Ana Mwakuri n Ibuobuoki Marta ni Katoabong
Te tina ma natina te aine aio a nang mwakuri korakora bwa a na uaia ni maiuakina te euangkerio. Ao Marta e maiuakinna man ana mwakuri n ibuobuoki nakon tinana n aanga aika a onoti.
Te Tamnei iroun Leslie Nilsson
Marta bon 11 ana ririki ni maiu mai Portugal, ao aekaia ataeinnaine aika rorona, ao e tangiria ni kabanea ana tai ma raoraona, n amwarake, ao n takakaro ma ana taore. E kimwareirei naba ni kabanea ana tai ma tinana. Ma maekana ma tinana nanona bwa Marta e kaokoro maiuna ma ataei tabeman.
Tinan Marta, Sonia, e bungiaki ni mwauku are e karika iai ana kanganga n nakonako. E aki n ae a bon boo itera, ma e bon kainnanoa ana bwai n nakonako. E aki kona ni karina oneana I bon irouna, n tebotebo irouna, ke n nako n ana kainiwene ni matu I bon irouna. Aio are e bon kanganga irouna bwa e na maeka tii ngaia. Marta e bon kakaraoa ana mwakuri n ibuobuoki nakon Sonia man ririki aika a nako man buokakina ma bwaai aika e aki kona ni karaoi I bon irouna.
“I teteimatoa ni kakaitiaki taabo ake I takakaro iai ke ni mwakuri bwa e aonga n ae e bebete iroun tinau bwa e na kakamwakuri inanon te auti,” e taku Marta. “E rereke naba au tai ni mwaawa man te takakaro bwa I aonga n tuoa tinau ao n nooria ngkana iai te bwai ae e kainnanoia. Ngkana I takakaro ao e wewete, n na bon biri ni kawaekoa bukina bwa iai te bwai ae e kataweaki.”
Ma Sonia e kataia ni kamaiuraoia Marta n aron are e kona. Ngkana Sonia e aki kainnanoa te ibuobuoki, e na taraia raoi bwa Marta e na reke ana tai n takakaro ma raoraona.
Maiuakinan Aia Onimaki
Marta iai tabena ni maiuakina te euangkerio ni katoa te bong man ana mwakuri n ibuobuoki nakon tinana. E karaoi taabe aika a rawata aika aki tataneiai ni kakaraoi ataei ake tabeman. Ni katoatai, e utimwaaka ni buoka tinana ni katauraoia n nako ni mwakuri ao imwain nakona n reirei. N akean ana ibuobuoki Marta, Sonia e aki kona ni kakamwakuri ke n nako ni mwakuri ni katoa bong.
Marta ao Sonia a kaai n nako ni kaea te taromauri. Sonia e bwabetitoaki ngke waniua ana ririki ni maiu, ai ngaia are e a rikirake Marta bwa kaain te Ekaretia. Sonia e reireina Marta aron kakawakin te euangkerio ni katoa bong. Teuana te kawai ae e karaoia bon katekean tamnein Iesu Kristo inanon mweengaia.
“I kakoaua bwa te Atua e maiu ao Iesu Kristo e bon maiu.” e taku Sonia. “Ao I tangiria ni kabane ake a kawara au auti bwa a na ataia bwa te onimaki e rangi ni kakawaki nakoiu. E bon kakawaki naba aio nakoiu bwa n na reireina Marta bwa e na ikawai rake ma te oota iroun Iesu Kristo.”
Marta e tauii bwaai ake e a tia n reiakin mairoun tinana ao n teimatoa n reiakina riki te euangkerio I bon irouna. Teuana te kawai ae e tangiria ni kan reiakinna iai bon man warekan koroboki aika a tabu, are e buokia ni karikirakea irekerekena ae korakora ma Tamara are I Karawa ao te Tia Kamaiu. “Ngkana I wareki koroboki aika a tabu, ao I namakinna ae Kristo e mena irarikiu ,” e taku.
Kunean te Rau
Ngkai e bon kona ni kaangaanga inanon katabetabe aika a mwaiti, te nako n taromauri ni katoa wiiki e buoka Marta ni kunea te rau are e na kateimatoa iai ni buoka tinana. “Ngkana a taekina te tataro ni moan ao n tokin te bootaki n toa, e bon rang n rau” e taku. “Ngkana I mena ikekei, tabetai I namakinna ae titebo bwa Tamara are I Karawa e tuangai bwa ngai te aomata ae tamaroa are n na teimatoa n riki bwa te aomata ae tamaroa ibukin buokan tinau.”
Ngkana e namakina aio n taai tabetai, ao e kauringaki bwa e rangi ni kakukurei arona nakon tinana. E namakinna bwa Tamara are I Karawa e karuoi anera bwa e na boutokaia. “I taku bwa E kakorakoraai bwa n na uti ao ni kukurei ao ni kakatonga iroun tinau,” e taku Marta.
Teuana mai ibuakon te bwai ae a kaai n tia n reiakinna Sonia ao Marta bon te maiu ae e aki bebete ke ni kororaoi—ibukiia tabeman. E taku Sonia, “Akea mai ibuakon rawawatau aika a karika nanokawakiu. I ataia bwa e a tia te Uea n anganai irikou ao raraau ao riiu are karika mwaukuu bukina bwa I rangin ni kaokoro, ao te Uea e tuangai bwa I bon kona uotau. I karaoa au kabanea n tamaroa. I kona ni karaoa ae bati riki, ma n te bong aei ao I RAOIROI moa bon irou. I kakatonga n te bwai ae I karaoia, bwaai ake i a tia ni karaoi, ao bwaai ake n na karaoi n te bong are imwiina.”
Marta e ataia naba bwa a na bon waaki raoi bwaai, e ngae ngke e na kona te maiu ni kaangaanga n taai tabetai inanon ana tai n tararuaa tinana. E nooria bwa iai kakaokoron aia taneiai n tatabemaniia nako. “Akea temanna ae kororaoi maiuna,” e taku. Ma e ngae iai oin ana kaangaanga, Marta e teimatoa n kunei bwaai aika a raoiroi ni katoa te bwai ae riki—te irekereke imarenana ma tinana bon teuana te banna ni katoto. “Iai tokin korakoran rabwatan tinau, ma ana iango ma ana namakin e bon rang n tamaroa. Ngaira bon raao aika raoiroi.”
Taratara n Taai Aika Imwaaira
Ao tera ae na riki n taai aika a na roko ibukin Marta ao Sonia? E taku Marta, “I tangiria ni memena irarikin tinau, ao e koaua ae I tangiria ni kan mare, ni karekea natiu, ao ni kareka au utu. Ma n taai aika a na roko, ngkana I kona, ni karekea te auti ibukin au utu ma tinau bukina bwa I nang rawa n raroanako mai irouna e ngae ngkana tii teuana te bong!”
Sonia e namakina te kukurei ibukin taai aika a na roko naba ao n teimatoa ni kakaitau ibukin ana reitaki ao ana tangira Marta. “E bon kakukurei aron reken te nati te aine ae e tamaroa. E nang tamaroa ngkai iai Marta inanon maiu. Bon te bwaintangira mairoun te Atua. E katauraoa Marta bwa e na tiku ikai ma ngai.”