Te u ikunaʻi fēfē nai ʻa e ngaahi ongoʻi tuenoá?

ʻĪmisi

girl with her head down

Laʻitā ʻa Kay Lynn Hodges

Fakatupulaki Ho Ngaahi Talēnití

ʻOku ou ikunaʻi ʻeku ngaahi ongoʻi tuenoá ʻaki ʻeku fakatupulaki hoku ngaahi talēnití, ʻo tatau ai pē pe ko ha meʻalea fakamūsika, ko ha meʻa ʻoku ou manako ai, mo e alā meʻa pehē. ʻOku tokoni ʻeni ke toʻo ai hoʻo tokangá mei he ongoʻi tuenoá, pea ko e taimi lahi ʻoku faʻa mole ai pē ia. ʻOku toe hoko foki ʻeni ko ha meʻa ke ke ʻiloʻi ai e niʻihi ʻoku tatau e meʻa ʻoku mou mahuʻingaʻia aí.

Sitīveni H., taʻu 12, Niu Mekisikou, USA

Fekumi ki he Māmá

ʻOku ou fekumi ki he tokoni, poupou, mo e ʻofa ʻa e Tamai Hēvaní pea mo e Laumālie Māʻoniʻoní ke u maʻu ʻa e nonga, ʻamanaki lelei, mo e mālohi ʻi he taimi ʻoku ou fakalaulauloto, lotu, pea mo lau folofola aí. Hangē ko ia ʻoku fakamatala ʻi he 3 Nīfai 11:11, Ko Sīsū Kalaisi ʻa e “maama mo e moʻui ʻa e māmaní.” Naʻá Ne hāʻele mai ke kapusi ʻa e fakapoʻuli kotoa pē.

ʻEnitulia B., taʻu 18, Sulia, Venesuela

Kumi Tokoni ki he Ngaahi Kaungāmeʻá mo e Fāmilí

ʻI he taimi ʻoku ou ongoʻi tuenoa aí, ʻoku ou saiʻia ke kumi tokoni ki hoku ngaahi kaungāmeʻá mo e fāmilí; ʻoku fakafiefia moʻoni ia kiate au. ʻOku ou sio ki he ngaahi tāpuaki ʻi heʻeku moʻuí peá u fakamālō ki he Tamai Hēvaní koeʻuhí ko e meʻa lahi kuó Ne foaki maʻakú!

Tali N., taʻu 16, ʻOlikoni, USA

Manatuʻi e Palani ʻa e ʻOtuá

ʻIlo maʻu pē ko e palani ʻa e ʻOtuá ʻoku ʻikai ke tau teitei tuenoa ai. ʻOku tau maʻu maʻu pē ʻa e Laumālie Māʻoniʻoní, pea ʻoku ʻafioʻi ʻe he ʻOtuá ʻa e meʻa ʻoku tau fekuki mo iá. Naʻe foua ʻe he ʻEikí ʻa e ʻahiʻahi mo e faingataʻa kotoa pē ʻokú ke fehangahangai mo iá. Ko e taha e ngaahi meʻa mahuʻinga taha ʻoku tau ongoʻi ʻi he moʻui fakamatelié ko e fiefiá, ka he ʻikai lava ke tau maʻu ʻa e fiefiá taʻe ʻi ai ʻa e mamahí (vakai, 2 Nīfai 2:11). Lotu ki he ʻOtuá ʻo kole ha tokoni; he ʻikai ke Ne teitei liʻaki ha taha ʻiate kitautolu. .

Poloki S., taʻu 17, ʻIutā, USA

Falala ki he ʻEikí

Naʻe faingataʻa ʻa e mavahe mei ʻapi ke u haʻu ki Palāsila ki heʻeku ngāue fakafaifekaú. Naʻe ʻikai ke u teitei lava ʻo lea ʻaki e lea fakafonuá! Ka naʻá ku ako kapau te ke maʻu e Laumālie ʻo e ʻEikí, he ʻikai te ke teitei ongoʻi tuenoa. ʻOkú Ne ʻafioʻi koe, pea te Ne tokoniʻi maʻu pē koe. Falala kiate Ia!

ʻEletā Siosefa Toleni, taʻu 20, Misiona Brazil Campinas