Kapau ko ha Taha Koe ʻoku Ngaohikovia

Ko e Hā ʻa e Ngaohikovia?

Ko e ngaohikoviá ko hono liʻekina pe fakamamahiʻi ʻo ha niʻihi (hangē ko ha fānau, ko ha taha toulekeleka, ko ha taha faingataʻaʻia fakaesino pe ko ha taha pē) ʻi ha founga ʻokú ne fakatupu ha uesia fakaesino, fakaeloto, pe fakasekisuale. ʻOku fepaki ia mo e ngaahi akonaki ʻa e Fakamoʻuí.

“Ko e tuʻunga ʻo e Siasí, he ʻikai pē ke fakaoleoleʻi ha faʻahinga tuʻunga ʻo e ngaohikoviá” (General Handbook: Serving in The Church of Jesus Christ of Latter-day Saints (Tohi Tuʻutuʻuni Fakalūkufuá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní) [2020], 38.6.2). ʻOku maumauʻi ʻe he ngaokoviá ʻa e ngaahi fono ʻa e ʻOtuá pea lava pē ke toe maumauʻi foki mo e ngaahi lao ʻo e sosaietí.

Ngaahi Faʻahinga Kehekehe ʻo e Ngaohikoviá

Ngaohikovia Fakaesinó: ʻUlungaanga mātuʻaki fakamālohi pe fakamamahi ʻoku fai ʻe ha taha ki ha taha kehe ʻa ia ʻoku iku ai ki ha lavea fakaesino.

Ngaohikovia Fakasekisualé: Ko ha ʻekitivitī pe fetuʻutaki fakasekisuale ʻoku ʻikai loto ki ai ʻa ia ʻoku ngāue ʻaki ai ʻe he kau fakaaoaó ʻa e fakamālohi, fakamanamana, pe ngāue fakamamahi ʻaki ʻa e kakai ʻoku ʻikai ke nau lava ʻo fakahā honau lotó. Ko e fengāueʻaki fakasekisuale kotoa pē ʻi he vahaʻa ʻo ha tokotaha lahi mo ha fānau ko e ngaohikovia ia, ʻo tatau ai pē pe naʻe fai ha felotoi.

Ngaohikovia ʻi he Leá pe Fakaelotó: Ko ha sīpinga ʻulungaanga ʻa ia ʻoku ʻohofi ʻiloʻilo pau mo toutou ʻohofi ai ʻe ha tokotaha ha taha kehe ʻi ha ngaahi founga ʻoku ʻikai fakaesino, hangē ko e ngaahi lea fefeká, fakamanamaná, fakaaoaó, pe tukuhifó. ʻOku fakatupunga heni ha ongoʻi maʻulalo ange ʻi he mahuʻinga fakaekitá mo e ngeiá. Neongo ʻoku ʻikai fakaesino ia, ka ʻoku uesia ʻe he faʻahinga ngaohikovia ko ʻení ʻa e tuʻunga lelei fakaʻatamai mo fakaeloto fakalūkufua ʻa ha tokotaha.

Founga ke Maʻu ai e Tokoní

ʻOku finangalo e ʻEikí ke tau fai e ngaahi meʻa kotoa pē te tau ala lavá ke fakaʻehiʻehi ai mei he ngaohikoviá pea maluʻi mo tokoniʻi ʻa kinautolu kuo ngaohikoviʻí. ʻOku ʻikai fie maʻu ia ke kātekina ʻe ha taha ʻa e tōʻonga ʻo e ngaohikoviá. ʻOku tatau ai pē pe ʻoku lolotonga hoko ia ʻi he taimí ni pe naʻe hoko fuoloa ia, te ke lava ke maʻu ha ngaahi maʻuʻanga tokoni ke tokoniʻi koe ʻi he abuse.ChurchofJesusChrist.org.