Lafoina e se Talavou mai Kalefonia ni Mea Ta’alo mo Talavou i Toga

Newsroom

O Benson Webb, o se talavou ma o se tagata o le Ekalesia a Iesu Keriso o le Au Paia o Aso e Gata Ai, talu ai nei sa nofo ai o ia i Toga mo le lima masina, faatasi ai ma ona matua ma ona uso e to’atolu.

O ona matua sa faiaoga i Toga a’o fai malologa ai, ma o se a’afiaga na fai ma suiga o olaga o le aiga atoa.

A’o i ai i Toga, na maitauina e Benson le utiuti o mea ta’alo e taaalo ai ana uo ma le aoga sa aoga ai.

I le to’afā ai o ali’i talavou i le aiga, na aumai ai e le aiga o Webb ni mea ta’alo mai lo latou aiga. Na faapea mai le alii sefulu tolu tausaga o Benson, “O aso uma lava i le tu’ua ai o le aoga, e o mai tamaiti i lo matou fale e fa’anoi atu mea ta’alo, ma ou te alu ma aumai i fafo mea ta’alo ma matou ta’aalo fa’atasi ai ma i latou”.

Ina ua o’o i le taimi e toe fo’i ai Benson ma lona aiga i Amerika, sa ia tu’uina atu mea taalo nei i ana uo, ma mana’o e toe faatele nisi mea ta’alo. Sa ia iloa, o le tele o ana uo i Amerika e anoanoa’i a latou mea taalo ma manatu ai o le a ia amata ona faaputuputu mea ta’alo nei mo ana uo i Toga.

O Silas Moa, o se ali’i mai le uarota a Benson i Kalefonia e i ai lona pito Toga ma sa tala’i o ia i Toga. Sa fesili le tina o Silas pe mafai ona ia fesoasoani i le taumafaiga a Benson. Ina ua avatu i ai le ioega, sa amata loa ona faia se itulau i le Facebook e saili ai ni mea ta’alo. O le fesoasoani o le to’atele o i latou na foa’i, na latou maua ai se tupe pe tusa ma le $2,000.

Sa saunia e Benson ma ana uo ni pusa mo mea taalo e foa’i mai i le ‘aai sa nonofo ai ma sa to’atele i latou na foa’i. Sa auina atu ni feau tusitusia i luga o imeli ma faia ni pepa faalauiloa ina ia faasalalau ai le taumafaiga.

Ina ua iloa e Benson e i ai tamaiti i se aoga i Toga e i ai manaoga faapitoa e fiafia e ta’aalo i Lego, sa foa’iina e Benson ma ana uo a latou lava mea taalo mo i latou.

Sa o latou faia foi ni su’esu’ega po o a nisi mea taalo e aoga mo tamaiti e i ai manaoga f’apitoa. Na latou faaaogaina se vaega tupe na latou maua e faatau ai nisi mea ta’alo faaopoopo.

Na auina atu e le tina o Benson, o Leah Webb se tusi faafetai mo i latou uma na lagolagoina lea taumafaiga.

“Na mae’a ona faatinoina le auaunaga lenei a Benson ma ana uo mo tamaiti i Toga. Sa fu’e uma nei mea i se pusa tele ma o atu ai i le uafu i Oakland ma lafo atu ai i se va’a. Na tu’ua e le va’a le uafu i le aso 21 o Mati ma matou maua le faamaoniga ua alu le pusa i Toga”.

Sa faaauau pea ona ia fai mai, “Faafetai i lo outou agaalofa, na mafai ai ona matou lafoina le tele na’ua o mea nai lo mea na matou manatu e mafai ona lafo. Mo se faataitaiga, na i ai i le lisi o manaoga se neti volipolo se tasi. Ae na matou lafoina neti e ono!”