ʻOku Muimui ʻa e Kakai Tui Faivelengá kia Sīsū

Laukonga fekauʻaki mo ʻeni ʻi he 3 Nīfai 17 ki he 4 Nīfai 1.

ʻI he taimi naʻe ʻaʻahi ai ʻa Sīsū ki he kakai Nīfaí naʻá Ne akoʻi kiate kinautolu fekauʻaki mo e papitaisó pea mo e founga ke maʻu ai ʻa e sākalamēnití. Naʻá Ne fokotuʻu Hono Siasí.

Naʻe tāpuakiʻi ʻe Sīsū ʻa e fānau kotoa pē. Naʻe haʻu ha kau ʻāngelo! Naʻe fakamoʻui ʻe Sīsū ʻa e kakaí mo lotua kinautolu. Naʻá Ne foki leva ki langi.

Hili e foki ʻa Sīsuú, naʻe hoko atu e kakaí ke nau fai e meʻa naʻá Ne akoʻí. Naʻe ngāue fakataha ʻa e tokotaha kotoa pē pea naʻa nau vahevahe ʻa e meʻa ne nau maʻú, ko ia naʻe ʻikai ha taha ʻe masiva. Naʻe tāpuakiʻi ʻe he kau taki ʻo e Siasí ʻa e kakai naʻe puké.

Naʻe fili ʻa e kakaí ke nau vā lelei, kae ʻikai ke nau kē. Naʻe muimui ʻa e tokotaha kotoa ki he ngaahi fekau ʻa e ʻOtuá. Pea naʻe fuoloa ʻenau nofo fiefiá!

ʻE fakafiefia ange ʻa ʻeku moʻuí ʻi heʻeku muimui ki he ngaahi fekau ʻa e ʻOtuá. Te u lava ʻo vahevahe e ngaahi meʻa ʻoku ou maʻú mo e niʻihi kehé. Te u lava ʻo tokoni ki he kakaí ke nau vā lelei. ●