Kuó Ne Toe Fakamoʻui Au
Naʻe fanongo ʻa hoku kaungāmeʻá ʻoku ou puke pea naʻá ne ʻomi ha pāsolo naʻá ne ngaohi makehe pē maʻaku.
Tā fakatātaaʻi ʻe Joshua Dennis
Naʻá ku fakakaukau maʻu pē ko ha tokotaha moʻui lelei au. Ko ia naʻá ku fuʻu ʻohovale ʻi heʻeku ʻā hake ʻi ha pongipongi ʻe taha ʻoku ou ongoʻi hangē ʻoku kukuʻi hoku fatafatá pea naʻe hangē ka paá. Naʻe leleakiʻi au ki he falemahakí, ka ʻi he hili ha ngaahi houa ʻo hono sivi aú, naʻe ʻikai ʻilo ʻe he kau toketaá ʻa e palopalemá. Ne nau fakafoki au ki ʻapi, neongo ne u kei ongoʻi pē ha faingataʻaʻia lahi fau. Naʻe kamata leva ai ha fāinga māhina-fitu mo e sio toketaá, tokoto falemahakí, mo e felāngaaki fakamamahi taha kuó u fekuki mo ia ʻi heʻeku moʻuí.
Naʻe kamata ke u ongoʻi mafasia. Naʻe pau leva ke u nofo mei he ako ʻunivēsití peá u toe foki ʻo nofo mo ʻeku ongomātuʻá. Naʻe ʻikai ke u lava ʻo ʻeva mo hoku ngaahi kaungāmeʻá. Ne u mātuʻaki mamahi ke u fai ha taha ʻo e ngaahi meʻa ne u manako aí. Naʻá ku ongoʻi ko e meʻa kotoa pē ne u mahuʻingaʻia aí—ko ʻeku ngaahi fakaʻānauá, ko hoku ngaahi vā fetuʻutakí, ko hoku ngaahi talēnití—naʻe taʻeʻaonga kotoa ia, pea ko e taimi ní naʻe hangē he ʻikai toe lava ke fakafoki ʻeku moʻuí ki he tuʻunga ne ʻi ai kimuʻá. Pea naʻe kamata leva ke u fifili: ʻOku lava fēfē nai ke tuku ʻe he Tamai Hēvaní ke hoko ʻeni kiate aú? ʻOku ʻikai nai ke Ne ʻofa ʻiate au?
Hili ha toe sio toketā fakamamahi ʻe taha, ko e meʻa pē ne u fakaʻamu ki aí ke u fāfāʻū pē ʻo tangi. Ka ʻi heʻeku aʻu ki ʻapí, ne u sio ki ha meʻa foʻou ʻi he sitepú: ko ha puha sū motuʻa mo mahaehae naʻe tepiʻi takai pea fakatuʻasila kiate au.
Ne hā ʻi ha tohi ʻi he puhá naʻe ʻomi ʻa e fakamoimoí mei ha taha ʻo hoku ngaahi kaungāmeʻá. Naʻá ne fanongo ʻoku ou puke peá ne fakaʻamu ke fakafiefiaʻi au. ʻI heʻeku fakaava hake ʻa e puha suú, naʻá ku ʻiloʻi naʻe fonu ia ʻi he fanga kiʻi kongokonga pelesitiki. Ko ha pāsolo naʻe ngaohi pē ʻi ʻapi pea naʻe faʻu makehe pē ia maʻaku.
ʻI heʻeku fokotuʻutuʻu ʻa e pāsoló, naʻe kamata ke u tangi. Naʻe faʻu ʻe he pāsoló ʻa hoku hingoá, naʻe takatakaiʻi ʻaki ai ha ngaahi pōpoaki lelei ʻo e ʻofa mo e fakalotolahi. Naʻá ku ongoʻi naʻe toe fakafoki ʻa e ʻū kongokonga ʻo ʻeku moʻuí ʻi heʻeku fokotuʻutuʻu ʻa e meʻaʻofa mei hoku kaungāmeʻá.
Hili ha taimi nounou mei ai, naʻe kamata ke u fakaʻaongaʻi ha faitoʻo naʻá ne fakasiʻisiʻi ʻeku ngaahi felangaākí pea naʻe tokoni ia ki he kau toketaá ke nau ʻilo e meʻa ʻoku hokó. Naʻá ku maʻu ha mahaki ne hāhāmolofia ka ʻoku lava pē ke faitoʻo, pea ʻi hono ngāue ʻaki e faitoʻo totonú, te u lava pē ʻo toe foki ki heʻeku moʻui angamahení.
Naʻe aʻu pē ki he taimi ne u toe moʻui aí, naʻá ku ʻiloʻi he ʻikai teitei ngalo ʻiate au ʻa e meʻa kuó u akó. Koeʻuhí ko e meʻaʻofa lelei mei hoku kaungāmeʻá, naʻá ku ʻiloʻi naʻe ʻofaʻi au pea kuo teʻeki ke ngalo au ʻi he Tamai Hēvaní. Hili ha ngaahi māhina ʻo e ongoʻi kuo taʻeʻaonga ʻa e moʻuí, mālō mo e angaʻofa ʻa hoku kaungāmeʻá pea mo e ʻofa ʻa ʻeku Tamai ʻi Hēvaní, ne toe kakato ʻeku moʻuí.