Ana Ekaretia Iesu Kristo E Kaokaki!

Imwain rokora n te aonaaba, ti maeka ma ara Karo ake i Karawa. A tangiriira! Iai ana baire ae tamaroa Tamara are i Karawa ibukira. Ti na roko nakon te aonaba bwa ti aonga ni karekea rabwatara ao n reirei man rikirake. Ngkanne ti kona n oki nakon mwengara i karawa. Ma ti aki kona n karaoia ibon iroura. Ti na kainnanoa te ibuobuoki.

Tamara are i Karawa e rinea tarira ma mwanera are te karimoa, Iesu Kristo, bwa e na roko nakon te aonaaba ni buokira. Iesu e kaota nakoira aron tangiraia tabeman ao touan mwin ana tua Tamara are i Karawa. E rineia Abotoro bwa a na kaira Ana Ekaretia.

Imwina Iesu e maraki ibukira n te Onaroka i Ketetemwane. E namakina ni kabane marakira ma nanokawakira. E mate ibukira iaon te kaibangaki. Ibukin aei, ti kona n nako Ina ngkana ti maraki ke ti nanonokawaki ke ti kainnanoa te ibuobuoki. Ti kona n raira nanora ngkana ti karaoa te kairua.

N te katenibong imwin maten Iesu, E bon mangauti. E a manga maiu riki Iesu! Ibukin aei, ti na mangauti naba. Ti kona ni manga maeka i karawa imwin matera.

Imwin Mangautina, Iesu e kawaria Ana reirei i Ierutarem ao i Amerika. E tuangia Ana Abotoro bwa a na reitinako n reireinia aomata taekan Ana euangkerio. E mwaiti aomata ake a ongora irouia Abotoro a bwabetitoaki man kaaina te Ekaretia.

Imwin mateia Abotoro, aomata a moanna n mwaninga tabeua mwakoron ana euangkerio Iesu aika kakaawaki. A toki ni kakoaua bwa Tamara are i Karawa e teimatoa naba ni kairiia Natina i aon te aba. A mwaninga bwa aomata ni kabane i aonaba e na reke aia tai ni bwabetitoaki. A toki ni kakoaua bwa burabeti ma abotoro a na teimatoa ni kaira te Ekaretia.

E mwaiti ririki aika a nako. N tokina, e roko tain kaokan mwakoron ana euangkeiro Iesu are a bua. Ai bon tain manga kaokan Ana Ekaretia! Tamara are i Karawa e kainnanoa temanna bwa e na riki bwa te burabeti ao ni kaoka aei nako aon te aba. E rinea te ataeinimwane ae arana Iotebwa Timiti.

Te bong teuana, Iotebwa e wareware n te Baibara. N Iakobo 1:5, e taekinna bwa Tamara are i Karawa e na kaekai ara titiraki ngkana ti bubuti ma te onimaki. Bon iai ana titiraki Iotebwa! E ataia bwa e na mwaiti te aro ake a na reirei taekan Iesu. Ma e tangiria ni kan ataia bwa e ngaa iai ae aiaron ana Ekaretia Iesu n te Nu Tetemanti.

Ni moaningabongin te tiburing n tain te Itita, Iotebwa e nakon te buakonikai are uakaan ma mweengana. E katorobubua man waaki n tataro. Imwina Iotebwa e namakina te maaku. Tatan e kataia ni kabwara nanona. Ma e reitinako n tataro Iotebwa ma korakorana ni kabane.

Imwina e ruo rikaki te oota ae tamaroa. Iotebwa e nora Tamara are i Karawa ao Iesu Kristo. E aranaki aio bwa te Moan Kaotioti. A taekinna bwa ana Ekaretia Iesu bon akea i aon te aba. Ma e na roko n te tai ae aki maan. E a moanaki Kaokan Bwai!

Tamara are i Karawa e kanakoia anera ni kaoki mwakoron te euangkerio aika a kakaawaki. Te anera Moronaai e angan Iotebwa bwaatua koora bwa e aonga ni karekea Ana Boki Moomon n buokira n reiakina taekan Iesu Kristo.

Ioane te Tia Bwabetito e kaoka te Nakoanibonga ae te Aaron bwa ti aonga ni kona ni bwabetitoaki. Betero, Iakobo, ao Ioane a kaoka te Nakoanibonga ae te Merekitereka bwa ti aonga ni kona ni karekea te Tamnei ae Raoiroi ao ni karekei kakabwaia ngkana ti aoraki.

Eria e roko bwa ti aonga ni kona ni kabaeaki ma ara utu n te tembora.

E kateaki Ana Ekaretia Iesu Kristo Ibukiia Aika Itiaki ni Boong aika Kaitira. Nanona bwa ana Ekaretia Iesu e a roko i aon te aba! Bwai ni kabane aikai bon mwakoron Kaokan Bwai.

Kaokakin te euangkerio e reitinako n te bong aei. Burabeti, abotoro, mitinare, ao membwa a tibwaua te rongorongo ae tamaroa ibukin Iesu Kristo ni kabuta te aonaaba. Tembora a kateaki n aaba aika a mwaiti bwa aonga aomata ni kona ni kabaeaki ma aia utu n aki toki. Ao te Ekaretia e buokiia aomata n tabo ike e bati iai te baki ke te kaangaanga.

Aomata ni bane a kona ni karaoa te bwai teuana ni buoka Kaokan Bwai. Ko kona n ibuobuoki man kakaean rikim ao karaoan bwabetito n te tembora. Ko kona n anga te kabwianibwai ni katei tabo n taromauri ao tembora. Ko kona n anga te angabwai n aki mamatam ni buokiia aomata ake a kainnano. Ko kona n tuangiia aomata taekan Iesu Kristo.

Iesu e anganiira Ana Ekaretia ni buokira n okira mweengara i karawa. Ti kona n anaa te toa ao n uringnga n tainako are E karaoia ibukira. Ti kona n kaota te tangira nakoia tabeman, n aron are E karaoia. Ti kona ni buokiia aomata ni kabane n reiakina taeka Ana euangkerio! ●

Kamataata n te korotamnei iroun Apryl Stott