Ti aika a maiu man te Iti
A Tineiko Bwaai ake Ko Kakaraoi Rimoa?
Te Tia Kamaiu e a tia ni kabomwi. Anaa Baina ao teimatoa ni waaki nako.
Tabeua te tai n nako, au bitiobi e kaoia kain ara uoote bwa a na iangoi tabeua kabwaka ke buure ake ti kona ni katamneia ni katikui iaon taiboran te toa ibukin Iesu Kristo ake e na uotinako. Iai buure aika I a tia n uouoti rinanon maiu ni kairake are I a tia ni kataia n tokanikai iaona ma I tuai kona n tokanikai rinanon te tataro ke n oin au kona. Ni kaitaraa aron rikirakeu rinanon ririki, I ataia bwa I riai n tokanikai iaoia bwa N na kona n reitinako ni waakinako.
Te Tabati imwiin ana kakaewenako te bitiobi, I baireia bwa N na katuka teuana man au bure iaon te taibora n toa, te bwai are e na tei ibukin te Tia Kamaiu ao ana mwakuri ni kamaiu. Ngke I katauraoi n ana te toa, I uringnga bwa te kunnikai are rabunana e tei ibukin Rabunana ngke E mate, ao te kariki ma te ran e tei ibukin rabwatana ao rarana.
Ma te karinerine ao te kantaninga ae bwanin inanou, I kaboua au berita n te bwabetito ao n taekina au tataro inanou, ni butiia Tamara are i Karawa ana ibuobuoki ao ni karaoa te motinnano ni kitana au bure. Ngkanne iai te bwai ae riki are I aki kantaningaia: nanou n riinga te bure e bua. I kataia tabeua riki te tai, ao e a manga riki naba nakon au bure ake tabeua. E tara n rangi n tamaroa bwa e na kakoauaki?
Kaboraoan Au Kantaninga ma Ngaia
Te wiiki are imwiina, I ataia bwa te bure raa are I tangiria ni katikua n te taibora n toa, ma I aki namakinna bwa I tauraoi ni kanakoa. N tanrikaaki, I ataia bwa nanou e aki mena n te tabo are e riai ni mena iai. I aki tauraoi ma nanou ni motinnano nakon te bitaki. Ma I ataia bwa mwaitira marakin Tamara are i Karawa n te bure anne. I ataia bwa I riai ni kaboraoa au kantaninga ma Ana kantaninga ao ni kabotoa maiu irouna bwa N na kona ni kainaomataaki. Ngaia are I karaoa au kabanea n tamaroa bwa e na koro bukina.
I totokoi kariiri ake a kona ni kairai nakon te bure aei. I bita aron au waaki ni warekan koroboki aika a tabu ni katoa bong ao n iangoi raoi ma te koaua ao ni karaoi inanon maiu. I kabotoa n taua raoi ma nanou iaon au motinnano nakon te bitaki, ao I ukoukora ana kantaninga te Uea ni katoabong iaon au kantaninga. I karimoa moa, ibukina bwa I ataia I aki kona ni kiitana te bure aei n akea mwaakan ana Mwakuri ni Kamaiu te Tia Kamaiu. Man reitinakoan karimoakina moa, I a kona ni kanakoa te bure aei n taiboran te toa. N tokin te tai I a kainaomataaki man te bwai are e tautauai n ririki aika a bati.
Rinanon te waaki aei, I a kaan riki nakon Tamara are i Karawa ao au Tia Kamaiu. I iangoiia bwa a ruorikaaki aia taratara nakoiu inanon ririki aika a bati ma te tataonaki n nano ao te tangira—n ataia, n tokin te tai, N na bon kanakoa te bure are e tuuka rikirakeu n te maiu n tamnei. Ao ngke I a tauraoi ni kanakoi, Iesu Kristo e na mena ikekei n tabekai rake—n taua baiu ao n anganai kabwaraan au bure ao te kakorakoraaki. E a tia ni kaman katauraoa te kawai ibukiu bwa N na kainaomataaki man te bure rinanon Ana Mwakuri ni Kamaiu. E kabooi kabwakau, au kairua ao au bure. N na bon tii onimakinna.
Ko Kona ni Waaki Nako
Inanon te tai aei, I wareki tabeua ana taeka Unimwaane Richard G. Scott (1928–2015) man te Kooram n Abotoro n te Tengaun ma Uoman are e anganai te kaungaaki are I kainnanoia: “Ngkana e aki barongaaki maium ao ko namakina te aki mweengaraoi ao te aki tau … , tai raraoma. E a kaman atai rongorongon akanne ni kabane. E tataninngaiko bwa kona katorobubua ma te nanorinano ao n toui moa mwaneka tabeua. Tataro ibukin te korakora. . . . Tataro bwa ana tangira te Tia Kamaiu e na kabwaroaki inanom.”1
Ngkana ti anenea,“I Stand All Amazed” (kunau ae I tatangiria) te wiiki are imwiina, taeka nako a bane ni koaua, I bon rangi ni mimi—ni kakaitau ni bwaai ake I a tia n ininimaki ma ngaia inanon te maan ae raka iaon tebwina te ririki a uotaki nako mairou. Ni kakaitau rinanon mwaakan ana Mwakuri ni Kamaiu te Tia Kamaiu, I a kona ni waaki nako. Bwa E kona ni kamarurungi bure ni kabane ao ikoaki ao n akea mwiina ae e katikui. Bwa I riai n aki tautauaki ni bwaai aika a riki ake ngkoa.
E teimatoa ni mwaiti bwaai aika N na reiakin ao n tokanikai iaona, ma maiu e waaki nako inanon katei aika a raraoi. Ia namakina riki te kimwareirei ao te rau. Ia kakaota riki te kakaitau. Ia kaniiaki riki nakon ao kakorakorakin au kakoaua iroun Tamara are i Karawa ao te Tia Kamaiu. Ni katoa te bong are I rineia iai bwa N na kataia riki, I a roko teuana riki te mwaneka ni kaniiaki nakoIa ao te aomata are I tangiria bwa Nna katotongnga.