Mwakuri n Ibuobuoki rinanon Maungatabu ni Kabuta

Ma taeka aika kaunganano, katein utu, ao reirei mairouia Ana toro te Uea, te maungatabu ni kabuta e anganira kawai aika bati n ibuobuoki—imwain, inanon tain, ao imwin wiikin te maungatabu ni kabuta are bon te wikeen!

Ngkai taan reirei n te katauraoi n mitinare, Susie ao Tom Mullen a teimatoa n kakaewenakoia kaain aia kiraati bwa a na kaoa temanna n matakuakina te maungatabu ni kabuta.

“Kaoan temanna bwa e na karaoa te mwioko bon iteran te mwakuri ni mitinare ae kakaawaki, ao e koaua naba ibukin te mwakuri n ibuobuoki,” e taekinna. “Ara ataei a reitinako n ribooti nakoira bwa e uara karaoan aei irouia ao ibukia naba aomata ake a kaoiia.”

Aikai tabeua kawai ake a ribootin ataei n aia ibuobuoki:

“Ti buoka temanna raoraora are iai ana kaangaanga are e mena inanona. Ti kaoia bwa e na ongora nakon te maungatabu ni kabuta ibukin kaeka. Ngke ti kawaria imwin te maungatabu ni kabuta, e tuangira bwa e ongo iango aika bati ake a na ibuobuoki.”
“Ti karaoa te bootaki imwin te maungatabu ni kabuta ao a bane n uoti uotaia n tibwatibwai. E bon rangi ni kaunga ngaia are ti motikia bwa ti na manga karaoia riki.”
“I kaoa temanna raoraou bwa e na matakuakina te maungatabu ni kabuta irarikiu. Ngke ti maroorokinna, ti motikia bwa ti na buti nakon te tabo n taromauri n tuoia ngkana ti kona n mataku iai ikekei. Ti karaoa aei, ao e bon nang tamaroa rokora ikekei!”

N aron ae a reikinna Mullens ao aia ataei, e bati te kawai n ibuobuoki rinanon te maungatabu ni kabuta. Bon te kawai ae tamaroa n tibwauai taeka aika kaunganano, katein utu, marooro aika tamaroa, ao aia reirei Ana toro te Uea!

Kaoiia Tabeman nakon Mwengam

“Te Tia Kamaiu e tua nakoia Ana reirei ‘kam na i tangitangiri; n ai arou ngkai I tangiringkami’ (Ioane 13:34). Ngaia are ti taraa aron Ana tangiria ibukira. … Ngkana ti karikia Ngaia bwa ara banna, ti riai n tainako n kataia n taben nanoia n tangiria aomata ni bane.” —Beretitenti Dallin H. Oaks¹

Tabeua ririki n nako ara tia kakawari ae Mike e noria bwa natiu tenimai aika uarereke ao ngai iai ti teuana ara laptop ae uarereke bwa ti mataku iai n te maungatabu ni kabuta. N te tai ae tawe e kaoira nakon ana auti bwa ti na mataku ma ngaia ao kainnabana, ae Jackie, n taekinna bwa a na bon rangi ni kukurei n raonaki. Natiu a bon rangi ni ingainga n matakuakina te maungatabu ni kabuta iaon te TV; I rangi ni kakaitau n te boutoka aei; ao ti kakatonga n ara tai.

Imwiin anne, te ikotaki n matakuakina te maungatabu ni kabuta e a riki bwa kateira. E ngae ngke e a bon reke oin ara TV, ti teimatoa ni kukurei ni kawariia Mike ao Jackie ma uningara, ara boki, ao kanara ibukin te maungatabu ni kabuta. Ongoraeakinan aia taeka burabeti n ikotaki e karikia bwa e na onoti. Ti riki bwa kanga utu. Mike ao Jackie a riki bwa tabeman mairouia raoraou aika tangiraki ao tibuia natiu. Aia tangira ao aia iraorao e riki bwa te kakabwaia ae tamaroa nakon ara utu. I rangi ni kakaitau ibukin nanoia ni butimwaeara nakon mweengaia ao nanoia nakoira.

Suzanne Erd, California, USA

Reirei aika a na Iangoaki

“Noria”

Te Tia Kamaiu ma te tangira e anaa te tai n tarai kainnanoia tabeman ao imwina e mwakuri n tobwai kainnano akanne (taraa Mataio 9:35–36; Ioane 6:5; 19:26–27). Ti kona ni karaoa ae aekan anne.

“Kaoaki ngkekei naba”

Ngke ti nora kainnanoia tabeman ake ti buokiia, te mwaneka are imwina bon mwakuriana.“Ongoraean aia taeka burabeti”

Ti riai n “aki toki ni bootaki” (Moronaai 6:5) n uaia n reirei, n uaia n rikirake, ao n marooroakin baika a tabu ake a bongana nakon tamneira.

“Mai, ongora nakon bwanaan te burabeti”² tao bon teuana te kakao ae rangi ni kakaawaki are ti kona n angania naake ti buokiia.

“Te tangira ao te iraorao”

Ni buokia raoi man bitiia aomata, ti riai n karekea te reitaki ma te tangira ao te “tangira ae aki kewe” (taraa Reirei ao Berita aika Tabu 121:41).

Tibwauaia iaon te intanete

“Bwai n reitaki n te intanete bon bwai ni mwakuri aika tabangaki ake a kona n rootia aomata n tatabemaniia ao utu n te ware ae mwaiti n ae onoti man tamaroa. Ao I kakoaua bwa e a roko te tai ibukira ngkai ana reirei Kristo ni kabonganai bwai ni mwakuri aika tamaroa n ae riai ni katurua kakoauan te Atua te Tama ae Akea tokina, Ana baire ni kakukurei ibukiia natina, ao Natina, Iesu Kristo, bwa te Tia Kamaiua te aonaaba.” —Unimwane David A. Bednar³

Te intanete e anganiira te kona n tibwaua te euangkerio ma te aonaaba ae bwanin. I tangira anne! I tibwauai iai tabeua mwakuri ni kauring ibukin te maungatabu ni kabuta, ma n angin te tai I kataia n buokiia tabeman ni waakin marooro iaon marooro n te maungatabu ni kabuta. Noran titiraki mai irouia tabeman n angin te tai e buokira n nori bwai n taraana ae boou ao e kona n riki bwa buokan oin ara titiraki aika a na marooroakinaki.

I a tia n kunea bwa ngkana ko kabonganai titiraki n marooroakin marooron te maungatabu ni kabuta ma utu ake ko buokiia, e buokiko n nori korakoraia ao kainnanoia naba. Teuana maibuakon au titiraki ae mamate nanou iai bon, Tera te botoniango ae ko namakinna man te tetere n te maungatabu ni kabuta?

Te kaeka e kuri n katoa te tai n kairiko n noria bwa tera ae riki ni maiuia ao tera ae kakaawaki irouia. E anganiko te kona n riki bwa te tari ke te titita n ibuobuoki ae tamaroa riki ibukina bwa ko kinaia riki.

Camille Gillham, Colorado, USA

Reirei aika a na Iangoaki

“Tibwaua te euangkerio”

Ti a tia ni berita bwa ti na “tei bwa taan kakoaua ibukin te Atua n taainako ao ni bwaai nako, ao n taabo nako”(Motiaea 18:9).

“Waakina te marooro”

Marooro n te maungatabu ni kabuta e kona n kaungai marooro aika tamaroa, irekereke, ao man tabu. Ao marooro aekakin aikai e kona n kakorakorai reitaki, e buoka rikiraken am koaua, ao e uota te kimwareirei nakoim! (taraa Reirei ao Berita aika Tabu 50:22).

“Kabonganai titiraki”

“Titiraki aika raoiroi a kona n buokiko n oota n atai nanoia, aia tabeaianga, ke aia titiraki tabeman. A kona n katamaroa am anga reirei, n kaota te Tamnei, man buokika tabeman n reirei.”⁴