E kanga Iotebwa Timiti n raira Ana Boki Moomon?
Imwain karabaan bwaatua koora, Moronaai, te kabanea n burabeti n Ana Boki Moomon, e korea iaon atuun te iteraniba bwa te boki aei e na rairaki “n ana bwai n tituaraoi ma mwaakan te Atua.” Aio e tiku bwa te kabwarabwara ae tamaroa ibukin rairan Ana Boki Moomon.
Iotebwa Timiti e taekin taeka ake a rairaki nakoia taan koroboki, angin te tai bon Oliver Cowdery. Ibukina bwa Iotebwa e raira te taetae ae bon aki ataia, e riai ni katan iroun te Uea. Teuana te kawai are e ibuobuoki iai te Uea bon katauraoan bwai n mwakuri aika iai rabwataia n buoka Iotebwa n te raitaeka. Taan kakoaua a taku bwa Iotebwa e taratara rinanon bwai n mwakuri aikai ao taeka a kaoti nakoina n Ingiriti. Bwai n raitaeka aikai bon “taan raitaeka” ke te “Urim ao Tamim”—uoua atibu aika a itiaki ake a bae nakon te biti bwa e aonga Iotebwa ni kona n taratara mai iai. Aikai e anganaki Iotebwa n ikotaki ma bwaatua. Teuana riki te bwai ni mwakuri are kabongana Iotebwa bon te “atibu ni mamata” are ngkana e tarai, n angin te tai e mena i nanon te bwara. E kunea te atibu aei mai mwaina ao e kabongana n kakaei bwai aika a karabaki ao aika bua. E kabonganai bwain raitaeka ao te atibu ni mamata n rairairi, n onimakina n tainako ana kairiiri karawa.
Rairan Ana Boki Moomon bon te kakai raoi ao e karaoaki “n ana bwai n tituaraoi ao mwaakan te Atua.”