Tā kia Teti
Kapau te u ʻaka mālohi, te u lava pē ʻo aʻu ki ʻapi kimuʻa pea tāfea ʻa e loto halá, ko e fakakaukau ia ʻa ʻIú.
“Ke mou fiefia, he te u tataki atu ʻa kimoutolu” (Tokāteline mo e Ngaahi Fuakava 78:18).
Naʻe hū mai ʻa ʻIu mei he akó ki he veʻehala femoʻuekiná. Naʻe nofo ʻene fakakaukaú ʻi he ngaahi moʻoni fakafika naʻá ne ako mei heʻene kalasi efiafí. Naʻe fakatovave hake ʻa e kakaí mo honau fakamalú. Naʻe vave ʻa e ngangana hifo ʻa e ʻuhá, pea naʻe ano ʻa e halá.
Naʻe hū mai e kaungāmeʻa ʻo ʻIu ko Liní ʻo tuʻu ʻi hono tafaʻakí. Naʻe pehē ange ʻe Lini, “ʻOku totonu ke ke tā ki hoʻo tamaí ke ne ʻave koe. ʻOku talamai ʻe Misa Sengi ʻoku lolotonga tāfea e ngaahi feituʻu ʻe niʻihi ʻi he koló.”
“Te u lava pē au ʻo ʻalu ki ʻapi ʻiate au pē.”
“Ka ke sio ki he fuʻu vaí!” Ko e lea ange ia ʻa Liní mo tuhu ki he tafe ʻa e vaí ʻi he tafeʻanga vaí.
Ne kiʻi ongoʻi faikehe ʻa ʻIu. ʻOku moʻoni nai ʻa Lini? Mahalo pē ʻoku totonu ke ne tā kia Teti ke ʻave ia ki ʻapi kimuʻa pea tāfea ʻa e loto halá. Ka naʻe kē ʻa ʻIu mo Teti ʻanepō, pea naʻá ne kei ʻita pē ai. Naʻe ʻikai ke ne fie kole tokoni kia Teti.
Naʻe vete ʻe ʻIu ʻa e sēini ʻo ʻene pasikalá peá ne fakalea atu kia Lini. Kapau te u ʻaka mālohi, te u lava pē ʻo aʻu ki ʻapi kimuʻa pea tāfea ʻa e loto halá, ko e fakakaukau ia ʻa ʻIú.
Naʻá ne ʻaka mālohi, ka naʻe vave ʻa e mokoteilo hono nimá, viviku mo hono valá, pea naʻá ne fuʻu helaʻia. Naʻe toe haʻu pē ʻa e fakakaukau ke ne tā kia Tetí. Ko ha ongo nai ʻeni mei he Laumālie Māʻoniʻoní? Naʻe talaange ʻe he ongo faifekau ne na papitaiso iá ʻe lava ke hoko ʻa e Laumālie Māʻoniʻoní ko hono faifakahinohino. Ne hila ʻa ʻIu ki he langí. Naʻe fuʻu fakapōpoʻuli naʻe ʻikai ai ke ne lava ʻo sio ki he tumutumu ʻo e ʻū falé. Ka naʻá ne kei ʻita pē ʻia Teti.
Naʻe tukunoaʻi ʻe ʻIu ʻa e ongó ka ne kei ʻaka atu pē. Naʻe fuʻu māʻolunga ʻa e vaí pea naʻe tāpuni ai ʻe he kau faifakataú honau falekoloá. Naʻe fetukutuku ʻe he kakaí ʻenau ngaʻotoʻotá ki he fungavaka māʻolunga angé. Naʻe sio ʻa ʻIu ki ha faʻē ʻokú ne teke ʻene ongo tamaikí ʻi ha kiʻi vaka pelesitiki ʻi he loto vaí.
Naʻe aʻu hake ʻeni ʻa e vaí ki hono tungaʻivaʻé, naʻe ʻikai ke kei lava ʻe ʻIú ʻo ʻaka ʻene pasikalá. Naʻá ne hifo leva ʻo taki. Mahalo ne fuʻu tōmui ia ke toe tā kia Teti he taimí ni, pea naʻe kei ʻuha lahi pē. Naʻe pā ʻa e maná pea tapa mo e ʻuhilá ʻi ʻolunga. Naʻe ilifia ʻa ʻIu. Pea naʻá ne fuʻu helaʻia! Naʻá ne sio ki muʻa. Naʻe kei fuʻu mamaʻo pē ʻa ʻapi. Naʻe totonu pē ke ʻoua te ne tukunoaʻi ʻa e Laumālie Māʻoniʻoní koeʻuhí pē ko ha kiʻi kē laulaunoa.
Naʻe tuʻu ʻa ʻIu ke fai ha kiʻi lotu nounou. Naʻe ʻikai ke ne lava ʻo ongoʻi hono leʻó lolotonga e ʻuhá mo e maná, ka naʻá ne ʻiloʻi naʻe fanongo mai ʻa e Tamai Hēvaní kiate ia.
Naʻe lotu ʻa ʻIu ʻo pehē, “ʻE Tamai Hēvani. Fakamolemole muʻa ʻo tokoni mai ke u aʻu lelei ki ʻapi.” ʻI he taimi naʻe ʻosi ai ʻene lotú, naʻá ne ongoʻi ʻa e mālohi feʻunga ke hoko atu.
Naʻe faifai pea lava ʻa ʻIu ʻo sio ki honau falé ʻi he funga moʻungá. Naʻe fāifeinga hake ʻa ʻIu ʻi he moʻungá kuó ne mokosia, helaʻia pea mole mo hano vaʻe sū ʻe taha. Naʻá ne sio kia Teti ʻokú ne talitali mai ʻi tuʻa kiate ia. Naʻe fakatovave hifo ʻa Teti mei he moʻungá ke fakafetaulaki kiate ia, ʻo ne pīponu ʻi he vaí ʻi heʻene lele maí.
ʻI he taimi naʻe aʻu mai ai ʻa Tetí, naʻá ne fāʻofua kia ʻIu. “Naʻá ku fuʻu hohaʻa ʻaupito!” Ko Teti ange ia. “Naʻe totonu ke ke tā mai!”
Naʻe pehē ange ʻe ʻIu, “Ne u pehē ʻe au ʻokú ta feʻiteʻitani.”
Naʻe pehē ange ʻe Teti, “ʻOku ʻikai ʻaupito ke u ʻita ʻi he tokoniʻi koé.” Hili iá, naʻá ne ʻave leva ʻa e pasikala ʻa ʻIú ʻo ne taki hake ia ki he funga moʻungá.
Neongo naʻe pā ʻa e maná ʻi he funga fale lalahí pea lolo lahi mo e ʻuhá, ka naʻe ongoʻi ʻe ʻIu ha māfana ʻi hono lotó. Naʻá ne ongoʻi nonga mo malu ʻi heʻene muimui ʻia Teti ki ʻapí. ●