Reirei ibukin te Mwakuri n Ibuobuoki
Te mwakuri n ibuobuoki rinanon aia Burokuraem Ataei ao Kairake
Kaoakiia tabeman bwa ana rikirake ao buokaia inanon kawaia bon te bwai ae kakawaki n te mwakuri n ibuobuoki.
Korotamnei iroun Tom Garner
Reken te tai ibukin te mwaiti ae bubura n te mwakuri n ibuobuoki rinanon aia burokuraem Ataei ao Kairake. Tao iai am ataei ke kairake aika oin natim ni mweengam. Tao ngkoe te tia kairiiri n te burokuraem ke am mwakuri n ibuobuoki nakoia am utu ao kairake. Ke tao ko ataia tabeman ataei ao kairake (are e riai n rotiia ae e kaniia ngaira ni kabane). Bwa tera am kaangaanga ae na kona n reke, a mwaiti kawai ni kabongana te burokuraem ke reirei ni kakabwaiai maiuia tabeman.
Karikirakean Arora ni Kabane
Ngkai boton aia iango Ataei ao Kairake bon katakiia ni katoabong bwa a na riki n aron te Tia Kamaiu, are e ibuobuoki ma te kororaoi. A mwaiti mai ibuakoia naake a tia n ira te burokuraem a tia n reiakinna ae rikirakem n taabo aika kakaokoro ni maium, ao e na nakoraoi riki arom n buokiia ke n ibuobuoki nakoia tabeman.
Ma ana burokuraem te Ataei ao te Kairake, kakabwaiakiia tabeman e na aki tatanginga ni karokoa ko a tia n reiakina te bwai teuana. Te mwakuri ni kamatebwaiaia e karekea te tai n ibuobuoki.
Ibukin te ataeinimwaane ae arana Prophet ae maeka i Ghana, e katea te kouru irouia Ataei ao Kairake bwa ana reirei aron katangan te biano ai tibwa bon moana. “Bon au kouru bwa n na buokiia naba tabeman bwa ana ataa te bwai ae I reirei iaona,” e taku Prophet.
E ngae ngke e tuai n riki bwa te tia reirei, e a tia ana kouru ni kaman rikirake nakon te bwai teuana ae bubura riki nakon are e iangoia. Iai ngkai 50 ataein te reirei ake a irii kiraati n te biano n te auti ni bootaki n raonaki ma Prophet. Ao ti ngaia ae reireina Prophet ao ataein te reirei aika 50? Alexander M. ao Kelvin M., 13 aia ririki ni kauoman. “Ti tangiria ni kaota te mwakuri n akoi nakoia aomataa ake tabeman,”e taku Kelvin.
Teniua te bong n te wiiki kairake aika uoman a reirei te reirei n te biano n akea boona nakoia ni kabane ake a roko. Iai riki bwaai aika a karinaki nakon reirein te biano. Tabeman mai ibuakoia ataein te reirei ake a kabwarabwaraaki nakon te Ekaretia rinanon reirein te biano imwiina a reirei taekan te euangkerio ao a iangoia bwa ana bwabetitoaki.
Ngkana ti kekeiaki ni kanakoraoira, ti kona n ibuobuoki nakoia tabeman man kaoakiia bwa ana raoniira.
Korotamnei iroun Jonas Rebicki
Te Kawai ae Kakukurei ibukin te Mwakuri n Ibuobuoki
Ngkai te beretitenti n te Moanrinan, Sabrina Simões Deus Augusto ae kaain Curitiba, Brazil, e a tia n noora aron iteran te burokuraem ni kakabwaiaia ataei ao kairake n ana titeiki. Ma e a tia n noori kawai aika mwaiti ni kabongana te bwai ae a tia n reiakinna n rikirakena n tabena ae te titita n ibuobuoki.
“Ngke I karikirakea te tarena,” e tkau Titita Augusto, “I kona ni kabongana te tarena anne ni kakabwaia temanna ae I karaoa te mwakuri n ibuobuoki nakoina.”
Titita Augusto e reireina temanna te titita are e na reireinna aron karaoan te tiaokureti. Te titita anne ngkai e a karaoa ao ni kaboanako te tiaokureti ni buoka te karekemwane n ana utu. “Namwakina imwiina, I kakabwaiaki ngke temanna te titita e reireinai aron karaoan te kariki te aani are n na kona ni kabooa nako,” e taku Titita Augusto. “Karikirakean ao tibwauan ara tarena e kona ni kakabwaiai maiura n tatabemaniira ao ni kakorakora aron ara reitaki bwa titita ni karaoa te mwakuri n ibuobuoki.”