“Iai Am Boki ae Buru ma Koroboki Iaona Aika Koora?”
N tabetai imwiin are I karenakoa te boki, I rangin n ingainga ni kan ataia bwa tera are koreaki inanona.
Kamataata n te tamnei iroun Greg Newbold
Inanon ririki aika nako, I karekea te boki ae buru ma koroboki iaon tinanikuna aika koora mairouia mitinare aika a beku n aia tabo tautia are I karekea au kataneiai ibukin au mwakuri n te United States Navy.
Ngke I moanna ni wareka te boki, iai temanna ae tuangai bwa e taku bwa e kewe bukina bwa e kaobinaki man te Baibara. E karika nanououau te bwai aei iaon koauan te boki, ma I bon taua. I warekia teutana, I katikua inanon au baeki ae bubura, ao ni mwaninga taekana.
Ngke e a raka iaon teuana te ririki, I iangoia ni kaitiaka au baeki ae bubura arei. I kunea te boki ma ai bon akea nanou iai, ngaia ae I a karenakoa. Ma tabeua te tai imwiina, e rikirake nanou ni kan ataa kanoan te boki arei ma korobokina aika koora. I kakoaua ngkai bwa te namakin aei e roko mairoun te Tamnei, “are e kairiiri nakon karaoan te raoiroi” (Reirei ao Berita aika Tabu 11:12).
N 2005, raoraou ae boou e kaoai bwa n na ongora nakoia mitinare. N te moan n tai, iai au titiraki ao nanououau ni bwaai aika anga reirei iaona, ma a rangin n tauraoi mitinare ao a anga kaeka aika a nakoraoi irou.
Ngke I kunea bnwa mitinare aikai bon ti tebo ma ake I kaitibo ma ngaia inanon ririki aika nako, I titirakiniia ma te ingainga n nano, “Iai ami boki ae buru ma korobokiana ae koora itinanikuna?”
“Eng, iai iroura!” e kaeka temanna mai irouia. “E atongaki bwa Ana Boki Moomon!”
E rangin n ingainga nanou ni manga karekea Ana Boki Moomon. Ni koauana, e rangin n ingainga nanou ngaia ae I warekia n ae raka iaon teuana te tai n te maan ae kee iaan uoua te wiiki! Ngke I wareware ao n tataro, I a ataia raoi ae bon ana taeka te Atua.
Unimwaane Rubén V. Alliaud man te Itingaun e taekina te bwai teuana man te maungatabu ni kabuta ae kaineti ma au taneiai ma Ana Boki Moomon: “Te tia wareware ae kabanea ana tai ni kamatebwaia raoi [Ana Boki Moomon], ma tamnein te tataro, e na aki ti reiakina taekan Kristo ma e na reirei mairoun Kristo—riki ngkana a karaoi aia babaire ni ‘kataa tamaroan te taeka’ [Aramwa 32:5] ao n aki moantaai n totokoia ni kaineti ma aki onimakinan bwaai aika a tia n taekin tabeman ibukin bwaai aika a tuai man wawarekia.”1
Man warekan ana Boki Moomon, n te tataro, ao onimakinan te Tamnei, I a tia n noori bwaai aika tamaroa n roko inanon maiu.