Ko e Taumuʻa ʻo ʻEku Papitaisó
Kimuʻa pea fai ʻa hoku papitaisó, naʻá ku tangutu toko taha pē ʻo lotu ke fakafokifā pē ha ʻasi mai ʻa hoku ngaahi kaungāmeʻá.
Tā fakatātaaʻi ʻe Julia Yellow
ʻI heʻeku nofo ʻi he tuʻa kolo ʻo Taipei, Taiuaní ʻi heʻeku kei siʻí, naʻe ʻikai ʻaupito haʻaku teitei ʻilo ki he ongo faifekaú. Ko ia ai ko e fuofua taimi pē ne u fetaulaki ai mo kinauá, ne u fie ʻilo ki heʻena pōpoakí. Ne ʻikai fuoloa mei ai kuó u vēkeveke ke muimui ki heʻena akonakí peá u moʻui ʻaki ʻa e ongoongoleleí ʻi heʻeku moʻuí. Naʻá ku ongoʻi ko ha founga ʻeni maʻaku ke u ʻiloʻi ai pe ko e moʻoni nai ʻoku ʻi ai ha ʻOtua.
ʻI loto ʻi ha māhina ʻe taha, naʻe akoʻi kiate au ʻa e ongoongoleleí mo e ngaahi fekau ʻoku akoʻi kimuʻa ʻi he papitaisó. Ne u maʻu ʻa e nongá ʻo fakafou ʻi he lotú, naʻá ku maʻu ʻa e fakahā fakafoʻituituí mei hono ako e folofolá, pea naʻe ʻikai ke u teitei liʻaki ha fakataha ʻa e Siasí. Naʻá ku fakakaukau leva ʻoku totonu ke u papitaiso.
Ko e faingataʻa lahi taha ne u fekuki mo ia ʻi he taimi ko iá ko e ngaahi palopalema ne tupu ʻi hoku ngaahi vā fetuʻutaki mo ha niʻihi ʻo hoku ngaahi kaungāmeʻá he naʻa nau fakafepakiʻi ʻa ʻeku fakafeohi ki he Siasí. Naʻá ku lotua lahi e ngaahi palopalema ko ʻení, ka naʻe hangē naʻe fakaʻau ke toe kovi ange homau vā fetuʻutakí.
Naʻá ku fakaafeʻi hoku ngaahi kaungāmeʻá ki hoku papitaisó, ka naʻa nau mātuʻaki taʻetali ʻeku fakaafé. Naʻe ʻikai ʻaupito ke u ʻilo pe ko e hā e meʻa te u faí. Kimuʻa pea fai hoku papitaisó, naʻá ku tangutu toko taha pē ʻi he sea sofa ʻi he loki talitali ʻo e falelotú, ʻo u lotua ke ʻasi fakafokifā mai hoku ngaahi kaungāmeʻá koeʻuhí ke u talanoa ange kau ki he ngaahi liliu lelei kuó u maʻu ʻi heʻeku moʻuí mo fakamoʻoniʻi kiate kinautolu ʻoku ou fai ʻa e fili totonú ʻaki ʻeku papitaisó.
Naʻe ʻikai ke ʻasi mai ʻa hoku ngaahi kaungāmeʻá, ka ʻi he lolotonga ʻeku lotu fakamātoato ki he ʻOtuá, ne u ongoʻi ha ueʻi fakalaumālie. ʻI he taimi ko iá, ne u ongoʻi ha ʻofa maʻongoʻonga mei heʻeku Tamai Hēvaní. Naʻá ku ʻiloʻi naʻá Ne ʻi ai pea kuó Ne ʻafioʻi moʻoni ʻeku lotú.
Ko e ʻuhinga totonu ne u fie papitaiso aí ko e ngaahi meʻa fakaofo kotoa pē naʻe hoko ʻi heʻeku moʻuí, ka ʻi he taimi ní, naʻe mahino kiate au ʻa e taumuʻa ʻo ʻeku papitaisó.
Ko e ngaahi ongo naʻá ku maʻú naʻe hangē ia ha folofola ʻofa mo fakahangatonu mai ʻa e leʻo ʻo e ʻEikí kiate au ʻo pehē, “ʻOku ʻikai fie maʻu ke ke fakamoʻoniʻi ha meʻa ki ha taha. ʻOku fie maʻu pē ke ke fakamoʻoniʻi kiate au ʻokú ke loto-fiemālie ke haʻu kiate au mo tauhi moʻoni ki heʻeku ongoongoleleí ʻi he toenga hoʻo moʻuí.”