Savali faaleautaitai i le eria
Afai e Vala’auina Oe e le Ali’i, E Te Tula’i ea ma E Alu?
I se faatalatalanoaga faamalamalama ma Elder Quentin L. Cook o le Korama a Aposetolo e To’asefululua ia Setema 2015, na fesiligia ai ma’ua ma lo’u to’alua i ni fesili e uiga i lo ma aiga, galuega ma auaunaga faale-lotu ma fa’ale-nu’u. Sa ma manatu fo’i e tatau ona faailoa i ai o lo’o totogi lō ma fale (mokesi) ma faailoa i ai le fuafuaga maioio mo le totogiina mae’ae’a i le isi lima i le sefulu tausaga.
A’o matou faatalatalanoaina pea lea mataupu, sa nofonofo teisi Elder Cook, vaai mai i o ma mata, ma fesili mai ma le toto’a, “Afai e valaauina oe e le Alii, e te tula’i ea ma e alu?” I le atoatoa ma le fetaui lelei o le ma tali atu i le taimi lava e tasi, “Ioe o le a ma o.” Ma le agaga faamaoni a’ia’i na ia faapea mai ai, “O outou e o tagata faatuatua.”
I nai vaiaso mulimuli ane, na o’o mai ai se vala’auga e ala mai i se tasi o le Au Peresetene Sili, e ma te pule faamalumalu i le Misiona a Zambia Lusaka mo le tolu tausaga.
O le auauna atu i se misiona e tumu i ni lu’itau, ae o se tasi na o auala e faamanuia tele ai e le Atua aiga o faifeautalai. E pei ona tali atu o Nifae i le manaoga a lona tamā, “. . . O le a ou alu ma faia mea ua poloaiina e le Alii, aua ua ou iloa e le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou.”1 E ui lava ua ou taulotoina ma faaaoga lenei fuaitau talu lava ona ou liliu mai i le sefulutasi o o’u tausaga, ae sa matuā telē sona uiga ia te a’u ina ua ou va’ai i le a’ao o le Alii i le olaga o lo’u aiga a’o ma i ai i le misiona.
I ni nai aso ae ma te le’i ulufale atu i le MTC [nofoaga e aoaoina ai faifeautalai] i Provo, Iuta, sa faailoa mai se atugaluga a lo ma afafine matua o Luseane e uiga i le totogiina o le mokesi o lo matou fale. Sa ma fa’amalamalama atu i ai le tulaga lea ua i ai, ma fa’amautū atu ia te ia o le a saunia e le Alii mea uma. Na faate’ia ma’ua i le aso na soso’o ai ina ua ia faamatala mai ia te i ma’ua, o lea ua lā malilie ma lona toalua o Kelepi e la te togitogiina le mokesi ta’i masina, i le taimi o le a ma toesea ai mo le misiona. E ui lava sa ma lagonaina lo la alolofa mo i ma’ua, ae sa ma finau atu ma le malosi e ‘aua, ona sa ma popole e uiga i le tulaga tau tupe o lo’o i ai la’ua. O lo ma atalii faaletulafono e fai lana pisinisi simā, ae o lo ma afafine e nofofale ma o se tina i se fanau laiti e to’atolu ma o lo’o nonofo i se fale e leai ni potu. E ui lava i ni o ma popolega, ae sa finau Luseane e mafai lava ona lā gafatiaina.
Na ma malaga atu ma auauna i Zambia ma le faatuatuaga i le Alii o le a Ia saunia le auala. I le mae’a ai o ni nai masina, sa ou iloa o le taimi lea o le tau malulu ma e masani lava ona telegese galuega tau simā, ma sa ou manatu ai ou te fesili ia Luseane e uiga i le matou mokesi. O lana tali mai ia te a’u, “Tamā, vaai faalelei au faifeautala’i, ae tu’u mai ia te a’u ou te popole i au mea tau tupe. E te le o iloaina le mea lea o loo tupu. Ua faaluaina e le Alii a ma’ua puna’oa ma ua tele galuega ua avanoa mo i matou i pisinisi ma o lea ua o’o lava ina aumai isi tagata mai isi setete e fesoasoani mai ia i ma’ua. O lea ua matou nonofo i se fale e fa potumoe. Ua i ai fo’i tupe e mafai ai ona matou o ai e tafafao ae o lo’o lava pea le faasoa e fa’apolopolo mo aso leaga”.
Sa ia ta’u mai ia te a’u lo latou totogiina atoa ma le faatuatua o le latou sefulua’i ma le matou mokesi. Na totogiina e Luseane ma lona aiga le matou mokesi i le tolu tausaga a’o ma i ai i le misiona ma le isi fa masina ina ua faamaloloina i ma’ua ma toe tau atia’e ma tulaga tau tupe.
Na faamanuiaina fo’i lo matou aiga i ni fanau a fanau se to’alua ina ua mae’a se taimi o le faatalitali umi. O le isi e faaigoa ia “Misiona”. Na fanau o ia i le mavae ai o le lima tausaga o le fatalitali mo se isi tamaitiiti. O le isi na faaigoa ia “Zembezi”. Na fanau ina ua mavae tausaga e iva o fa’atalitali mo se isi tamaitiiti. A’o ma asiasi atu i la ma fanau ina ua mae’a le misiona, na fesili mai Luseane, “E te lua toe o i se isi Misiona?”
E saunia e le Alii le auala mo Ana tagata faatuatua e o’o lava i aso e pei o nei aso lē mautonu a’o faaauau pea ona pipisi le KOVITI-19 i le lalolagi. E faitau afe i latou ua maliliu, to’atele ua leai ni galuega. Ua tapunia fale faigaluega ma pisinisi. Ua faaitiitia femalagaaiga a vaalele ona o tapu eseese mo femalagaaiga. Ma ua ogaoga le ‘a’afiaga o le tamaoaiga o le lalolagi ona o le KOVITI-19.
E lata mai nei ona a’oa’o mai ai Elder Bednar o le Korama a Aposetolo e Toasefululua e uiga i lona faalogoina o le Alii, “O le faalogoina o tusitusiga paia e ala i lagona—lagona i le mafaufau, o se lagona i lo’u loto.”2 E tatau ona faateleina lo tatou faatuatua i le Alii o Iesu Keriso i lō tatou lagonaina lea o Ia e ala i le mana o tusitusiga paia ma a’oa’oga a perofeta soifua, tagata vaai ma tali faaaliga. Na faia e le Alii se folafolaga, “O a’u le Alii, o le a noatia a’u pe a outou faia le mea ou te fai atu ai, ae afai tou te lē faia le mea ou te fai atu ai, ua leai so outou folafolaga.”3 Ou te molimau atu afai tatou te aga’i i luma ma le faatuatua ma faia mea ua fetalai mai ai le Alii e pei ona maua i Ana afioga, ma siufofoga o Ana auauna, o le a faataunuuina mo i tatou.