Iai aia Kantaninga n Rokon te Tia Kamaiu—ao Ngaira Naba
Burabeti n Ana Boki Moomon iai aia kantaninga bwa e na roko Kristo. Ni warekan aia taeka, ti kona ni karekea te kantaninga naba anne imwain are E na manga roko.
TE KAOTI, IROUN JORGE COCCO SANTANGELO
Tera taeka aika roko n am iango ngkana ko iangoa Ana Boki Moomon?
Nibwaite, Reimwanaite, ke itera ake tabeua?
Te buaka, te rereua, te maraia?
Te rairannano, te kamaiuaki, te raoiroi?
Iesu Kristo?
Kantaninga?
Te Itita bon te tai ae tamaroa ni manga iangoi rongorongo n Ana Boki Moomon. Ae kakaawaki riki, te rongorongo are Iesu bon te Kristo, ara Tia Kamaiu ao te Tia Kabooira. Mai Irouna, ti kona ni kainaomataaki man marakin te rabwata ma te tamnei. Man te mate ao te bure. Ti kona n tokanikai ma baika a buakaka are e uoti te aonaaba nakoira.
Ni kauarerekeana, ti kona ni kareka te kantaninga.
Te kantaninga—te kantaninga ae koaua, kabotoaki iaon Iesu Kristo—e kairiia burabeti ake ngkoa ni korei rekooti iaon bwaatua koora ake a na riki bwa Ana Boki Moomon. Iakobwa e tuangira, “Bwa, bon aio bukin korean bwaai aikai, bwa a na ataia ae ti ataa taekan Kristo, ao ti kariaria rokon mimitongina bubua n ririki i mwain rokona” (Iakobwa 4:4; e kaairaki kamatataana).
E tangiria Iakobwa bwa ti na ataia bwa ngaia—ao taan koroboki ake burabeti—a ataa rokon Kristo. Bubua n ririki imwain ae E roko! Ao a bon kairaki ni kareka te kantaninga man aia taeka burabeti ake a wareki. E kabwarabwaraa Iakobwa, “ao tiaki ti ngaira aika ti kariaria rokon mimitongina, ma burabeti aika a tabu ni kabane ake a maiu imwaira.
“Taraia, a kakoaua Kristo ao a neboa te Tama n arana, ao a ti neboa naba te Tama n arana. …
“Mangaia ae ti ukoukori kanoan aia taeka burabeti, ao a mwaiti kaotioti ma tamnein taeka ni burabeti; ao n nooran kakoaua aikai ao e reke iroura te kaantaninga, ao a aki kai kamwaeaki ara onimaki” (Iakobwa 4:4–6; taraa naba 1 ;Nibwaai 19:21; Iakobwa 7:11; Motiaea 3:13; Ereman 8:16).
Te kantaninga are a karekea man oin are a rinanona ao taeka ni burabeti ake a wareki ni koroboki aika tabu a katauraoia nakon te bong are e na roko iai Kristo. N aron anne, burabeti ni bong aikai a kaungaira bwa ti na katauraoira imwain manga rokon Kristo. Ngkana ti na karekea te kantaninga naba anne, ti kainnanoia naba n “ukoukori aia taeka burabeti, ao [n ukoukoria ni] karekei kaotioti aika a mwaiti ao tamnein taeka ni burabeti.” Aia koaua iroun Iesu Kristo e aki tii kakorakorai ara koaua ma e kautauraoira naba imwain rokona.
Riaai
“Mangaia ae moan te kakaawaki bwa a na tataekinaki bwaai aikai nakoia kaain aonaba, bwa a na ataia ae bon akea te iriko ae e kona ni maeka imatan te Atua, ma ti rinanon mwakuri aika raoiroi, ma ana nanoanga, ao ana akoi te Mesia ae Tabu, are e a tia n anga maiuna bwa e na tiringaki n te maiu n rabwata, ao e a manga anaia ni mwaakan te Tamnei, bwa e aonga ni karekea te mangauti ibukiia maate, ngkai bon ngaia are e na moan mangauti.”
Nibwaai
“Ao ti kaakarabakauakina Kristo, ao ti kimwareirei iroun Kristo, ao ti tataekina Kristo, ao ti taetae ni burabeti ibukin Kristo, ao ti koroi kanoan ara taeka ni burabeti bwa natira a na ataia bwa antai ae a na kawaria ibukin kamaunan aia bure.”
Te Uea ae Beniamina
“Ao e na aranaki bwa Iesu Kristo, Natin te Atua. …
“Ao nooria, e na kawaria ana botanaomata, bwa e aonga n reke te kamaiuaki nakoia natiia aomata eng rinanon onimakinan arana; …
“Ao e na mangauti n te kateniua ni bong mai buakoia maate. …
“Bwa taraia, ao raraana e karaoa te mwakuri ni kamaiu naba ibukin aia bure aomata ni kabane ake a tia ni bwaka n riaon te tua iroun Atam, naake a tia ni mate n aki ataa ana babaire te Atua ibukiia, ke ake a tia ni bure ao a aki ataia.”
Aramwa
“Ao e na waaki, n rinanon te maraki ma te karawawataaki ao te kaririaki n aekaia nako; ao aio bwa e na kakoroaki bukin te taeka are e taku bwa e na uota iaona marakiia ao aorakiia ana aomata.
“Ao e na uota iaona te mate, bwa e aonga ni kabwara ana kabaebae te mate are kabaeiia ana aomata; ao e na uota iaona mamaaraia, bwa e na on nanona n te nanoanga, ni kaineti ma te maiu ni iriko,bwa e na ataia ni kaineti ma te maiu ni iriko bwa e na kanga ni buokiia ana aomata ni kaineti ma mamaaraia.
Amureki
”Ao te kabanea n anga karea are e kakannato arei bon Natin te Atua, eng, are akea tiana man akea tokina.
“Ao ngaia are e na karekea te kamaiuaki nakoia ni kabane ake a na kakoaua arana; bwa aio bon nanon te kabanea n anga karea aio, bwa e na kamwakura te nanoanga, are e na riaon te momotiraoi, ma ni karekea te anga nakoia aomata are a na kona ni karekea te onimaki nakon te rairannano.
“Ao ngaia are te nanoanga e kona ni kakoroa bukin bwaai ake e tangiri te momotiraoi, ao e katobibia ni bain te mweengaraoi, ngaia are ti nakon are iai te onimaki irouna nakon te rairannano e bon kamenaaki iaan te tua ae kaineti ma te momotiraoi; ma ngaia are te babaire ae kakannato ao akea tokina ibukin te kabooaki e na ti kakoroaki bukina iroun are iai ana onimaki nakon te rairannano.”
Gethsemane, by Jorge Cocco Santangelo
Tamuera te Reimwanaite
“Bwa nooria, e na bon mate bwa e aonga n reke te kamaiuaki; eng, e bon kakawaki irouna ao e bon riai bwa e na mate, bwa e aonga ni karekea te mangauti nakon ane e mate, bwa aonga n uotaki aomata nako matan te Uea.
“Eng, nooria, te mate e kakoroa bukin te mangauti, ao kaboaia aomata ni kabane man te moan mate—are te mate n tamnei; bwa ni kabane aomata, ma ni bwakan Atam a bon teweaki nako mai matan te Uea, ao a aranaki bwa a mate, ni bwain te rabwata ao bwain te tamnei.
“Ma nooria, mangautin Kristo e kaboia aomata ni kabane, eng, ni kabane aomata, ma n uotiia ni kaokia nako matan te Uea.”
Blessing the Children, by Jorge Cocco Santangelo
Moomon
“Kam riai n ataia bwa kam riai ni karekea aia atatai ami bakatibu, ma n rairinanomi man ami bure ni kabane ma buakakami, ma ni kakoaua Iesu Kristo, bwa bon ngaia Natin te Atua, ao e tiringaki irouia Iutaia, ao man mwaakan te Tama ao e a tia ni manga kateirakeaki, are e a tia iai ni karekea te tokanikai iaon te rua ni mate; ao e kabwautaki naba weten te mate irouna.
“Ao e kakoroa bukin mangautiia maate, are a na kateirakeaki iai aomata bwa a na tei imatan ana kaintekateka ni motikitaeka.
“Ao e a tia ni kakoroa bukin kaboakin te aonaba, n te aro are iai ae e kuneaki n aki bure imatana n te bong ni motikitaeka e na bon anganaki te kona ni maeka ma te Atua n Ueana, bwa e na anenea kamoamoana n aki totoki ma taan anene i karawa, nakon te Tama, ao nakon te Nati, ao nakon te Tamnei ae Raoiroi, are bon temanna te Atua, n te aro ni kakukurei ae aki totoki.”