Faneva te Mitinare
Faneva e taraa te kawai ae rang korakora te kakamwakuri iai man wintoon ana auti. E kona n nooria aomata ni katiki aenika ni uanikai, raiti, kunnikai, ao bwaai aika raraoi ake a na kabonakoi. E kona n ongo tangin buun kaa ao kamea ni kaukau. Ngkanne e ongo te bwai teuana.
“Mama, iai ae karebwerebwe!” Faneva e wewete. Mama e kauka ana mataroa. Uoman mwane aika kairake a kabongana te tiute ao te neketai a tei i matan aia mataroa. Faneva e tuai n noora temanna ni kunnikai ae aron anne irouia kain rarikiia i Madagascar mai imwaina.
“Ngaira mitinare man Ana Ekaretia Iesu Kristo Ibukiia Aika Itiaki ni Boong aika Kaitira,” e taku temanna mai ibuakoia. “Ti reireiniia aomata taekan Iesu. Ti kona n tibwa te rongorongo nakoimi?”
Faneva e kukurei ngke e noora Mama bwa e butimwaia ni kariniia. Te utu ae bwanin a ikotaki n ongo taekan Iesu Kristo ao e kanga Ana Ekareteia ni manga oki nako aon te aba.
Imwiin te bong anne, mitinare a kawara ana utu Faneva n te tai ae mwaiti. A uota te boki ae aranaki bwa Karaki man Ana Boki Moomon. Faneva e tatangiria ni warekia ma ana utu!
N te bong teuana N na riki bwa te mitinare ao n tibwa Ana Boki Moomon ma tabeman, e taku Faneva ibon irouna.
Te tai teuana ngke a roko mitinare, a reireina ana utu Faneva aron te tataro. Faneva e reiakinna bwa e kona n taetae nakon Tamana are i karawa n te tai are e tangiria, n tabo nako.
N te bong teuana, N na riki bwa te mitinare ao n reireiniia aomata taekan te tataro, e iango Faneva.
N te bong teuana mitinare iai aia titiraki ae moan te kakaawaki.
“Ko na iira ana katooto Iesu Kristo ao ni bwabetitoaki?” temanna mai irouia e titiraki.
Faneva e namakina te kukurei inanona. “Eng!” e taku.
“Eng!”tarina ao Mama a taku.
Papa e taku bwa e tuai moa n tauraoi. Ma e nakoraoi irouna ngkana a bwabetitoaki nikiraia ana utu. Ao ngaia are a bwabetitoaki! Faneva e bwabetitoaki iroun temanna te mitinare are e reireinna taekan Iesu.
N te bong teuana N na riki bwa te mitinare ao ni buokiia aomata bwa a na bwabetitoaki, Faneva e iango.
Teuana mwakoron te riki bwa te membwa n te Ekaretia ae rang n tamaroa bon kaean te Moanrinan. Faneva e tatangiri waaki ni kakukukrei ao kaitiboona ma raraona aika a boou. Ma ae te bwai ae mamate nanona iai bon anenakin kuna n te Moanrinan. Te Tabati teuana n te Moanrinan, a anenea te kuna iaon tibwauaan te euangkerio.
“I a tangiria n riki bwa te mitinare ngkai,” e aneneia Faneva. “I aki tangiria n tataninga ni karokoa I ikawai.”
I kona ni waaki ni karaoi mwakuri ni mitinare ngkai, Faneva e a ataia. Ma I aki kona n tataninga ni karokoa te bong teuana!
Mai ikanne, Faneva e kakaai kawai are e kona n tibwa iai te euangkerio. E kataia n riki bwa te banna ni katoto ae tamaroa. E kaoia aomata nakon te taromauri. E buokiia kain rarikina. Imwiin tabeua te ririki, e a roko n te roro are e a kona n nako ma mitinare n reireiniia aomata n ana kaawa. Inanona tabeua riki te ririki, e a beku n ana mition—ni kaitibo ma aomata aika boou ao n tibwa te euangkerio, n ai aroia mitinare ake a tibwaia nakoina.