Te Mannikiba ae Uarereke E Kauringai

Laura Linton

Utah, USA

Kamatataan te tamnei iroun Carolyn Vibbert

Bon 26 au ririki ngke kainnabau ao ngai e mate moan natira. Kennedy e kuneaki aorakina bwa e kaentia kaburorona ngke ai tibwa 13 ana namwakaina. Imwin teniua te korokoro, nimaua te tai n chemotherapy, ao bwainnaoraki ma katoki aoraki aika a mwaiti, e motirawa i nanon baira ngke 20 ana namwakaina.

E uruaki nanou ni buan natiu ae botonnaine, e kan atatai, man kakammwakuri. E kanga n riki aio? N na kanga n karekea te rau? E bati au titiraki, ao akea kaekaaia. Uoua te bong imwin te taunimate, kainnabau ao ngai ti kawara ruanmatena, ma uee aika binke iaon ao taian reeben man te taunimate.

Ngke I tabe n iangoa natiu, I nora te mannikiba ae uarereke, ae tuai roro ni kiba, ni kibakiba iaon te uteute. Te mannikiba aio e kauringai Kennedy ibukina bwa e tatangiriia maan. Te mannikiba e kibakiba nakon ruanimatena ao e takakaro ma reeben ao taian uee. I moangare, n ataia bwa aio raoi are e na bon tangiria Kennedy. Te mannikiba e kibakiba ni kaeinetai. I aki teroko ni mwaing. Te mannikiba ae uarereke aei e kibakiba nako rarikiu, n rara waeu, e kamaki matana, ao e matu.

E kaangaanga irou kabwarabwaran namakin ake I namakin n te tai anne. Kanga I namakinna ae e inga nakoiu Kennedy. I aki kona n inga ma natiu, ma te mannikiba aei—are ana karikibwai Tamara are i Karawa—e kona n roko ao n kawenea atuna ae uarereke irou, ni kauringai bwa Tamara are i Karawa e ataa marakiu ao e na teimatoa ni mena irarikiu ni karaua nanou ao ni buokai rinanon te kataaki aio.

E taku Unimwane David A. Bednar man aia Kooram Abotoro ake Tengaun ma Uoman, “Ngkana taeka a aki kona n anga te rau are ti kainnanoia … , ngkana tobwaan kaangaanga ao te iango akea aia kabwarabwara ibukin ana aki momotiraoi ao kaangaangan te maiu, … ni koauana ti kakabwaiaki n ana nanoanga te Uea” (“Ana Nanoanga te Uea,” Riaona, Meei 2005, 100).

E bon tuai reke kaekan au titiraki ni kabane, ma te nanoanga e anganai te rau bwa Kennedy ao Ngai ti uaia n tangiraki iroun Tamara are i Karawa ao bwa rinanon ana angakarea ni kamaiu Natina, Iesu Kristo, Iai au kantaninga bwa Kennedy, kainnabau, ao ngai ti na manga ikotaki bwa te utu.