ʻOkú Ne Kei ʻAmaua Pē
Naʻe ʻamanaki ke u sila mo hoku husepānití, ka naʻe ʻikai ke ngata pē ʻa e ouau toputapú ni ʻiate kimaua toko ua pē.
Tā fakatātaaʻi ʻe Joshua Dennis
Hili ha taʻu ʻe fitu ʻo ʻema fakaʻamu mo e tatali ki ha fānaú, naʻe faifai pea tāpuekina ʻaki au mo hoku husepāniti ha ʻofefine. Naʻe hoko ʻa ʻAlisi ko e pele ia ʻo ʻema moʻuí, ka naʻá ne moʻui ʻi ha māhina pē ʻe nima kimuʻa peá ne mālōlō ʻi he niumōniá.
Ko e aʻusia faingataʻa taha ia ʻo ʻeku moʻuí. Ko e ʻaho kotoa pē ne u foki mai ki ʻapi mei he ngāué ʻo tangutu peá u tangi. Naʻe faʻa nofo mai hoku fāmili-ʻi-he-fonó ke fakalotolahi kiate au. Naʻá ku toutou lotua pē ke maʻu ha tama ʻe taha, ka naʻe ʻikai pē ha taha. Naʻe taumuʻavalea ʻeku moʻuí ʻi heʻeku loto-mamahí.
Naʻe kamata ke fakalotolahiʻi au mo hoku husepānití ʻe hoku fāmili-ʻi-he-fonó ke ma folau ki he Temipale Suva Fiji ke silaʻi ai kimaua. Kuo teʻeki ʻaupito ke ma ʻalu ki he temipalé, pea naʻá ma fakakaukau ko e founga lelei taha ʻeni ke ma maʻu ai ʻa e ʻamanaki leleí mo e fakamoʻuí.
Naʻe ʻikai ha meʻa te ne teuteuʻi au ki he meʻa ne u ongoʻi ʻi he ʻaho ko iá! Naʻá ku ʻiloʻi ʻe silaʻi fakataha au mo hoku husepānití ʻo taʻengata. Naʻe hoko ʻa e ʻilo ko ʻení ke u ongoʻi ai ʻa e houngaʻia mo e ʻofa. Ka naʻe teʻeki mahino kiate au ko e ouau toputapú ni ʻoku ʻikai ngata pē ia ʻiate kimaua toko ua pē.
Naʻá ku ʻilo ʻi he temipalé ʻe lava pē ke silaʻi mo ʻAlisi kiate kimaua. Naʻá ku tangi fiefia ʻi heʻeku ʻiloʻi ʻa e tokāteline toputapu ko ʻení. ʻE ʻamaua pē ʻa homa ʻofefiné ʻi he kotoa ʻo ʻitānití! ʻOku ou fakamoʻoni kuo ʻomi ʻe he ʻOtuá ʻa e meʻa kotoa pē ʻoku tau fie maʻú ke maʻu ai ʻa e fiefiá ʻi Hono fale māʻoniʻoní.
ʻI he ngaahi taʻu kimui aí, kuo tāpuekina ʻaki au mo hoku husepānití ha foha mo e fānau ohi ʻe toko tolu. Ka ʻoku ʻikai ʻaupito ke ngalo ʻiate kimaua ʻa ʻAlisi. Koeʻuhí ko e ngaahi ouau ʻo e temipalé, ʻoku hoko ʻa homa ʻofefiné ko ha konga ʻo homa fāmilí ʻo taʻengata.
Ko e taimi ʻoku ou fetaulaki ai mo ha taha kuo mālōlō haʻane fānau, ʻoku ou kaungā-ongoʻi mo kinautolu ʻenau mamahí. Ka ʻoku ou toe ʻilo foki ko e mamahi ko ʻení ʻoku ʻikai ko e ngataʻangá ia. ʻOku fakafou ʻi he mālōlō ʻa ʻAlisí, kae pehē foki ki hono foua e ngaahi faingataʻa kehé, ʻa ʻeku ʻiloʻi ʻoku kau ʻa e ʻOtuá mo aú. Ko e taimi ʻoku ou loto-foʻi pe lāunga ai fekauʻaki mo ha meʻá, ʻoku ou ʻiloʻi ʻoku ʻi ai maʻu pē ʻa e ʻOtuá.
ʻOku ou ʻiloʻi te u toe sio pē kia ʻAlisi, pea ʻoku hokohoko atu ke fakafonu ʻaki au mo hoku husepānití ʻa e fiefia moʻoní.