Kabonganaan Aran te Ekaretia ae Bwanin E Katuaraa Taekinana ma E Uaana

Iroun Lauri Ahola

Irakin ana kaetieti te burabeti e tara ni beebete, ma e bitaki nakon te mwakuri ae raka riki nakon are I kantaningaia.

Ngke e taetae Beretitenti Nelson iaon kabonganan aran te Ekaretia ae eti n Okitobwa 2018 maungatabu ni kabuta, ana rongorongo e rang n itiaki irou.“E bon tua te Uea. …

“… Kanakoan aran te Uea man aran ana Ekaretia bon te tokanikai ae korakora iroun Tatan” (“Aran te Ekaretia ae Eti,” Riaona, Nobembwa 2018, 87, 88).

I ataia bwa I riai ni manga iangoa aron au tetere n au maroro ma naake irarikiu, n raonaki ma au aomata ake I buokiia n au mwakuri ake a tia n taneiai ni weteai bwa kain te “Moomon” ao te membwa n “Te Aro ni Moomon.”

Ni motinnanoa kabongana aran te Ekaretia ae bwanin, I tataninga au tai are imwiina ni kaotia ae ngai kain Ana Ekaretia Iesu Kristo Ibukiia aika Itiaki ni Boong aika Kaitira. Ni koauana, te tai anne e roko, riki inanon tain te mwakuri. “Ngkami Moomon bon aomata aika akoi,” temanna are e kona n riki bwa au aomata e tuangai. “Eng, ko rabwa,” I kaeka. “Ngkai te membwa n ana Ekaretia Iesu Kristo ibukiia aika Itiaki ni Boong aika Kaitira, ti kakoaua bwa ngaira ni kabane bon taarira ao mwaanera.” Imwiina e reitinako te maroro ma ngaia ao ni kabane ake a maroroakina taekan aia akoi “kain te Moomon.”

E ngae ngke I a tia ni karaoa au itera n taekina aran te Ekaretia ae bwanin, I teimatoa n namakinna bwa iai te bwai ae katuara. Raoraou ao au irekereke a teimatoa n taraai bwa mwakoron “Ana Aro Moomon” ao tiaki ae te tia iriira Kristo, ni katikua bwa kain ana Ekaretia Kristo are e kaokaki.

E Uaana kaitaraan te Kangaanga?

Inanon marooro ake imwiina iaon au onimaki, I kunea bwa I kerikaaki ibukin katuaraan atongana n ae bwanin, abwakin aran te Ekaretia ao ni kaokiokia n tain te maroro anne. Aomata nako ake I taetae nakoia a taraai ni kaota moaia ae titiraki. Ao te marooro e teimatoa n tiku iaon te “Moomon.”

I kataia ni karika au reitaki bwa e na namakinaki ae kanga bon aron te marooro. Ma aio e riki bwa te kangaanga nakon are I kantaningaia, riki ma aomata ake I aki tangiria bwa a na mweengabuaka. I aki tangiria bwa N na mama ke ni kaota ae I aki tabe ibukin maiuakinan au onimaki, ma I aki naba tangiria n tara ni kamatoa ngkai aomata aikai a tia ni araranai bwa kain te “Moomon,” mai imwaina ao ngai I butimwaaia. I ongongo naba irouia membwa n te Ekaretia aika mwaiti n araniia ao ake tabeman kain te Ekaretia bwa kain te “Moomon” ni boowi aika kakaokoro ao ni bootaki tabeua.

I bon titirakinai irou ngkana kabonganaan aran te Ekaretia ae bwanin e bon rang kakaawaki nakon bwaai riki tabeua. Aomata ake a irekereke ma te “Moomon” n tokin te tai, e a tara ni butimwaeaki n aia iango aika a mwaiti—n riki bwa kain te “Moomon” e aki toki n raoiroi ibukiu. Ma ni manga rinanoan ana marooro Beretitenti Nelson, I namakina bwa aio raoi e bon rang kakaawaki, riki ngkana e karika te katuara n te marooro. Ngaia are I a manga kamatoaai riki.

Te Tai ni Kakoaua iroun Kristo

Arou imwiina Ni manga kabongana aran te Ekaretia ae bwanin, I kawara raoraou n te umwantabu n te ekaretia teuana. Temanna e roko ni kawarai ma te moangare ao e titiraki ngkana ngai kain te Moomon. “Ngai bon kain Ana Ekaretia Iesu Kristo ibukiia Aika Itiaki ni Boong aika Kaitira, eng,” I taku. E waaki n titirakinai titiraki tabeua, ni katoai titiraki e waaki man: “A kakoaua kain te Moomon …?” Ao ni katoa te tai, I waaki ni kaeka ma te kibuntaeka: “N ana Ekaretia Kristo are e kaokaki, ti kakoaua …”

Te marooro aei e reitinako n aron aei aua ke nimaua te tai. Ngke e a ataia bwa I aki butimwaea te ara “Moomon,” e titiraki ni kainetai, “Tiaki ngkoe kain te Moomon?”

Ngaia are I a titirakinna ngkana e kina bwa antai Moomon—e aki ataia. I tuangnga bwa Moomon bon te burabeti, te tia koro rongorongo, te keeno n te taanga ni buaka, ao te aomata ae irekereke ma te tua n taai akekei i Amerika. I namakina te karineaki n irekereke ma te mwaane ae e rang bane nanona ni beku ibukin te Atua ao tabeman.

“Ma,” I reitia, “Moomon e aki mate ibukin au bure. Moomon e aki wawanako raraana ibukiu ke ni korakai i Keketemwane ke ni mate iaon te kaibangaki. Moomon bon tiaki Atuau. Iesu Kristo bon Atuau ao Au Tia Kamaiu. Boni Ngaia te Tia Kabooai. Ao bon Arana are I tangiria bwa e na kinaaki ni kabanean boong, ao bon Arana are I onimakinna bwa e na kinaaki n te bong aei.”

I namakina ana kakoaua te Tamnei ni boutokaai n te kakoaua ae kimototo aei nakon au irekereke ae boou. Imwiin tabeua te teekan ni kainabwaabu, e taku, “Nanona, ngkoe te Kiritian?”

“Eng, Ngai te Kiritian,” I kaeka, “ao te membwa n ana Ekaretia Kristo ae kaokaki.”

Ukoukoran iriiran ana kaetiteti te burabeti e tara ni beebete, ma n tokin te tai e tangira te mwakuri ae raka riki nakon are I kantaningaia. I teimatoa n aki kororaoi n iriirakin bwaai ni kabane ake I tuangaki bwa N na karaoi. Ma ni bwaai aika a riki, Ngkai N na kakoaua bwa I kabongana aran te Ekaretia ae bwanin.

I kakaitau ibukin te Tamnei are I namakinna ngke I kakoaua nakoia tabeman ibukin au Tia Kamaiu ao kainakin Ana Ekaretia. Ao ngkai I a karekea te kawai ae korakora ni kakoaua ibukIna ao Ana Ekaretia are e kaokaki n te tai are I titirakinaki iai ngkana ngai kain te “Moomon.”