Kakorakora Am Onimaki Rinanon te Moan Kaotioti
I tataro bwa ko na ira ana kawai Iotebwa n tataro, reiakin koaua ae e reiakin, ao kakorakora am onimaki iroun Tamara are i Karawa ao iroun Natina, Iesu Kristo.
Ngke 16 au ririki ni MAEU, I mwananga man mweengau i Idaho nakon te maungatabu are e karaoaki i East Coast kaawan Amerika, are ea iraki irouia kairake n ataeinimwaane ao n ataeinnaine man aban Amerika aika 50 ao taabo riki ae kaaniia 40. Mai imwaaina, e kangaanga irou bwa N na mena inanon waaki are ngaia au koaua ma au iango a kaokoroai ma tabemwaang.
N te tairiki teuana n tain te bootaki ni iraorao, te maroro e mwemwe iaon ana koaua ma waaki ake e kakaraoaki n Ana Ekaretia Iesu Kristo Ibukiia Aika Itiaki ni Boong aika Kaitira. Ataein te kurubu n reirei aika a mwaiti a bon katikaki naba nanoia nakoiu ao ni waakina aia titiraki, tabeua mai ibuakona a bon aki raoiroi ibukin ara koaua.
Anne ae I aki tauraoi iai. Ma ngke ia tia ni iango tabeua te tai, Ia waaki n tibwaua tabeua moan tua n te Euangkerio. I kabwarabwara ae iai Tamara are i Karawa, are ngaira natina mwaane ao aine, ao ti roko n te aonaaba aio bwa tina karikirakea ara onimaki iroun Iesu Kristo ao ni kaotiira man rinean te raoiroi man te buakaka.
Tibwauaan moan tua aikai ao ea kairai nakon ana koaua Iotebwa Timiti. Ataei tabeman a aki titiraki ibukin Iotebwa Timiti, ma I kunea bwa ngaia I a roko n oina are bukin tera i kakouaa te bwai ae i kakoauaa. Ngke i tuangiia kaotin te Tama ao te nati n te buakonikai ae tabu, ni kabane ngaiia a bon aki kakarongoa. E korakora te namakin ae tabu are e a roko n te ruu, ao te namakin ae korakora ni mwaakan te tamnei are ea ruo iaou ma au maroro.
Imwiina, angiia ataei a karabwaai ibukin au koaua ae korakora. Tabeman a titiraki ibukin riki rongorongon te Ekaretia. Ngke I a oki rikaaki nakon au ruu n te tairiki anne, I kunea bwa te aomata are rinanon te bitaki ae korakora bon ngai. I a tia n namakinna i bon irou mwaakan te kaoti koaua iaon te Atua te Tama, Iesu Kristo, ao te Moan Kaotioti.
Man rinanoan aio 50 te ririki n nako, ao I a tia n kakoaua tebubua te tai iaon te Tama, te Nati, ao te Burabeti Iotebwa Timiti. N taneiai aikai, I teimatoa n namakina te kakoaua ae nene ibukin te Tamnei ae Raoiroi.
I kukurei n tibwauaa nimaua moan tua are I a tia n reiakinii man ootau ae raoiroi iaon te Moan Kaotioti. Moan tua aikai ake a kakorakora au onimaki iroun ao nanou ni kan irira Tamara are i Karawa ao Natina ae tatangiraki. I kantaninga bwa a kakorakorako naba.
1. Te Tama, te Nati, ao te Tamnei ae Raoiroi bon Aomata aika a Kaokoro
N tienture aika a nako, ataein te reirei n te aro ao taan kamatebwaia taekan te aro a kauntaeka aron te Atua te Tama, Iesu Kristo, ao te Tamnei ae Raoiroi. A rawata aika a kakoaua ae ti temanna ngaiia. Ibukin te bwai are e rinanona Iotebwa inanon te buakonikai ae tabu n 200 te ririki n nako, ti ataa iai te koaua ibukin aron te Uea.
Te moan ni bwai, E maiu! Te kauoua, te Tama ao te Nati a bon kaokoro, mimitong, aomata aika a tia ni manga uti, a rianako aroia ibon irouia. Imwiina Iotebwa e reiakinna bwa te Tamnei ae Raoiroi akea rabwatana ae te iriko ao te rii, ma bon te aomata ae te Tamnei. Ngkana tiaki, te Tamnei ae Raoiroi e aki kona ni maeka inanora” (Reirei ao Berita Aika Tabu 130:22).
2. Ngaira Natin te Atua Mwaane ao Aine
Rinanon te Moan Kaotioti ao bwaai riki ake e rinanoi, te Burabeti Iotebwa Timiti ea tia n reiakinna bwa mwaakana e aki tii karika te aonaaba ao bwaina nako ao e a mwaninga naba taekaia. Te koaua raoi bwa, ngaira aikai bon naati aine aika a tangiraki “ [ke naati mwaane] irouia ara karo ake i karawa.”1
Te Katanoata nakon te Aonaaba e taekinna: “Ni kabane aomata—mwaane ao aine—a karikaki ni katotongan te Atua. Ni kabane bon naati mwaane ao aine aika tamnei irouia ara karo ake i karawa, ao, n aron anne, iai aroia n te aro n atua ao tokin kawaia.”2 Tamara e bon kamataata ni katanoata te kawai anne: “Bon aio au mwakuri ao mimitongiu—ni karekea te aki mamate ao te maiu ae akea tokina ibukin te aomata” (Mote 1:39).
Bwanaara n aomata e roko mai iroun te Atua, ao ti roko n te aonaaba aio bwa ti na karikirakeira n ai Arona. Te kamatata man te Moan Kaotioti aio e kariaiakai ngai te kairake n ataeinimwaane bwa ia ataia bwa iai oin Tamau are i Karawa ae tangirai ao e tangirai naba bwa N na okirikaaki nakoina.
3. A Kona ni Kabwaraaki ara Bure
Teuana mai ibuakon ana raraoma ae e abwabwaki Iotebwa bon kabwaraakin ana bure. Teuana te rongorongo inanon te Moan Kaotioti, te Uea e taetae nakon Iotebwa Timiti te kairake ae ukoukora te koaua ma taeka aikai: “Iotebwa, natiu, a kabwaraaki am bure. Nako ni kawaim, waaki inanon au tua, ao kawakin au tua. Noria, ngai Uean te mimitong. I tauraki ibukin te aonaaba, bwa ni kabane ake a kakoaua arau a na karekea te maiu ae akea tokina.”3
E reiakinna Iotebwa bwa rinanon ana Mwakuri ni Kamaiu Iesu Kristo, e kona ni kabwaraaki ana bure ao e kaitiakaki ao e kororaoi ni kaineti ma ana tua te Atua. E anganaki te atatai ae koaua bwa Iesu Kristo e katoka Iaona aia bure ao rawawataia ni kabane naake a tia ni maeka iaon te aba ao ake a na roko ni maeka iaon te aba.
Man te Moan Kaotioti, ti reiakinna bwa ibukin ana akoi te Tia Kamaiu, Iesu Kristo, a kona naba ngaira ni kabwaraki ara bure ao n te bong teuana ti na tei n itiaki imatan te Tama.
4. Tamara are i Karawa E Ongo ao E Kaekai Ara Tataro
N te buakonikai n te bong anne n te 1820, e reiakinna Iotebwa bwa e ongo ao e kaekai ara tataro Tamara are i Karawa. Imwiina, e taku Iotebwa, “I bon kakoaua raoi bwa N na karekea te kaotioti mai iroun te Atua, n aron are I a tia ni karekea mai mwaina” (Iotebwa Timiti—Rongorongo 1:29). Ana banna ni katooto e reireiniira ae ti kona n nakon Tamara are i Karawa n te tataro ni karekei oin ara kaeka.
E kaokioka te baeten aei Iotebwa n te tataro n te tai ae maan. Iai ana onimaki bwa e na ongo ao e na kaekai ana tataro te Uea. E tataro ibukin bwaai aika ko a tia n tataro ibukiia.
E tataro ibukin te wanawana (taraa Iotebwa Timiti—Rongorongo 1:12–13).
E tataro ibukin te bwabetito (taraa Iotebwa Timiti—Rongorongo 1:68).
E tataro ibukin te kamaiuaki (taraa Reirei ao Berita Aika Tabu 121:1–4).
E tataro ibukiia mitinare (taraa Reirei ao Berita Aika Tabu 109:22).
E tataro ibukin te Ekaretia, kaaina, ao ana taan kairiiri (taraa Reirei ao Berita Aika Tabu 109:71–76).
Ao e tataro ibukin ana utu (taraa Reirei ao Berita Aika Tabu 109:68–69).
Aio te baeten ibukira. E kaotia Iotebwa nakoira bwa ti kona n nakon Tamara n te tataro.
5. Te Tama ao Natina A Kinaira
Man te Moan Kaotioti, ti reiakinna bwa Aomata n te tiretio aikai a kinaira, n aron naba are a kina Iotebwa. Te Tama e wetea Iotebwa n arana ao, “ni kotea are temanna,” n taku, “Aio Natiu ae Tangiraki. Ongo Irouna!” (Iotebwa Timiti—Rongorongo 1:17).
TeTama ao te Nati a ataa kainnanon, raraoman, ao nanon Iotebwa Timiti, n aron ae A ataia iroura. A atai naba kukureira ao nanokawakira.
N au tai ni kairake, I tataro ibukin bwaai aika a mwaiti. Ngke I uringa kairakeu ngkai, tabeua mai ibuakon bwaai aikanne a taraa n aki rangi ni kakaawaki. Ma a kakawaki irou, ao I ataia man te roro anne bwa iai Tamara are i Karawa ae kakauongo nakoiu. I aki karekea te kaeka n te tai ae waekoa, ma I nanakinna bwa n oin Ana tai ao ni bon oin Ana kawai E na kaeka au tataro n te kawai are e bon eti ibukiu.
Karekea te koaua ao te onimaki ae e na taetae te Atua nakoim. Kakoauai namakin aikanne aika a roko n nene inanom. I a onimakina te tataro ao n ataa mwakana ibukina bwa I atai ana atatai te Burabeti Iotebwa Timiti. I ataia bwa e ata arau te Atua ao E na kaekaai, n aron naba ae ataa aram ao e na kaekako.
Koaua
Ibukin mwaitin au ririki ae 68 ae I a tia ni maeka iai iaon te aba, I a tia n tataro n aron Iotebwa. N aroia ana reirei te Tia Kamaiu, I a tia naba ni karekei kaeka mai i karawa. I ataia bwa Iesu bon te Kristo. Ngaia bon Natin te Atua. E tia ni manga kautaki ao e maiu n te bong aei. Iai mwakana ni kabwarai ara bure. Rinanon ara onimaki, ongotaeka, ao te rairannano, E kona ni uotiira nakon mwengara i karawa.
N tabeu ae ana Abotoro te Uea Iesu Kristo ao ngkai Ana tia kakoaua ae e a tia ni katabuaki, I kakoaua ma te koaua ao te onimaki ae kamatoaki iroun te Tamnei ae Raoiroi ae a kaoti te Tama ao te Nati nakon Iotebwa Timiti n te Buakonikai ae Tabu. I tataro bwa ko na ira ana kawai Iotebwa n tataro, reiakin koaua ae e reiakin, ao kakorakora am onimaki iroun Tamara are i Karawa ao iroun Natina, Iesu Kristo.
Kamataata n te tamnei iroun David Malan
Kamataata n te tamnei iroun Kendall Ray Johnson