ’ua ’ite au iāna e mata pe’ape’a tōna, ’aita a’enei au i ’ite iāna mai te reira. ’Ua ui atu vau iāna e aha te fifi. ’Ua pāhono mai ’oia ’aita ’oia i hina’aro e paraparau nō te reira. ’Ite a’era vau i te hō’ē pāpiē i roto i tōna rima. ’Ua rave mai au i te reira ’e ’ua tai’o atura.
’Ua pāpa’ihia te tahi parau ri’i ’ino nō ni’a iāna, ’aita e mana’ohia. Tē parau nei terā pāpie ē, e mea hā’iri’iri ’oia, ’aita e ta’ata e au iāna, ’aita e faufa’a tōna ora, e mea au a’e ’ia haere ’oia e ha’apohe iāna. ’Aita vau i mana’o ē, e nehenehe e parauhia teie mau parau ’ino i ni’a iāna. ’Ua ’oto roa vau i te ’itera’a i te māuiui tāna e fa’aruru ra.
Mai terā taime, ’ua tauto’o rahi atu ā vau i te rirora’a ’ei hoa nō Destiny—’eiaha e haere ri’i noa nā muri iāna, e vai vata noa rā nōna ’e e vai ateate iho ā i ni’a iāna. ’Ua fa’ata’a atu vau iāna ē, e tamāhine ’oia nā te Atua, ’ua ha’amaita’ihia ’oia i te nātura hanahana, ma te fa’ahiahia ’e te ’aravihi nō te rave i te mau ’ohipa rahi roa.
E mea fifi ’ia here ’oe ’ia ’oe iho i te taime e fa’a’ino te ta’ata ia ’oe ’e e fa’ahapahapa ia ’oe. ’A fa’ahoa noa ai au ia Destiny, ’ua ’apo mai au ē, te rāve’a maita’i roa a’e nō te tauturu i te ta’ata ’o te here-noa-ra’a ïa ia rātou ’e te tauturura’a ia rātou ’ia ’ite ’o vai mau rātou.
I te hope’a o te matahiti, i te ho’ira’a vau i Farāni, ’ua parau mai Destiny i te hō’ē mea tā’u e poihere noa. ’Ua nā ’ō mai ’oia : « Emma, ’ua fa’aora mai ’oe iā’u. Hou ’oe i haere mai, ’ua hina’aro vau e ha’apohe iā’u. ’Ua tauturu rahi mai rā ’oe ’e tō ’oe tuahine iā’u, nā roto noa i te ha’apa’ora’a iā’u. I teie mahana, ’ua au vau iā’u, ’e ’ua here au ia ’oe. »
E rave rahi tamari’i i te fare ha’api’ira’a e fa’aruru nei i te rave-’ino-ra’a, ’o tē hāmani-’ino-hia ra ’aore rā ’o tē tu’uhia ra i te hiti. ’A ’imi i te hō’ē rāve’a nō te toro atu i te rima ia rātou. ’A paraparau ia rātou, ’a feruri ia rātou, ’a hāmani maita’i ia rātou. ’O te mea tā te Fa’aora e rave ’āhani tei reira ’oia, ’e i te tahi taime, ’o te hō’ē noa ’ia ora na ’ōhie ’aore rā te hō’ē mata ’ata’ata tē nehenehe e taui i te mau mea.