E Kaoka Arou are Mai Imwaina
Raraou e ongo ae I aoraki ao e kanakoa te bwai ni kanimnim ae karaoia ni mweengana ni kaonotia bon tii ibukiu.
Kamataata n te korotamnei iroun Joshua Dennis
I a tia n iangoia n tainako bwa ngai te aomata ae marurung. Ngaia are I tounako ngke I uti n te moaningabong teuana n namakina bwabwaau bwa e koonaki n te aro ae korakora ao e a kaan rebwetaua. I waekoa ni karinaki n te onaoraki, ma imwiin tabeua te aoa n tuoaki, taokita a aki kona ni kunea te kangaanga. A kaokai nakon mweengau, e ngae ngke I bon korakai n te maraki. Anne are e a waaki iai itiua te namwakaina ni bontaeka ma taokita, n tiku n te onaoraki, ao te maraki ae korakora are I kona n namakinna inanon maiu.
I a moanna n rang n nanokawaki. I a kaaki au reirei n te kaoreti ao Ia mwaing nakoia au karo. I aki kona n otinako nakoia raraou. I kainnano ni maraki ngkana I karaoi au takakaro ake I tatangiri. I namakinna bwa bwaai ni kabane ake I tabeakini—au kouru, au iraorao, au tarena—e a namakinna bwa e aki kona ni karaoi bwaai ake e taneiai ni karaoi ao e aki ataia bwa e na kanga ni manga okira arona are mai imwaina. Ao I a moanna n titiraki: E kanga ni kariaia Tamau are i Karawa aei bwa e na riki nakoiu? E bon tangirai?
Imwiin manga te bontaeka ae kamarakinano man kammaraki, te bwai are I tii tangiria ni karaoia bwa N na bwaoua inanon te booro ao n tang. Ma ngke I roko n au auti, I noora te bwai ae raka iaon te tabo n rin: te bwaoki ae e a mane ae nnen te kau ae niiraki n te teibi ao e kanakoaki nakoiu.
Te reta iaon te bwaoki e kaotaki bwa te bakete e roko mairoun temanna raraou. E ongo neiei ae I aoraki ao e tangiria ni kakukureiai. Ngke I kauka te bwaoki ni kau, I kunea bwa e onrake ni mwakorokoro aika a uarereke n Titairoboom. Bon te bwai ni kanimnim ae karaoaki man te mweenga bon tii ibukiu.
Ngke I a ikoti ni kanimwi ni kabane, I a bon rootaki n te tang. Te bwai ni kanimnim e korea arau, ni katobibiaki n rongorongo aika tangiraoi ao rongorongo n tangira ao ni kaunganano. I namakinna bwa mwakorokorou ake a uamae n te tai aei a bwanin ngke I kanimnimi ana bwaintangira raraou.
Tabeua te tai imwiina, I a waaki ni butimwaai bwainaoraki are a kauarerekea kanikina n te aoraki are ea buokiia taokita ni kona ni katoki. E reke irou te aoraki ae aki bati n ririki ma e kona ni katokaki, ao ni bwainaorakiana are e kaitara, I a kona n okira marurungiu.
Riki ngkai e a kamaoaki rabwatau, I ataia bwa I bon aki kona ni mwaninga te bwai are I a tia n reiakinna. Ibukin ana bwaintangira raraou ae tatangira, I ataia bwa I bon tangiraki ao Tamau are i Karawa e bon aki mwaninga taekau. Imwiin namwakaina n namakina te aki rau, te kakaitau nakon ana akoi raraou ao ana tangira Tamau are i Karawa, I a manga okira marurungiu are mai imwaina.