Lokol Pej
Bae Mi Go Wea Ples Yu Wantem Mi blong Go
Stap lanem blong luksave smol kwaet voes blong Spirit.
Sikret blong misinari wok hem i Spirit. Taem yu gat spirit, evri samting i wok stret gud evriwan long en, iven sapos sam taem rod blong folem i fasfas.
Mi mi wan konvet long Jos Ia blong Jisas Kraes blong Ol Lata-dei sent. Famli blong mi i joenem jos taem mi gat leven yia mo stat long taem ia mi bin stap strong long Jos kasem tedei. Mi no save wet blong mekem misinari wok mo long 2014 mi kasem misin kol blong mi blong go long misin long Misisipi Jackson Mission. Blong stap fultaem blong givhan long wok blong Lod i wan naesfala taem blong mi mo mi lavem evri wanwan dei ia be, kolosap 5 manis bifo misin blong mi i stap kam long en, mi bin sik bigwan.
Ol dokta oli no save faenemaot wanem i rong wetem mi. Mi no bin save graonem o solemdaon kaekae mo mekem se mi no bin stap kakae blong plante dei. Samtaem bae mi save traem kaekae blong ol bebe o ol narafala kaekae we i sofsof be hemia nomo. Wetem hemia i gat filing ia tu blong wantem traot, hed i soa mo trot i soa. Evri meresin we dokta i advaesem mi blong tekem i no helpem mi nating mo mi lusum plante kilo we i mekem se Misin Presiden blong mi i bin fraet se wan samting nogud bae i save hapen long mi. Oli bin disaed afta se bae mi gobak hom.
Blong stap sik bigwan olsem i bin wan bigfala jalenj speseli from i nogat wan risen o wan saen we i kosem sik ia. Wetem ful hat blong mi, mi wantem finisim gud misin blong mi. Mi krae wetem ful hat i go long Lod blong Hem i hilim mi. Mi ridim Petriakol blesing blong mi plante taem mo stap traem blong andastanem wanem God i wantem long mi. Mi disaed blong askem wan prishud blesing long misin Presiden blong mi. Long taem blong blesing ia mi bin gat strong filing ia se Papa blong mi long Heven i bin save mi, gel blong Hem. Hem i bin save wanem mi wantem tumas taem mi givim seves long Hem. I minim se mi bin wiling blong go wea ples bae Hem i wantem mi blong go, mo from hemia, bae Hem i ansarem prea mo krae blong mi long hat.
Wan manis afta we mi kambak long Vanuatu, mi kam oraet bakegen blong save givim seves mo finisim 18 manis long hom ples blong mi. Mi bin muv i go long niufala eria we ol elda oli stap long hem bifo. Kompanion blong mi i jes kambak long MTS mekem se i nogat wan long mitufala i save eria ia. I bin gat plante wok blong mekem.
Evri dei bae mitufala i wokbaot 2 aoa i go long vilij ia we bae mitufala i wok long hem, noknok long ol doa mo lukaotem ol pipol blong tijim. Blong faenem niu investigeta i had long eria ia mo olsem wan trena long kompanionsip blong mi, mi wantem kompanion blong mi i filim spirit blong wok. Wan dei mi mo kompanion blong mi i disaed blong prea mo livim kakae blong wan janis blong faenem wan niufala investigeta.
Ol skripja oli tijim yumi se voes blong spirit hem i no laod o strong, o i no wan voes blong tanda be, hem i wan smol kwaet voes nomo. Hem i bin voes ia we mi harem long taem we misin presiden blong mi i givim blesing long mi. Semfala voes ia i bin toktok long mitufala taem mitufala i stap livim kakae. Ol filing ia we mitufala i bin gat long dei ia i bin kwaet be i tru. Oli lidim mitufala wan step afta narawan, i go long wan famli we oli jes muv nomo i kam long eria ia. Mitufala i bin givim seves long famli ia mo tu long wan gel blong olgeta: Marie. Seves blong mitufala long hem i lidim mifala blong toktokraon long gospel mo i no longtaem, Marie i kam investigeta blong mitufala.
Marie i wanem we mifala ol misinari i singaotem wan “Gol investigeta.” Hemia i wan we God i rere long hem blong harem gospel blong Hem we i bin kambak bifo i lidim ol misinari blong Hem, olgeta we oli fultaem o no, i go long olgeta.
Marie i gat wan naesfala spirit wetem hem. Hem i bin gat plante kwestin mo hem i putum tingting i stap daon mo rere blong kasem tijing taem mifala i traem bes blong ansarem olgeta. Afta tri wik blong givim seves long hem, tijim hem mo prea wetem hem, Marie i bin kasem baptaes. Hem i stap mekem misinari wok naoia long Sidni Ostrelia misin.
Truaot long wol, ol gudgudfala pikinini blong God oli rere i stap blong kasem Gospel blong Hem. I nomata long wea ples ol singaotem yumi blong go givim seves, sapos yumi stap kiln inaf long spirit mo lanem blong filim save ol kwaet filing ia, bae i lidim yumi i go long ol pipol ia.
Blong stap sik i bin had be eksperiens ia i mekem mi save kam strong moa blong harem save smol tintin voes ia blong spirit. Fasin ia blong mekem mi kam strong moa, i mekem i isi long mi blong harem ol kwaet voes ia we i lidim mi mo kompanion blong mi i go long Marie. Mi talem tangkyu from evri eksperiens tugeta hemia blong stap glad mo hemia wetem jalenj we i bin tijim mi blong harem moa klia Tabu Spirit from spirit i sikret blong sakses, i no long ol samting long saed blong spirit nomo be long evri eria blong laef.