Autinibootaki—Taabo ni Karinerine ao n Nebonebo
Iroun Bitiobi Dean M. Davies
Te Moan Kauntira n Tararua n te Bitiobiriki
Tamnein te Uea e mena n ara autinibootaki ao e na kaungaira ngkai ti karaoi arora ni karinerine i matana.
Raou ni mwakuri ae kakaonimaki e tibwaia ma ngai te bwai ae rinanona are e a tia ni kakoroa iai nanon katabeana ni kanakoi kaintekateka ao ni bairea raoi te tienta imwiin te maungatabu n te maungatabu. Imwiin 30 te miniti ni karaoan mwakuri aikai, e a ataia bwa ngaia te kabanea n aomata ae tiku n te kateitei. Nakon namakinan te maroa ao te katawe n nako, n onean mwiina, e namakinna te tamaroa n te rau are e a tia n namakinna n tain te maungatabu e tiku irouna ao e tabe n rikirake riki.
Ngke e bane tabena ao e otinako man te autinibootaki, e kaitibo ma te membwa temanna are e tara ni kamwataua taraakina. N ataakin te bwai ae karaoia raraou, te membwa aei e anaia mai baina man taku, “Tariu, te Uea e noori bwaai aika a uarereke ake ko karaoi ibukina, ao e tara naano ao moangare iai.”
Ririki imwina ngke e beku bwa te bitiobi, raraona naba aei e kunea n tiku n tii ngaia n ana autinibootaki n ana uoote. Imwiin tiringan taura n te umwantabu, e tei inanon tabeua te tai ngkai otan namwakaina e ota rinanon winto nako aon te tabo n taetae.
Te namakina ae taneiai iai ae rau e rabunna, ao e tekateka ni kaan nako matan te umwantabu ao n iango n te tai ae kamimi ae tabu are e a tia n namakinna n teina anne—angiin te tai are e nooria ibonga n urua te kariki n tain te taibora n toa, taai are ngke e namakina iai te Tamnei ae Raoiroi n raonna ngkai e taetae n te maungatabu n ana uoote, te taromauri ni bwabetito ake e a tia ni kairii, te kuaea ae tamaroa ake e a tia n ongongo, ao angiin koaua mairouia membwa n te uoote ake e a tia n riingaki nanona iai n ae nene. N tekatekana n ti ngaia n te roo n te umwantabu, e namakina bwa e taonaki n bitaki aika a mwaiti man taneiai inanon maiuna ao ni maiuia membwa n ana uoote, ao e kabobaraaka atuna ni kakaitau.
Raraou e a tia n iangoraoi ao n reireiaki raoi bwa tabo aika a tabu iaon te aba bon te tembora ao te mweenga, ma rinanon taneiai aika uoua aikai ake a taekinaki i eta, e ata naba aron ara autinibootaki ae tabu. Ibukina bwa a katabuaki irouia nakoanibonga aika kariaiakaki, tabo aikai a riki bwa taabo ake e kabwaroi iai kaotioti te Uea nako aoioa ana aomata n te aro are “e kaotaki mwaakan te aro n Atua ” rinanon otenanti ake a karaoaki ikekei (taraa Reirei ao Berita aika Tabu 84:20).
Autinibootaki n ikotaki ma mweenga a uota te kimwareirei are e taekinaki n te berita nakoia aika Itiaki aika kakaonimaki ake a kona n namakinan n te bong ae te Tabati. E a riki bwa te tabo are membwa a bootaki iai n taromauri “a na botaki nanoia n te nano ae ti teuana i nanon te tangira imarenaia.” (Motiaea 18:21) ao nakon te Tia Kamaiu. Ibukira bwa tina anga te kakaitau ae riai ao te karinerine ibukin kabwaroan kakabwaia n te maiu n tamnei are e roko iaora rinanona ara autinibootaki, ti riai n rin n taabo n nebonebo aikai ma te naua ni kakaitau ao ni karinerine.
Nanon te Karinerine
Inanon katein ara Ekaretia n taai aikai, te taeka karinerine e a tia n rang n irekereke ma te taeka kainabwabu. Ngkai tangin bwana aika beebete a bon tau ibukin ara umwantabu, tarakin aei e karinerine e kabwaka ni kabwaninan raoi nanon te taeka. Karinerine e kona ni kairaki nakon te weabe n Ratin revereri, are nanona n “n tei ni mimi.”1 Ti kona ni karekea te teem ae kona ni kabwarabwara raoi riki te namakin inanora ngkana ti iangoia ni koaua te bwai are e a tia ni karaoia te Tia Kamaiu ibukira n tatabemaniira?
I kauringaki n taekan te kuna n taromauri ae rang tikiraoi are ti aneneia ngkai ti mena n te umwantabu: “I stand all amazed at the love Jesus offers me.”2 Te namakin ae tamaroa ni kakaitau, nebonebo, ao ni mimi bon akanne kabwarabwaran te karinerine, ao e kaotia nakoira bwa tina totokoi aekakin nako taetae ao anua ake a kona ni kabuai namakin akanne mai iroura ke tabeman.
Tamnein te aine n te bwabete iroun Tiffany Myloan Tong
Autinibootaki ao te Bong ae te Tabati
Man kaotioti ni boong aikai, ti ataia bwa boton ara nebonebo n te Tabati bwa “te nakon te auti n tataro ao ni karaoi [ara] toa n ana bong [te Uea] ae tabu” (Reirei ao Berita aika Tabu 59:9). Te “auti [n] tataro” ake ti bobotak iai n te Tabati bon ara autinibootaki aika a tabu.
Beretitenti Russell M. Nelson e a tia ni buokiira ni kaotaira riki n te reitaki imarenan ara karinerine ibukin te Tia Kamaiu ao ara namakin nakon te bong ae te Tabati. N tibwauan oin ana taneiai ni karinean te bong ae te Tabati, Beretitenti Nelson e kaotia, “I reiakinna man koroboki aika a tabu bwa arou ao anuau n te Tabati e irekereke ma te kanikina imarenau ma Tamau.”3
N ai aron arora ma anuara n te Tabati bon kanikina n ara kakaonimaki nakon te Uea, ara taetae, anuara, ao bon tein oneara ngkai ti mena n te auti n tataro n aron are e kaotaki n tein te karinerine are ti namakinna ni kaineti ma te Tia Kamaiu.
Autinibootaki ao Otenanti
Unimwaane Jeffrey R. Holland man te kooram n Abotoro n te Tengaun ma Uoman e a tia ni kamatata otara iaon te kantaninga aei, ni kangai:
“N raonan karekean riki ara tai ae mwaiti n te kaetieti n te euangkerio are e boboto iaon te mweenga, ara taromauri n te Tabati ae karakaaki … e katuruturua te toa n ana Katairiki te Uea bwa e tabu, kinaaki bwa boton ara waaki n nebonebo ni katoa wiiki are tia taneiai iai. Ti riai n uringnga n te kawai ae te kabanea n onoti bwa e mate Kristo man rawawatan te nano ae uruaki are e rangi ni matoatoa ao raraoman Tamneina e reke man uotan aia bure ao rawawataia ao marakiia aomata nako.
“Ngkana ti anganano n te uota ane kaangaanga anne, ni kaota ara karinerine ibukin te mwakuri anne.”4
E kakaawaki bwa tina uringnga bwa te tabo are e rineaki ibukin te tai ae kakaawaki ni karinerine nakon te Tia Kamaiu bon te umwantabu are ara autinibootaki. N raonaki ma te karinerine are ti namakinna n tain karaoan te otenanti n toa ni katoa wiiki, ara namakin n nebonebo ao ni karinerine a kaotaki ngkana ti iangoi otenanti ao kakabwaia n te nakoanibonga ake tabeua ao otenanti ake a karaoaki n te autinibootaki, n raonaki ma aranakin ao kakabwaiakiia ataei, bwabetito ao te kamatoa, kamatoakiia nakoanibonga, ao karaoan te kaokoroaki ibukin te wewete. Otenanti ao kakabwaia n tatabeua nako a kona n raonaki ma namakinan te Tamnei ae Raoiroi ngkana naake a karaoi ao naake a iria a roko ma te anua n nebonebo ao ni karinerine.
Tamnei iroun James Iliff Jeffery
Autinibootaki ao Nebonebo
Te bong ae te Tabati e karekea nakoira te tai n neboa te Uea inanon ara kamatebwai n te mweenga ao ni bootaki n taromauri inanon ara toa ao bootaki tabeua. Man taai ake ngkoa n te Ekaretia, aika Itiaki a tia ni kakukureiaki n ikotaki ni inoono ao ni karekea te reitaki n tari imarenaia mwane ao aine. Ara autinibootaki a bon kateaki ma tabo ake a kona ni karaoaki iai waaki ni kakukurei akanne inanon te wiiki. Ti riai n aki kabuai taraakin oin te kantaninga ibukin kateitei aikai, e ngae n anne, tabo ake a katauraoaki bwa tabo n nebonebo.
Nebonebo ao karinerie a bon rang n irekereke. “Ngkana ti taromauriia te Atua, ti nakoina ma te tangira ni karinerine, nanorinano, ao te nebonebo. Ti karinea ao ti butimwaia bwa ara uea ae te King, te Tia Karika te aonaaba, Tamara ae tangiraki ao te Tama ae akea tokin ana tangira.”5
Te kantaninga aei ae boboto iaon te nebonebo e riai ni kairi arora inanon autinibootaki riki ngkan ti kabaeaki inanon waaki n inono ke ni kakukurei. Te tararua ae korakora e riai ni karaoaki ni kauarerekea te mangaongao, te raeuaki, ke te urubwai nakon mwakoron te kateitei are e reke man waaki ni kakukurei n te Ekaretia, ao a riai ni karaoaki mwakuri ni kaitiaki ao n onobwai n tain te waaki ngkana e riki akanne.
Ataei ao te Roronrikirake a kona n reireinaki bwa te karinerie ao tararuan autinibootaki e raka riki nakon bootaki n te Tabati. Rokoia membwa ni kaitiaki n autinibootaki—riki te uaia n reitaki kaaro ao naati—bon te bwai ae tamaroa ni karikirakean namakinan te karinerine ibukin ara kateitei aika tabu. N aron ar e kakoauaki man te bwai are e rinanona raraou ni kaetan ana tienta n te titeiki imwiin te maungatabu, te mwakuri n tararua ibukin te autinibootaki bon te aro n nebo ao kaoakin Tamnein te Uea.
Tamneia membwa aika a tei i tinaniku iroun Massimo Criscione
Autinibootaki ao te Tia Kamaiu
Ian ana kaetieti n ana taetae ni burabeti Beretitenti Nelson, mwakuri aika a kakaawaki a karaoaki bwa e na kakoauaki bwa aran Iesu Kristo e aki kanakoaki ngkana ti kaineti nakon Ana Ekaretia. N te aro naba anne, ti riai n aki kariaia kanakoan te Tia Kamaiu mai nuukan ara nebonebo—n raonaki ma ara tabo n nebo.
Ti a taneiai ni kaineti nakon te tembora bwa a na auti te Uea, are bon ngaia raoi te tabo ae eti man kakaawaki. Ti kona ni kakai mwaninga, e ngae n anne, bwa ni katoai ara autinibootaki a bon katabuaki irouia nakoanibonga ake iai te kariaiakaki irouia bwa te tabo are e maeka iai Tamnein te Uea ao aia tabo natin te Atua—ni kauoua naake inanon ao i tinanikun te Ekaretia—kona n roko “ake a reke irouia ataakin aia Tia Kaboia” (Mosiah 18:30).
Te katanoata are tibwa nako ni moana katamaroan ara autinibootaki ma mwakuri ni korotamnei ake a karinerine ni kaota te Tia Kamaiu ao waaki mai karawa n Ana tai ni maiu ao n te maiu are imwain te maiu aei e kateaki bwa e na katiki matara, ara iango, nanora ni kaan riki nakoIna. Ngkai ko rin inanon auti n tataro ibukin boowi ao waaki ni kakukurei, ti butimwaaiko n tei, taraia, ao n iangoi korobanna aika a tabu aikai, ni taraia ma natimi, ao ni karekea rakan ami namakin n nebo ao ni karinerine nakon te Atua.
Te burabeti n te O-Tetemanti e taekinna, “Ma E mena Iehova I nanoni maneabana ae tabu: ke a bane kain aonaaba ni kainababu i matana” (Habakkuk 2:20). Tina uringnga naba bwa Tamnein te Uea e mena n ara autinibootaki ao e na rin inanora n tatabemaniira nakon te aro are e tina kairi arora ni karinerine i matana.