Eria Lidasip Mesej
Joen Tugeta from ol Blesing we I No Save Finis Tru long Ol Kavenan blong yumi wetem Lod
“God I lavem tumas ol man long wol, nao hem I givim mi, mi stret Pikinini blong hem, mi wan nomo we I gat blong olgeta man we oli bilif long mi bambae oli no save lus, oli gat laef we I no save finis” (Jon 3:16).
Mi glad tumas long Papa blong yumi long Heven we lav blong Hem we i stret evriwan blong evri pikinini blong Hem.
Plante long yumi i go tru long sam bigfala jalenj long laef ia. Wan long ol bigfala jalenj ia hem i taem we yumi lusum olgeta we yumi lavem afta plante yia we yumi bin spendem taem tugeta. Kaen filing ia i olsem se God i no mekem samting i stret wetem yumi, be wanem i tru i we, hemia i wan tes blong laef we i tabu we i kam long wan Papa long Heven we i gat lav we I wantem yumi blong gro long fet blong mekem se yumi save kam olsem Hem.
Lod Jisas Kraes I bin talemaot tingting blong Hem long profet Joseph Smith, taem we hem i stap filim nogud long ol hevi trabol blong hem taem hem i bin sidaon olsem wan prisena insaed long Libeti kalabus.
“Mo sapos bae oli sakem yu insaed long wan bigfala hol, o long han blong ol man blong kilimded man, mo oli jajem yu se yu mas ded; sapos bae oli sakem yu long dip ples; sapos bae wan bigfala wef i stap girap blong kam agensem yu; sapos ol wael win oli kam enemi blong yu; sapos ol heven oli pulum tudak i kam wanples, mo evri samting oli joen blong blokem rod blong yu; mo antap long evri samting, sapos ol stret jo blong hel oli open bigwan blong solemdaon yu, nao yu mas save, boe blong mi, se evri samting ia bae i givim eksperiens long yu, mo bae i blong gud blong yu.
“Pikinini blong Man i bin kamdaon mo fesem i bitim evri samting ia. ?Olsem wanem? ?Yu yu moa hae long hem?
“From hemia, yu mas stap long rod blong yu, mo prishud bae i stap wetem yu; . . . yu no fraet long wanem we man i save mekem, from we God bae i stap wetem yu blong oltaem mo oltaem” (Doktrin mo Ol Kavenan 122:7–9).
Long wan givhan visit we i jes pas, mifala i go long wan hom we hasban i bin ded; hem i bin givim seves olsem wan fetful lida blong Jos. Dia waef blong hem i kasem wan tes tru ol filing blong hem we i go kasem wan poen we sloslo hem i stat blong lusum fet blong hem mo no moa gat intres blong go long Jos; ol pikinini oli bin folem mama blong olgeta blong go inaktiv long Jos.Taem mifala i kam tugeta wetem famli ia long moning visit ia, ol gel mo ol apu pikinini tu oli stap, mifala i bin serem lav we Papa blong yumi long Heven mo Jisas Kraes i gat long wanwan long olgeta.
Mifala i rimaenem dia sista blong mifala ia long ol tabu kavenan we hem mo hasban blong hem tufala i bin mekem long ol yia bifo insaed long tabu tempol blong Lod. Ol toktok blong mifala we i leftemap tingting, wetem sapot blong swit Tabu Spirit we i stap mo tru lav blong mifala olsem ol brata blong hem long gospel, i bin mekem hat blong hem i kam sofsof mo hem i glad taem ol swit memori blong taem hem i bin sil long tempol i bin fulumap tingting mo hat blong hem.
Ol odinens mo kavenan blong yumi long tempol oli tabu tumas mo hemia nao i soem bigwan lav we Papa blong yumi long Heven i gat long yumi. Ol gudgudfala blessing we oli promesem long yumi tru ol tabu kavenan ia bae i hapen nomo taem yumi stap fetful go kasem en.
Mi bin tokbaot wetem famli ia se mi bin lusum dia waef blong mi i no longtaem i pas, mo we mi misim hem bigwan evri dei. Bigfala lus ia bae i wan mak we bae mi mas tekem wetem mi kasem taem mi pas i go long nekis laef be mi serem wetem olgeta strong tingting blong mi blong gohed blong givim seves long Sevya blong mi wetem ful hat blong mi kasem en, wetem save ia se wan dei, bae mi mitim dia waef blong mi bakegen mo bae mitufala i laef tugeta wetem glad mo hapines blong oltaem.
Taem mifala i stap gohed blong givhan long naesfala famli ia, mifala i testifae long ol han blong sore blong Sevya we i open blong welkamem olgeta, mo invitesen blong hem i go long olgeta blong kambak long jos mo stap glad long ol blesing blong gospel. Mi tanem mi i go long wanwan memba blong famli, stat wetem mama, mo talem:
“?Yu yu akseptem invitesen ia we i kam long Sevya blong yumi? ?Bae yu kam long Sakramen miting long ol Sandei?”
Wanwan long olgeta i akseptem invitesen ia. Olsem ol wokman blong Lod wetem tingting i stap daon, ol hat blong mifala i fulap wetem glad taem mifala i witnesem ol sol ia we oli sakem sin mo folem rod ia blong kam long Sevya blong olgeta! Mi filim ol Heven i glad wetem mifala taem mifala i joen tugeta wetem wanwan long mifala, tugeta long ol hadtaem mo long fet.
Hemia i no from nomo blong mekem ol tabu kavenan, be blong gohed blong stap obei long olgeta we i joenem yumi tugeta wetem olgeta we yumi lavem. Paoa blong Atonmen blong Sevya blong yumi mo fasin blong mekem fet blong yumi oltaeam i gro tru long prea, skripja stadi mo blong stap givim seves bae i givim paoa we yumi nidim blong fesem evri jalenj blong laef.
Sevya blong yumi Jisas Kraes i save evriwan we i stap safa. Oltaem Hem i stap openem han blong sore mo lav blong Hem long yumi. Mi stap invaetem evriwan we i stap fesem ol jalenj we i had tumas long laef blong olgeta, i nomata wanem kaen jalenj, blong oli kam long Sevya mo stap glad long bigfala kaikai blong lafet long tebol blong Hem taem yu tekpat long sakramen evri Sandei, mo mekem mo folem ol tabu kavenan insaed long tabu tempol blong Hem. Taem yu mekem hemia, promes ia i blong yu:
“Taswe, yufala i no ataed blong mekem gud samting, from we yufala i stap putum fandesen blong wan bigfala wok. Mo aot long ol smol samting, ol samting we oli bigwan oli kamaot.
“Luk, Lod i askem blong mas gat wan hat mo wan maen we i wantem mekem samting; mo man we i wantem mekem samting mo i stap obei, bambae hem i kakae ol gudfala samting blong graon blong Saeon long ol las dei ia” (Dokrin mo Ol Kavenan 64:33–34).
Mi testifae se ol kavenan we yumi mekem long taem blong baptaes, taem yumi kasem tabu prishud, mo ol odinens ia we i hapen insaed long tempol, oli fasem olgeta wetem ol bigfala blesing we Lod i rere long olgeta blong yumi. Tru long fasin blong stap fetful mo obei long ol kavenan ia taem yumi stanap strong kasem en, bae yumi kasem evri promes blesing blong Lod, long tabu nem blong Lod blong yumi Jisas Kraes, amen.