E Kakawaki Riki Nakon te Burenibai ae te Tirewa
Sylvie Houmeau
Quebec, Canada
Kamataataa n te tamnei iroun Emily Lui
Ngke I tuangaki bwa n na kaira te marooro n te Bootaki n Aine iaon ana kakao te Tia Kamaiu ni kakamwarakeaia Ana tiibu, I iangoia bwa ngkana I tangiria ni kaungaia aine, n na riai ni karaoa te bwai teuana ibukin temanna Ana tiibu.
I kaunga nanou ao I kaoa te aine temanna ae aki bati ni kakaonimaki bwa e na roko nakon te Bootaki n Aine bwa raou. E kariaia au kakao ao ti karekea ara tai ae rangin ni kakukurei. I namakinna bwa aio te katooto ae tamaroa, ao e rangin n ingainga nanou ni kan tibwaua te bwai ae I a tia n rinanona. Ma e rawata riki te bwai ae na reireinai te Uea.
N te moaningabong teuana ngke I karin au kunnikai, I kunea bwa au burenibai ae te tirewa e bua. I anganaki te burenibai aei bwa te bwaintangira n au koronririki ngke I nako Buranti, ngaia ae iai nanona ae kakawaki irou. I moanna ni kakaea n te tabo ae na kona ni mena iai, ma I aki kona ni kunea. Ngkanne I bon titirakinai bwa ngkana I bon tararo raoi, ao n na kona ni kunea au burenibai n te tai ae waekoa.
Imwiin ae I tataro ao I taratara nako ni kakaea. Ibukin uoua te bong I tataro ma nanou ae korakora ao ni kakaaea n taabo ni kabane. I tang nakon Tamara are i Karawa bwa e na buokai ni kakaea, ma I teimatoa n aki kunea. I namakina te nanokawaki ae korakora ibukina bwa te burenibai aei e rangi ni kakawaki nakoiu.
N te tairiki teuana natiu te mwaane e tataro ma ngai irarikin au kainiwene. Imwiin ara tataro, e tabekarake te bwai teuana ao e anganai. Bon au burenibai! E a tia ni kunea iaan te kainiwene. I a tia n aki noria n au tai ni kakaae. I takarua ma te kukurei bwa e a reke.
N te tai ae aki maan, e roko irou te namakin: “Ko tataro ibukiia am aine ma nanom ni koaua n te Ekaretia? A kakawaki nakoim n aron am burenibai? Ao a kanga aroia aine aika tiaki kaain te Ekaretia? Ko tataro naba ibukiia?”
Ngke I tibwaua te bwai ae riki nakon au burenibai ae bua n te Bootaki n Aine, ti karekea te marooro ae moan te tikiraoi. I tuangiia aine bwa I a tia n reiakinna ae ngkana e tuangiira te Tia Kamaiu bwa ti na kamwarakeia Ana tiibu, ti riai n uringnga ae “e korakora kakawakia aomata imatan te Atua” (Reirei ao Berita Aika Tabu 18:10). E tangiriira bwa ti na iangoia naake irarikira ao n tangiria, tararuaia, ao n tataro ma korakorara ni kabane ibukiia. Ngkana ti karaoia, ti na kunea bwa aomata ni kabane a kakawaki riki nakon te burenibai te tirewa.