Founga Ne U Maʻu Ai ʻa e Fakamoʻuí mei he Ngaohikovia Fakasekisualé
Naʻá ku maʻu ha moʻui fakalilifu. Ka ne u ako kimui ange ne lolotonga hoku ngaahi taimi faingataʻaʻia lahi tahá, ne u lava ke falala ki hoku Fakamoʻuí.
Tā mei he Getty Images, fakaʻaongaʻi ki he ngaahi taumuʻa fakatātā, fakatātaaʻi ʻe ha mōtolo
Ne kamata ʻeku moʻui fakalilifú ʻi heʻeku taʻu fitú ʻi he taimi ne toe mali ai ʻeku faʻeé. Ne mau saiʻia ʻaupito ʻi he mali ua ʻemau faʻeé. Naʻá ne angalelei pea naʻá ne feohi lelei mo homau fāmilí. Ne u ongoʻi malu ʻaupito ʻi he feohi mo iá. Naʻe fakalata e meʻa kotoa ka ne tālunga mo ha foʻi ʻaho ʻe taha, ko ha taimi ne femoʻuekina ai e tokotaha kotoa, naʻá ne ngaohikovia fakasekisuale au.
Naʻe ʻikai mahino kiate au ʻa e meʻa kuó ne fai kiate aú. Ne u ongoʻi manavahē, puputuʻu, pea mātuʻaki fakamāʻia. Ka naʻá ku fuʻu manavahē ke tala ki ha taha. Ne u fakakaukau ʻe veuki e fiefia foʻou kuo maʻu ʻe hoku fāmilí pea he ʻikai tui mai ha taha kiate au. Ko ia ai, ne u fakakaukau ke u longo pē.
Kuó ne fakamamahiʻi au ʻi he foʻi tuʻo taha pē ko iá, ka naʻe lomekina maʻu pē ʻe he manatu ki he ngaohikoviá ʻa ʻeku fakakaukaú. Naʻe aʻu ʻo u fuʻu hohaʻa naʻa faifaí kuo sio mai pē ha taha ʻo ʻiloʻi ʻeku mamahí pea ʻilo ai ʻeku fakapulipulí, ko ia ne u feinga ke fufuuʻi ʻa e moʻoní ʻaki ʻeku kaungāmeʻa lelei mo e mali ua ʻeku faʻeé. Naʻá ne mātuʻaki angalelei kiate au, pea naʻe kamata ke u toe saiʻia ʻiate ia.
Ka naʻe fakaʻau ke toe kovi ange. ʻI he taimi naʻe kamata ngāue poʻuli ai ʻa e Fineʻeikí, naʻe kamata ke ngaohikovia maʻu pē au ʻe he mali ua ʻeku faʻeé. Naʻá ku ongoʻi tuenoa moʻoni. Ne u fakaʻamu ke u lea ʻo tala, ka naʻe ʻofeina lahi ʻa e mali ua ʻeku faʻeé, pea naʻá ku fakakaukau ʻe faʻahi pē tokotaha kotoa ia mo ia. Ko ia ai, ko e taimi ne u toko taha ai ʻi he poʻulí, ne u tautapa ki he ʻOtuá ke Ne tokoni mai ke u fufuuʻi ʻeku fakapulipulí.
Lea ʻo Talá
ʻI ha ʻaho ʻe taha naʻe faifai pea tuku ʻa e ngaohikoviá. Naʻe ʻikai ke u ʻilo pe ko e hā hono ʻuhingá. Neongo naʻe ʻikai ke ne toe fakamamahiʻi au, ka naʻá ku ongoʻi ʻuli mo fakamāʻia maʻu pē. Naʻá ku fehiʻa pē ʻiate au. Ko e taimi ʻe niʻihi ne u fakafekiki pe naʻa faingofua ange nai ʻa e maté ʻi hoku tuʻunga moʻoní. Naʻá ku kei fie lea pē ʻo tala, ka naʻá ku manavasiʻi ki he meʻa ʻe fai ʻe he moʻoní.
ʻI ha Sāpate ʻe taha ʻi he lotú, ʻi hoku taʻu 14, ne u fanongo ai ki ha lēsoni fekauʻaki mo e fai ha ngaahi fili lalahí. Naʻe fakalotolahiʻi kimautolu ʻe heʻeku faiakó ke mau ʻaukai mo lotu peá ne palōmesi mai ʻe fakamālohia kimautolu ʻe he ʻOtuá ke mau fai ʻa e meʻa totonú. ʻI he tuku ʻa e lotú, ne u toutou fakakaukau pē ki he meʻa naʻe lea ʻaki [ʻe heʻeku faiakó]. Ne u fifili kapau te u kole, ʻe tokoni mai nai ʻa e ʻOtuá ke u lea ʻo tala?
ʻI he ʻaho hono hokó, ne u ʻaukai ke maʻu ʻa e loto-toʻa ke tala ki he Fineʻeikí fekauʻaki mo e ngaohikoviá. Naʻe ʻikai ke u lava ʻo tokanga lolotonga e akó he naʻe tuku pē ʻeku fakakaukaú ʻi he fakafōtunga ʻe fai [ʻe he Fineʻeikí]. ʻI he taimi ne u aʻu ai ki ʻapí, ne u ongoʻi puke lahi. Ne u toe lotua pē ha ivi, ka naʻe ʻikai ke u ongoʻi mateuteu ke talaange kiate ia.
ʻI he efiafi ko iá, ne u fakaofiofi ai ki he Fineʻeikí ʻi heʻene fai e feimeʻatokoni efiafí. Naʻe ʻikai ke u ʻilo e meʻa ke lea ʻakí, ka ko e taimi ne u sio ai ki hono fofongá, ne u maʻu ʻa e loto-toʻa ke kamata talanoa pē. Ko e taimi pē naʻá ku kamata aí, naʻe huhua mai ʻa e meʻa kotoa pē naʻe fuoloa taʻu ʻeku fufuuʻí.
Naʻá ku tangutu pē mo e Fineʻeikí ʻi he seá ʻo fetāngihi fakataha. Hili iá, naʻá ma fetuʻutaki ki heʻemau palesiteni fakakoló mo tā ki ʻapi polisi. Naʻe tauteaʻi ʻa e mali ua ʻeku faʻeé koeʻuhí ko e meʻa kuó ne fai kiate aú, pea naʻe foaki kiate au ʻa e maluʻi naʻá ku fie maʻú—he ʻikai ʻaupito ke u toe sio kiate ia.
Ko e Hala ki he Fakamoʻuí
Lolotonga e taimi ko iá, naʻe faingataʻa ʻa hono toe fakamatalaʻi ʻeku aʻusiá ki he kau maʻu-mafaí mo hono ʻeke mai ʻe he ngaahi kaungāmeʻá pe ko e fē ʻa e mali ua ʻeku faʻeé, ka koeʻuhí ko e poupou ʻa hoku fāmilí, naʻe ʻikai ai ke u toe tuenoa. Ne mau loto-taha kotoa ki ha kaveinga fakafāmili: “ʻOku ou faʻa fai ʻa e ngaahi meʻa kotoa pē ʻia Kalaisi ʻokú ne fakamālohiʻi aú” (Filipai 4:13). Naʻe fakahaaʻi mai foki ʻe homau kāinga mamaʻó ʻa ʻenau ʻofa mo e poupou pea, ʻi he hili ha ngaahi taimi, ne kamata ke mau foua fakataha ʻa e fakamoʻuí.
Naʻá ku ʻalu fakataha mo e Fineʻeikí ki ha faleʻi fakapalōfesinale, ʻa ia naʻe tokoni lahi ʻaupito! Ko ʻeku faifaleʻí ko e meʻa pē ia ne u fie maʻú. Naʻá ne tokoni ke mahino kiate au ʻa e ngaahi ongo kotoa pē naʻá ku ongoʻí peá ne tokoni ke u lavaʻi ʻeku ngaahi manatu fakamamahí. Naʻe ʻikai ke u teitei ʻiloʻi ʻa hono lahi ʻo ʻeku mamahí ka ne taʻeʻoua ʻa e kamata ke u ongoʻi ʻoku toe kakato ʻeku moʻuí.
Naʻe ʻikai ke u fakakaukau ʻe mole atu ʻa e mamahí koeʻuhí pē ko ʻeku lea ʻo talá, ka naʻe ʻikai foki ke u ʻiloʻi ʻa e lahi e taimi (mo e kātaki) ʻe fie maʻu ki he fakamoʻuí. Kuo fuoloa taʻu ʻa ʻeku ongoʻi taʻemahuʻingá. Naʻe pau ke u toe ako ke u ʻofa pē ʻiate au.
Naʻá ku maʻu ʻa e nonga tahá ʻi heʻeku tafoki ki hoku Fakamoʻuí mo ʻeku Tamai Hēvaní. Naʻe hoko ʻa hono fakatokangaʻi ʻokú Na ʻafioʻi tonu ʻa ʻeku ongó ke u maʻu ai ʻa e mālohi mo e ʻamanaki lelei. Naʻá ku fakafalala kiate Kinaua lolotonga e ngaahi taimi faingataʻa tahá. Naʻe kamata ke mōlia atu ʻa e ngaahi manatú ʻi he hili ha ngaahi taimi, pea ne u ongoʻi moʻoni ha nonga ne fakafou mai ʻi he ʻofa ʻa e Fakamoʻuí.
Ko e taha ʻo e ngaahi konga fakafiemālie taha ʻo e hala ki he fakamoʻuí ko hono ʻiloʻi ko ia naʻá ku maʻu ha kahaʻu leleí. Ko e taimi naʻe ngaohikovia ai aú, naʻe ʻikai ke u teitei fakakaukau te u maʻu ha tuʻunga moʻui angamaheni. Ne u ongoʻi kuo taʻeʻaonga ʻaupito ʻeku moʻuí. Ka naʻe fakafou ʻi he tokoní mo e fakamoʻuí, ne u maʻu ai ha ngaahi meʻa ke u fakatuʻamelie ki ai. Naʻe kamata ke u fakamatala ʻeku talanoá ki he tamaiki fefine kehe ne nau loto-mamahí, pea naʻe aʻu ʻo u fili ke u ngāue fakafaifekau. Naʻe fakamālohia au ʻe hono vahevahe ʻeku fakamoʻoní mo e niʻihi kehé.
ʻOku ʻikai ke ʻilo ʻaki au ʻa e meʻa naʻe fai ʻe he mali ua ʻeku faʻeé kiate aú. Naʻá Ne liliu ʻeku moʻuí ʻo taʻe ngata, ka ʻoku ou fili ke ngāue ʻaki ʻeku aʻusiá ke tokoniʻi e niʻihi kehé. ʻOku ʻi ai pē ngaahi ʻaho ʻe niʻihi ʻoku kei faingataʻa, ka kuo fakamālohia au ʻe he ʻEikí ʻi he meʻa kotoa pē, pea ʻoku ou ʻiloʻi te Ne hokohoko atu ke tokoniʻi au. Kuó u liliu mei ha tokotaha naʻe fakamamahiʻi ki ha tokotaha kuo moʻui.