“ʻOku ʻI Ai Nai Haʻamo Tohi Lanu Pulū ʻoku Tohi Mataʻitohi Lanu Koula?”
Ko e taimi ʻe niʻihi ʻi he hili ʻeku lī e tohí, ne u fie ʻilo pe ko e hā e meʻa naʻe tohi aí.
Tā fakatātā ʻa Greg Newbold
ʻI he ngaahi taʻu lahi kuohilí, ne u maʻu ha tohi lanu pulū naʻe tohi ʻaki ha mataʻitohi lanu koula ʻa e takafí, mei ha ongo faifekau naʻá na ngāue ʻi he ʻapitanga tau naʻá ku akoako ngāue ai ki heʻeku ngāue ʻi he Tautahi ʻa e ʻIunaiteti Siteití.
ʻI he kamata ke u lau ʻa e tohí, naʻe talamai ʻe ha taha kiate au ʻoku loi ia he naʻe hiki ia mei he Tohi Tapú. Naʻe tupunga heni haʻaku tālaʻa ki hono moʻoni ʻo e tohí, ka naʻá ku kei tauhi pē ia. Naʻá ku lau pē hano kiʻi konga siʻi, peá u faʻo ia ʻi lalo ʻi heʻeku kato ʻalu-tahí, pea naʻe ngalo leva ia ʻiate au.
Hili ha taʻu ʻe taha mei ai, ne u fakakaukau ke fakamaau ʻeku kato ʻalu-tahí. Naʻá ku maʻu ʻa e tohí ka naʻe ʻikai ke u toe tokanga ki ai, ko ia ne u lī ia ki he vevé. Ka ʻi ha ngaahi taimi kimui ange, naʻá ku fie ʻilo ki he meʻa naʻe ʻi he tohi lanu pulū ko ia naʻe tohi mataʻitohi lanu koulá. ʻI he taimi ní, ʻoku ou tui naʻe haʻu ʻa e ongo ko ʻení mei he Laumālié, ʻa ia “ʻoku tākiekina ke faileleí” (Tokāteline mo e Ngaahi Fuakava 11:12).
ʻI he 2005, ne fakaafeʻi au ʻe hoku kaungāmeʻa foʻou ke u fanongo ki he ongo faifekaú. ʻI he kamatá, ne ʻi ai haʻaku ngaahi fehuʻi mo e tālaʻa ki he meʻa ne na akoʻi kiate aú, ka naʻe maʻu ʻe he ongo faifekaú ha loto-falala pea naʻá na ʻomi ha ngaahi tali naʻe ʻuhingamālie kiate au.
ʻI heʻeku ʻiloʻi ne tatau ʻa e ongo faifekau ko ʻení mo e ongo ua ne u fetaulaki mo ia ʻi he ngaahi taʻu kimuʻa atú, naʻá ku fehuʻi loto-vēkeveke ange, “ʻOku ʻi ai nai haʻamo tohi lanu pulū ʻoku tohi mataʻitohi lanu koula?”
Naʻe tali mai ʻe ha toko taha, “ʻIo, ʻoku ʻi ai! ʻOku ui ia ko e Tohi ʻa Molomoná!”
Naʻá ku fiefia ke u toe maʻu ʻa e Tohi ʻa Molomoná. Ko hono moʻoní, naʻá ku fuʻu vēkeveke peá u toutou lau ia ʻi loto ʻi he uike pē ʻe ua! ʻI heʻeku lau mo lotua iá, naʻá ku ʻiloʻi ko e folofola ia ʻa e ʻOtuá.
Naʻe lea ʻaki ʻe ʻEletā Lūpeni V. ʻAliati ʻo e Kau Fitungofulú ha meʻa ʻi he konifelenisi lahí, naʻe felāveʻi ia mo ʻeku aʻusia ʻi he Tohi ʻa Molomoná: “Ka tukupā ha tokotaha laukonga pē ke ako fakamaatoato [ʻa e Tohi ʻa Molomoná], ʻi he laumālie ʻo e lotú, he ʻikai ke ne ako pē kau kia Kalaisi ka te ne kamata meia Kalaisi —kae tautautefito kapau te nau fai ʻa e fili ke ‘ʻahiʻahiʻi ʻa e ivi ʻo e folofolá’ [ʻAlamā 32:5] pea ʻikai fakafisingaʻi ia tupu mei he tomuʻa taʻetui ko e meʻa kuo lea ʻaki ʻe he niʻihi kehé ʻo kau ki ha ngaahi meʻa kuo teʻeki ke nau lau.”1
ʻI heʻeku lau e Tohi ʻa Molomoná, pea lotua mo falala ki he Laumālié, kuó u mātā ha ngaahi meʻa maʻongoʻonga kuo hoko ʻi heʻeku moʻuí.