Ngaahi Tefitoʻi Moʻoni ʻo e Ngāue Fakaetauhí
Ngāue Fakaetauhi ʻo fakafou ʻi he Polokalama Fānaú mo e Toʻu Tupú
Ko e laumālie ʻo e ngāue fakaetauhí ko hono fakaafeʻi ʻa e niʻihi kehé ke nau tupulaki mo tokoniʻi kinautolu ʻi he moʻuí.
Laʻitā ʻa Tom Garner
ʻOku lahi fau e ngaahi faingamālie ki he ngāue fakaetauhí ʻo fakafou ʻi he polokalama Fānaú mo e Toʻu Tupú. Mahalo ʻoku ʻi ai haʻo fānau pe toʻu tupu pē ʻaʻau ʻi ʻapi. Mahalo ko ha takimuʻa koe ʻi he polokalamá pe ʻokú ke ngāue fakaetauhi ki ha ngaahi fāmili ʻoku ʻi ai haʻanau fānau mo e toʻu tupu. Pe mahalo ʻokú ke ʻiloʻi ha fānau mo ha toʻu tupu ʻe niʻihi (ʻoku totonu ke nau fakafofongaʻi kotoa kitautolu). Ko e hā pē tuʻunga ʻokú ke ʻi aí, ʻoku lahi e ngaahi founga ke fakaʻaongaʻi ai ʻa e polokalamá pe ko hono ngaahi tefitoʻi moʻoní ke tāpuekina e moʻui ʻa e niʻihi kehé.
Fakatupulaki Fakataha Kitautolú
ʻOku ʻi he uhouhonga ʻo e [polokalama] Fānaú mo e Toʻu Tupú ha tokanga taha ke feinga he ʻaho kotoa pē ke hoko ʻo hangē ko e Fakamoʻuí, ʻa ia naʻe haohaoa ʻEne ngāue fakaetauhí. Ko e tokolahi ʻo kinautolu kuo nau kau ki he polokalamá kuo nau ʻiloʻi ko e lahi ange ko ia hoʻo fakalakalaka ʻi he ngaahi tapa kehekehe ʻo hoʻo moʻuí, ko e lelei ange ia hoʻo mateuteu ke tokoni pe ngāue fakaetauhi ki he niʻihi kehé.
Ka ʻi he polokalama Fānaú mo e Toʻu Tupú, ʻoku ʻikai fakatatali ʻa hono tāpuekina ʻo e niʻihi kehé kae ʻoua leva kuó ke ako ha meʻa. Ko e ngāue ko ia ke akó, ʻiate ia peé, ʻoku ʻomi ai ha ngaahi faingamālie ke ngāue fakaetauhi.
Ko e fokotuʻu ko ia ha taumuʻa ʻi he Fānaú mo e Toʻu Tupú ke ako tā-pianó, ko e kamataʻangá pē ia maʻá ha talavou ko Palōfita ʻoku nofo ʻi Kana. ʻOku pehē ʻe Palōfita, “Ko ʻeku taumuʻá ke tokoni foki ki he kakai kehé ke nau ʻiloʻi ʻa e meʻa ʻoku ou akó.”
Neongo ʻoku teʻeki ke ne hoko ko ha faiako, ka kuo tupulaki ʻene taumuʻá ki ha meʻa ʻoku mahulu atu ʻi he meʻa naʻá ne fakakaukauloto ki aí. Kuo aʻu ʻeni ʻo toko 50 ʻa e kau ako ʻoku nau toʻo kalasi tā-piano ʻi he ʻapisiasí fakataha mo Palōfitá. Pea ko hai ʻokú ne akoʻi ʻa Palōfita mo e kau ako ko ia ʻe toko 50? ʻAlekisanitā M. mo Kelivini M., taʻu 13 fakatouʻosi. ʻOku pehē ʻe Kelivini, “ʻOkú ma fie fakahā ha tōʻonga angaʻofa ki he kakai kehé.”
ʻI he ʻaho ʻe tolu he uike, ʻoku akoʻi taʻetotongi ai ʻe he ongo toʻu tupú ʻa e ngaahi lēsoni tefito ki he tā-pianó, ki he tokotaha kotoa pē ʻoku haʻu ke akó. ʻOku ʻi ai ha meʻa ʻaonga kuo tānaki mai ki he ngaahi lēsoni tā-pianó. Ko e tokolahi ʻo e kau ako ne fakafeʻiloaki ki he Siasí ʻo fakafou ʻi he ngaahi lēsoni tā-pianó, ne nau ako kimui ange ʻa e ongoongoleleí pea kuo nau fili ke papitaiso kinautolu.
ʻI heʻetau feinga ke fakatupulaki kitautolú, te tau lava ʻo ngāue fakaetauhi ki he niʻihi kehé ʻaki hano fakaafeʻi kinautolu ke nau kau mo kitautolu.
Laʻitā ʻa Jonas Rebicki
Ko Ha Founga Lelei ki he Ngāue Fakaetauhí
ʻI he hoko ʻa Sapilina Sīmoa Tiu ʻAukusito ʻo Kulitipa, Palāsilá ko ha palesiteni Palaimeli ʻi he siteikí, kuó ne mātā ʻa e founga ʻoku tāpuekina ai ʻe he ngaahi konga ʻo e fakalakalaka fakatāutaha ʻo e polokalamá, ʻa e fānau mo e toʻu tupu ʻi hono siteikí. Ka kuó ne toe mātā foki ha ngaahi founga lahi ke fakaʻaongaʻi ai ʻa e meʻa kuó ne ako fekauʻaki mo e fakalakalaka fakatāutahá, ʻi hono fatongia ko ha fineʻofa ngāue fakaetauhí.
ʻOku pehē ʻe Sisitā ʻAukusito, “ʻI he taimi ʻoku ou fakatupulaki ai ha talēniti, ʻoku ou lava ʻo fakaʻaongaʻi ʻa e talēniti ko iá ke tāpuekina ʻaki ha taha ʻoku ou ngāue fakaetauhi ki ai.”
Naʻe akoʻi ʻe Sisitā ʻAukusito ʻa e founga hono ngaohi ʻo e lole sokoleti fuopotopotó, ki ha taha ʻo e kau fafine ʻoku vahe ke ne ngāue ki aí. ʻI he taimi ní ʻoku ngaohi mo fakatau atu ʻe he fefine ko iá ʻa e lole sokoletí ke tokoni ki he paʻanga hū mai ʻa hono fāmilí. Naʻe pehē ʻe Sisitā ʻAukusito, “Hili ha ngaahi māhina, naʻe tāpuekina au ʻi hano akoʻi mai ʻe ha fineʻofa ʻe taha ʻa e founga hono ngaohi ʻo e mā honé ke u lava ʻo fakatau atu. ʻE lava ke hoko ʻa hono fakatupulaki mo hono vahevahe hotau ngaahi talēnití ke faitāpuekina ai e moʻui ʻa e niʻihi kehé mo fakaloloto hotau ngaahi vā fetuʻutakí ko e kau fafine ngāue fakaetauhí.”