Ana Utu Alonso ae Akea Tokina
“Bwa te tembora bon te tabo ae tabu ike ti kona iai ni uaia ni kabaeaki” (Aia Boki n Anene Ataei, 95).
“I kona ni manga nora Mamá ao Papá?”
“Te itita bon te tai ae tamaroa n iangoa Iesu ao n uringa Mangautina,” e taku Titita Rojas. E kaota tamnein Iesu. “Mai Irouna, aomata ake a mate a kona ni manga maiu.”
Alonso e taraa ana tia reirei n te Moanrinan n taekina aei. Nanona ngkanne I kona ni manga noriia au karo? E iango Alonso.
Mamá e mate tabeua te ririki nako. Alonso e aki rangi n uringnga, ma e tangiria n tatara tamneina. Imwina e mate naba Papá.
Ngkai e maeka Alonso ma Abuela, tibuna te unaine. E a tia n reireinna taekan ana ekaretia, Ana Ekaretia Iesu Kristo Ibukiia Aika Itiaki ni Boong aika Kaitira. E na bon bwabetitoaki ao ni kamatoaki n te ririki ae na roko, ngkana e a roro nako iai.
Imwina Titita Rojas e kaota tamnein te kateitei ae mainaina. “Teuana te bwaintangira ae tamaroa mairoun Iesu bon taian tembora. Aio bon teuana te tembora ikai i Chile.”
Alonso e taraa bannan te aomata are te koora i etan te kateitei. E bon tamaroa! E iango bwa tera ae kakaraoaki inanona.
“Tembora bon tabo are a kabaeaki iai utu ibukin te tai ae akea tokina,” e taku titita Rojas. “Te tembora aio i Santiago bon ngaia are I kabaeaki iai ma au karo imwiin kaainakin te Ekaretia. Ibukina bwa ti kabaeaki, I kona ni maeka ma ngaiia imwin naba te mate.”
Alonso e namakin te ingainga ngke e ongo aei. “I kona ni kabaeaki ma au karo?” e titiraki. “E ngae ngke a tia ni mate?”
E katoutoua atuna Titita Rojas. “Eng! Aio teuana bukina ae a rangi ni kakaawaki iai taian tembora. A kakabwaiaia kaain te utu, n ikotaki ma naake a tia ni mate.”
N te bong anne, Alonso e tabe n iangoa taekan taian tembora. E tuanga Abuela bwa e na reireinna riki ae bati. E marooroakin kunnikai aika mainaina ake a bwaini aomata inanona ao korobanna aika tamaroa iaon oon nanona.
“Ma karotona, bon te tabo are ko kona iai n kabaeaki ma am karo” e taku Abuela. “Ti na butia uoman aomata man te uoote bwa a na tei ibukiia n tain te kabaebae.”
“Ti kona n nako ningabong?” E titiraki Alonso. “I tangiria ni maeka ma Mamá ao Papá n aki toki!”
E moangare Abuela. “I kukurei ngkai ko kan mwananga,” e taku. “Ma te tembora ae uakaan e mena i Concepción. E aki tau ara mwane ibukin kantokara n te bwati.”
“N na ibuobuoki ni kaikomwane ibukin mwanangara!” E taku Alonso.
Man te tai anne, ngkana e kunea te koin Alonso n te kawai ke iai ana mwane, e kabwaka ana kabwianibwai ao imwina e kawakina nikirana bwa mwanen mwanangaia nakon te tembora.
Imwin namwakaina ni kaikomwane, ana utu Alonso ao Abuela a karekea te mwane ae tau ibukin mwanangaia nakon te tembora. A tuanga te Tari ao Titita Silve bwa a na raoniia. N bongin mwanangaia, a mwananga n ae maan n te bwati nakon kaawan Concepción. E nang bon bung taai ngke Alonso e noora te bwai ae koora i mwaaia.
“I a kona n nora te anera Moronaai!” E taku Alonso, ni kotokotea bannan te aomata are i taubukin te tembora ae buruu.
A tiku n te tairiki anne n te auti ae kaan ma te tembora. N te ingabong are mwina, Alonso e rin n te tembora te moan tai. E nora tamnein Iesu ae bubura i nanona. Ngaia ao Abuela a oneiia n ae mainaina. E namakina te kukurei ao te rau.
Ngke e roko tain kabaeaia, Alonso e mwananga nakon te ruu ae tamaroa ma kiraati iaon te oo. Te tia mwakuri n te tembora e buoka Alonso, Abuela, ao te utu ae te Silve bwa a na katorobubua ni katobibia te taibora ae onoti ae aranaki bwa te bao ni karea. E bon rabunaki n te kunnikai ae maraurau.
Te Tari ao Titita Silve a mena ikekei ibukin tinan ao taman Alonso. Abuela e mena ikekei ibukin mwanena are e mate imwain bungin Alonso.
E kamakii matana, Alonso e katamneia bwa a ikotaki ana utu.
I rangi n ingainga ni manga nooria, e iango Alonso. I rangi ni kakaitau bwa te utu e kona ni kabaeaki n akea tokina! ●
Kamataata n te korotamnei iroun Mark Jarman