Vahevahe ʻo e Ongoongoleleí

Fai ʻe ʻEletā Edward Dube

ʻO e Kau Fitungofulú

“Ako ʻiate au … pea te mou ʻilo ai ʻa e fiemālié ki homou laumālié” (Mātiu 11:29).

Naʻe ʻomi ʻe ha tangata ne u ngāue ki ai ha tatau ʻo e Tohi ʻa Molomoná. Ka naʻe ʻikai ke u lau ia ʻi ha meimei taʻu ʻe ua. ʻI ha Sāpate ʻe taha, naʻá ku toʻo hake ai ʻa e Tohi ʻa Molomoná peá u ʻalu ki ha halanga lēlue ʻi he tuʻa kolo naʻá ku nofo ai ʻi Simipāpueé. Naʻá ku tangutu ki lalo peá u kamata lau.

Ne faingataʻa ke mahino ia ʻi he kamataʻangá. Ka naʻá ku toutou lau ʻa e fakamoʻoni ʻa Siosefa Sāmitá. Ka naʻe ongo moʻoni ʻa ʻene ngaahi leá ki hoku lotó.

Kimui angé, naʻe fakaafeʻi au ʻe ha taha ke u haʻu ki he lotú. ʻI he kamatá, naʻá ku taʻefiemālie, ko ia ne u tangutu pē ʻi he sea ʻi muí. Ka ʻi he taimi naʻe kamata vahevahe ai ʻe he kakaí ʻa ʻenau fakamoʻoni fekauʻaki mo e Fakamoʻui ko Sīsū Kalaisí pea mo e Tohi ʻa Molomoná, naʻá ku ongoʻi ha meʻa fakaofo ʻi hoku lotó.

Ne ʻikai fuoloa mei heni, ne haʻu ha ongo faifekau ki homau koló. Hili ha taimi nounou naʻá ku papitaiso. Hili ha ngaahi taʻu lahi mei ai, ne u maʻu ha faingamālie ke ngāue fakafaifekau mo vahevahe ʻa e ongoongoleleí mo ha niʻihi tokolahi.

Kuo tupu ʻo tokolahi ʻa e Siasí ʻi Simipāpuē. Ka ʻoku kei lahi pē ʻa e meʻa te tau lava ʻo fai ke vahevahe ai e ongoongoleleí, ʻo tatau ai pē pe ko e fē feituʻu ʻoku tau nofo aí. ʻOku fakafou ʻi he lotú, ako folofolá, mo e efiafi fakafāmili ʻi ʻapí ʻa hoʻo lava ke vahevahe hoʻo fakamoʻoní peá ke ofi ki he Tamai Hēvaní. ʻE lava ke tāpuekina ʻe hoʻo fakamoʻoní ʻa e moʻui ʻa e kakai tokolahi ʻi he funga ʻo e māmaní. ●