Lokol Pej

Pathway Rod we I go long Wan Laef blong Stap Lan

Ol Lata-dei Sent long Pasifik we oli serem ol eksperiens blong olgeta long Pathway Connect.

Derek Liufau

Mi wantem stap wan eksampol long ol pikinini blong mi.

Olsem wan yut mi no bin tekem edukesen blong mi i series olsem we mi sud mekem. Blong eit manis long yia 2018 waef blong mi i mas lukaotem hemwan ol fo pikinini blong mitufala truaot long wik, semmak olsem we hem nomo i wok blong sapotem famli, mo long taem ia mi bin stap go long polis kolej blong kam kwalifae. Hemia i bin wan bigfala hadtaem blong famli blong mi; mo long tetaem ia mi kam blong luksave olsem wanem i impoten blong kasem wan edukesen.

Ol pikinini blong mi oli ol fasfala risen we i pusum mi. Mi wantem gohed long edukesen blong mi mo stap olsem wan moa gud eksampol blong olgeta. Mi wantem olgeta blong luk se i neva let tumas blong stap lan mo we yumi neva stop blong stap lan. Nomata hamas yia yumi gat, moa yumi gat save mo edukesen, bae moa janis i open long yumi.

Waef blong mi i leftemap tingting blong mi blong joenem Pathway Connect wetem hem mo mi glad tumas we hem i mekem. Mi bin fraet long fastaem from mi no bin stadi blong 10 yia, be mi nomo save kam antap long wok we mi stap long hem, mekem se tugeta wetem waef blong mi mitufala i putum fet long aksen mo joenem.

Tru long program blong Pathway mi bin lanem olsem wanem blong stap lan. Mi lanem olsem wanem blong yusum taem blong mi long wan wei we i moa waes mo mi bin kasem wan bigfala namba blong tras taem mi luk hemia wetem God, i nogat wan samting i had. Mi gat wan moa yia blong finisim digri blong mi long polis praktis mo mi no tingting blong stop long ples ia.

Papa blong yumi long Heven Hem i evri save ia. Sapos yumi stap traehad blong kam olsem Hem, olsem rod ia blong save mo blong andastanem samting bae i mas neva stop.

Eute Kareketaake

Wan Gudfala fiuja blong famli blong mi.

Nem blong mi Eute Kareketaake. Mi gat 24 yia mo gol blong mi i blong kam wan man we i wok wetem ol narawan blong helpem olgeta long ol had samting long laef. Mi bin ekperiensem blong fastaem lav mo kea long wan man we i wok blong helpem ol narawan long wan taem we i had tumas long laef blong mi, mekem se stat long taem ia i bin givim mi wan strong tingting long wok ia.

Taem mi mo sista blong mi i yang, oli sendem mitufala i go long Yunaeted Stet blong stap wetem anti blong mi mo go long skul. Mitufala i talem tangkyu from wan moa gud janis ia blong kasem wan edukesen, be anti blong mi i no lukaot gud long mitufala oltaem. Long wan taem hem i go long wan holidei mo lego mi mo sista i stap mitufala nomo long haos. Wan narawan bae i kam jekem mitufala evri dei, be mitufala i yang tumas mo fraet blong stap mitufalawan.

Mi bin fesem hadtaem blong slip long naet mo taem mi go long skul mi stap filim slip mo tija blong mi i askem mi from wanem mi stap taet. Mi no bin save se bae oli no akseptem situesen blong mitufala mo sapraes long aksen blong olgeta long ansa blong mi. Mi mo sista blong mi i bin gotru long intaviu wetem ol man we oli stap wok blong helpem ol narawan mo mi filim strong filing we oli gat long wok blong olgeta mo tru hat blong olgeta blong wantem helpem mitufala. Mi wantem blong kam olsem olgeta blong helpem ol pikinini olsem mifala long semmak wei wetem lav we oli bin mekem. Disaea ia i neva lego mi.

Situesen blong mi long YS (Amerika) i no bin wan bigfala janis long saed blong edukesen olsem we i sapos blong hapen, be God i wok long plante wei we yumi no save andastanem mo eksperiens blong mi i lidim mi i go blong faenem wanem mi wantem mekem long laef blong mi. Nomata mi gohed blong gat hop ia blong kam olsem wan man blong stap help, rod blong kasem gol ia i no bin isi; samtaem mi filim i no posibol. Mi bin lanem, se Papa long Heven i save wanem hat blong yumi i wantem mo Hem i gat plan blong yumi evriwan.

Long 2017 mi maredem hasban blong mi we hem i wan riten misinari blong Jos. Afta wan naesfala tabu eksperiens we spirit i bin konfemem long mi trutok blong gospel, mi bin baptaes.

Blong faenem gospel i wan bigfala step blong go kasem ol gol blong edukesen blong mi. Jos i luk impotens blong edukesen semmak olsem we mi luk mo i provaedem plante sapot olsem ‘Pathway’ program we i mekem i posibol blong olgeta we i kam wetem defdefren bakgraon blong save kasem wan edukesen. Rod ia i no isi yet, be mi bin lanem se taem God i givim wan komanmen long ol pikinini blong Hem, bae Hem i oltaem provaedem wan wei tugeta long saed blong bodi mo spirit.

Pathway program hem i ansa blong wanem mi wantem blong kasem edukesen long hem mo i bin givim long mi mo hasban blong mi plante moa bitim wan janis ia nomo blong gat moa edukesen. Mifala i bin lanem abaot fasin blong stap dipen long yuwan mo ol hapi famli rilesensip, wetem ol nara impoten skil blong laef.

Semmak olsem blong provaedem Pathway program, Lod i bin fulumap mifala wetem paoa mo spirit blong Hem.

Mifala i bin filim wan tras we i kam antap. Mi filim wan sapraes i kam kavremap mi taem bae mi stanap long fored blong ol narawan we i joenem Pathway blong toktok. Mi mo hasban blong mi i bin filim se paoa mo janis blong mitufala blong yusum gud taem long wan waes wei i bin kam antap mo wokhad blong finisim ol asaenmen blong mitufala.

Blong joenem Pathway i wan had desisen blong mekem. Mifala i nogat laptop mo intanet koneksen long hom blong mitufala. Nomata long ol samting ia we mitufala i nogat mitufala i bin filim han blong God long rod blong mitufala, i sendem i kam ol smol mo simpol merikel long rod blong mitufala olsem blong faenem ol nara ples blong mekem ol wok blong mitufala long hem, o ol memba we oli luksave mitufala long longfala rod blong mitufala i go long laebri mo stap pikimap mitufala.

Mi wantem wan gudfala fiuja blong famli blong mi. Mi save se blong kasem moa edukesen bae i givim wan bigfala janis blong gat sakses long famli blong mi mo stap dipen long olgetawan. Mi save se Papa long Heven, Jisas Kraes mo Tabu Spirit i bin stap wetem mifala long wokbaot blong mifala long rod ia mo oli bin karemaot mo mekem ol hevi samting i nomo hevi.

May Purcell

Tingbaot praes blong yu, yu wan pikinini gel blong God.

Long 2016 mi mo hasban blong mi i bin stap kasem kaonseling long saed blong mared laef blong mitufala. Mi bin stop blong go long Jos long tetaem ia mo mi wantem wan divos. Mared kaonsela blong mitufala i bin invaetem mitufala blong mekem Pathway Connect tugeta. From se i wan program blong stap lan we gospel i stap long medel, hem i filim se blong mekem hemia tugeta bae i help blong mekem doktrin i draon dip insaed long hat blong mitufala.

Fas tingting blong mi i bin, “o no, wan nara program blong Jos,” be mi bin oltaem wantem blong gat moa edukesen mo mi bin talem se bae mi traem mo luk se bae i go olsem wanem.

!Mitufala i nomo lukluk i go bihaen!

Pathway i help blong sevem mared blong mitufala, i sapotem mi long rod blong mi i gobak long Jos aktiviti mo putum mi long rod blong mi blong wan longfala laef blong stap lan.

Edukesen i gat paoa ia blong brekem ol sekol. Mi groap long wan ples we i gat bigfala nid long Sidni. Raon long mi i gat plante jeneresen blong ol pipol we oli pua, oli nogat hop mo evri samting we i go wetem laef ia. Komplitim Pathway i helpem mi blong luk se hem i responsabiliti blong mi blong kasem plante edukesen we mi save mekem blong ol nekis jeneresen.

Mi jes statem fas semesta blong mi long BYY-Aedaho(onlaen). Naoia mi stap stadi long bajela digri long manejmen mo las gol blong mi i blong statem wan bisnis tugeta wetem hasban blong mi.

!I tru Pathway i blong evriwan! Mi no bin stadi blong 20 yia taem mi bin stat skul, so i tru mi bin gat plante wari blong winim be mi bin filim tu han blong Sevya blong mi Jisas Kraes we i lidim mi, long evri step long rod blong mi.

Taem mi stap stadi yet wetem Pathway Connect, wan wok i kamaot long ples blong wok blong mi. I bin wok ia nao we mi bin stap wantem be mi faenemaot se i nidim blong gat wan digri blong yunivesiti, mi bin save se mi nogat janis ia. Mi no tingting hevi long hem long fastaem ia be Tabu Spirit i talem mi blong aplae nomo.

Mi filim sem blong aplae from mi save sam long olgeta we oli aplae ia oli bin skul gud. Mi sapraes taem mi gat wan intaviu, be mi stil ting se bae mi nogat janis ia. Mi wari tumas mo bifo intaviu blong mi, mi disaed blong prea. Taem mi mekem, wan filing blong pis mo lav i kavremap mi mo mi harem spirit i se:

“Tingbaot praes blong yu, yu wan pikinini gel blong God.”

Mi bin kasem wok ia long en, be blesing ia i kam nambatu long testemoni blong mi long dei ia long lav blong Jisas Kraes mo paoa blong Hem we i nogat en.