Neie Ti Teimatoa N Natinna
Ngai ma kainnabau tina kabaeaki, ma te otenanti ae tabu aei e rang bubura riki nakoira ngaira ni kauoman.
Kamataata n te korotamnei iroun Joshua Dennis
Imwiin itiua te ririki ni kantaninga ao n tataninga reken natira, kainnabau ao ngai ti a kakabwaiaki n reken natira te aine. Alicie bon te ota inanon maiura, ma e maiu tii inanon nimaua te namwakaina imwain ae mate n te niumonia.
Anne bon te namakin ae moan te matotoa inanon maiu. Ni katoabong ngkana I oki ni mwakuri N na bae n tekateka n tang. Butikau a tekateka n raonai n anganai te kakorakoraki. I teimatoa n tataro ibukin natiu riki temanna, ma akea ae reke. I bua inanon te nanokawaki.
Butikau a kaungaai ma kainnabau bwa tina mwananga nakon te Tembora i Suva Biti bwa tina kabaeaki. Ti bon tuai man roko n te tembora, ao ti baireia bwa aio bon te kawai ae tamaroa ibukira ni karekea te kantaninga ao te kamarurungaki.
Akea te bwai ae e kona ni katauraoaki ibukin te bwai are I namakinna n te bong anne! I ataia bwa kainnabau ao ngai tina kabaeaki n akea tokina. Te atatai aei e kaonai ma te kakaitau ao te tangira. Ma I tuai n ataia bwa te otenanti ae tabu aei e korakora riki nakon are ti ngaira uoman.
N te tembora, I a ataia bwa Alicie e kona ni kabaeaki ma ngaira. I tang ma rannimata ni kimwareirei ngkai I a ata te reirei ae tabu aei. Natira te aine bon natira n aki toki! I kakoaua bwa te Atua e a tia ni katauraoi bwaai ni kabane ake ti kainnanoi ibukin kukureira n Ana auti ae mimitong.
N ririki ake imwina, kainnabau ao ngai ti a tia ni kakabwaiaki n reke natira te mwaane ao teniman ake ti tabekiia. Ma ti aki kona ni mwaninga taekan Alicie. Ibukin te otenanti n te tembora, natira te aine bon mwakoron ara utu n aki toki.
Ngkana I kaitibo ma temanna are e a tia ni mate natina, I namakina marakiia ma ngaiia. Ma I ataia naba bwa te maraki aei bon tiaki te toki. Rinanon buan Alicie, n aron naba rinanoan katakiia tabeman, I ataia bwa te Atua e mena ikekei ibukiu. Ngkana e bwara nanou ke ni ngurengure ibukin bwaai, I atai bwa te Atua e mena ikekei n tainako.
I ataia bwa N na manga noora Ailicie, ao te koaua anne e reitinako ni kaonai ma kainnabau n te kimwareirei ae bati.