Te Taxi, te ataeinimwaane ae ataeintereirei, ao Kaekaakin te Tataro
E maeka te tia korokaraki i Rivers State, Nigeria.
Iai te wirikiriki bwa e na reke iroura te mmwaane aei, ma e aera e tuai man reke?
N te bong teuana toau n au mition ao ngai ti anganaki te aomata ae ti na reireinna are maeka n te kaawa ae Tema, irarikin te kaawa ae tamaroa are Accra, Ghana. E aki rangi n eti nambwan taian auti n te kaawa aei, ngaia are ti anganaki te kabwarabwara are e na buokira n kakaea te auti.
Ngke ti roko n te kaawa, ti irii kaetieti ma e aki reke teuaei ibukina bwa e taraa n mwaiti auti ake a booraoi ma te kabwarabwara arei. Ti namakina te mengomengo, ti motikia bwa ti na karebwerebwe iaon mataroan auti n titiraki, ma e taraa n akea ae kinaa te mmwaane are ti kakaea. E roko irou te wirikiriki n butiia Tamara are i Karawa bwa e na buokiira.
Imwin ara tataro, iai au namakin bwa e na reke te mmwaane are ti kakaea, ngaia are ti kabanea korakorara ni kakaea. Ma, e bon aki reke iroura. Ti a kua ao ti motikia bwa ti nang oki nakon ara tabo ni mwakuri ibukina bwa iai riki ara reirei ake tabeua. Ngke ti roko n te tabo n taxi, te turaiwa n te taxi are e uotira nakon te kaawa e nora te aki kukurei iaon moara ao e titiraki ngkana e reke ara aomata are ti kakaea. Ao eang, ara kaeka bon, e aki.
E tuangira bwa ti na nakon te reirei are mena n te koona ao n titiraki ikekei. Ti tuangnga bwa anne tiaki te kabwarabwara are ti anganaki, ma e kamatoa. Ti otinako man te taxi ao n nakon te reirei—tiaki ibukina bwa iroura e na reke ara aomata, ma e aonga n rau nanon raoraora are e tabeaianga.
Ngke ti waakina mwanangara nakon aobitin te reirei, temanna te ataeinimwaane e biri ni kaeinetiira. E moangare ao e tuangira bwa ngaia ao tarina bon ti kaain Ana Ekaretia Iesu Kristo Ibukiia Aika A Itiaki ni Boong aika Kaitira aika a maeka n te tabo aei ao e kona n buokiira.
Toau ao ngai ti itaramata ma te miimi. Bon te kakai. Te ataeinimwane e buokiira ni kakaea teuare ti kakaea, ao n tokin te tai e butimwaea te euangkerio ao e bwabetitoaki.
Te karaki aei e reireinai bwa Tamara are i Karawa e kaekai ara tataro n Oin ana tai ao n oin Ana kawai. Ngkana ti aki karekei kaeka n te tai ae tawe, ti kona n kammwakura ara onimaki irouna ao n tataona nanora.
Kamataataan te Tamnei iroun Corey Egbert