Kapau naʻá ku faingataʻaʻia fakaʻatamai, ʻe kei lava pē nai ke u ngāue fakafaifekau?

ʻIo. Ko kinautolu kotoa pē ʻoku nau “maʻu ʻa e ngaahi holi ke ngāue maʻá e ʻOtuá ʻoku ui … ki he ngāué” (Tokāteline mo e Ngaahi Fuakava 4:3). ʻOku ʻikai ke mahuʻinga ange e feituʻu ʻoku tau ngāue ki aí ʻi he founga ʻo ʻetau ngāué. Pea ko e tokotaha kotoa pē ʻoku fakakaukau ke ngāue fakafaifekau kuo pau ke fakakaukauʻi ʻa ʻene tuʻunga moʻui lelei fakatuʻasinó mo fakaeʻatamaí.

Kapau ʻokú ke maʻu ha loto-holi ke ngāue fakafaifekau, talanoa mo hoʻo pīsopé. Te ne lava ʻo tokoniʻi koe ke kamata hoʻo ngāue ke fakafonu hoʻo fōmú. Ko ha konga ʻo e ngāué kuo pau ke kau ai ʻa e talatalaifale mo e toketaá pea mo e kau mataotao kehé, kae pehē ki he kau taki ʻo e Siasí mo e mātuʻá. ʻOku ʻikai fakataumuʻa ʻa e ngaahi talatalaifale ko ʻení ke siviʻi pe ʻokú ke “lelei feʻunga” maʻá e ʻEikí ka ʻoku tokoni ia ke fakapapauʻi ʻa e ngaahi fili lelei taha ki hoʻo ngāué.

Ko e ui ki he ngāué ʻoku malava ke maʻu ia ʻe ha taha pē ʻoku loto-holi ke ngāue. Ko e uiuiʻi ʻokú ke maʻu ke ngāue ʻi ha feituʻu paú pe ʻi ha founga paú ʻoku malava ke makatuʻunga ia ʻi ha ngaahi moʻoniʻi meʻa kehekehe. Ko e taimi ʻe niʻihi ʻoku feinga ʻa e kakai ʻoku ʻi ai honau ngaahi faingataʻaʻiá (ʻo kau ai e moʻui lelei fakaeʻatamaí) ke fufuuʻi ʻa e fakamatala ko ʻení mei he fakafonu fōmú, ʻo nau fakakaukau ʻe tokoni ia ke nau maʻu ai ʻa e uiuiʻi ʻoku nau fie maʻú. Ka ʻo kapau te ke mātuʻaki faitotonu ʻi hoʻo hisitōlia fakaefaitoʻó (ʻo kau ai e moʻui lelei fakaeʻatamaí), ʻe faitāpuekina koe ʻe he ʻEikí. ʻOkú Ne ʻamanaki te ke fai ʻa ho tūkuingatá ke fakatupulaki hoʻo tuʻunga moʻui leleí. Pea ko e konga lahi ʻo e tokoni fakaefaitoʻo ʻokú ke maʻu ʻi ʻapí ʻoku malava pē ke hoko atu ia ʻi he malaʻe ʻo e ngāue fakafaifekaú.