Naano Aika Rotaki n te Ikoaki ae Nano: Te Mataata n te Bwainikiriinaki inanon te Utu

Iroun Jason B. Whiting, PhD

Brigham Young University Reirei ni Maiun te Utu

Baeten aika aki marurung a kona n rikirake inanon aekakin nako te reitaki. Ataakiia e kona ni kaotaraea te bwanikiriinaki ke ni katokia imwain ae e waaki.

Tamnei a kabonganaki ibukin ti kabwarabwarakina, katokaaki irouia maotoo

N te tai ae tuai ni maan I weteaki iroun te karo ae uruaki nanona. Natina te aine Jenna (te ara e a tia ni bitaki) e reirei n te kaoreti ao e a tibwa iraorao, ao e rang n tawe arona ni waaki nako ma raona. Raona, Jake, e rang kairoroa te mare ao e tiana ana reitaki Jenna ma ana karo. Jenna e kabwarabure nakoia, ni kabwarabwara bwa bon nanon Jake n tangira ae korakora ao ni kan kabanea aia tai n taanga.

Ana utu Jenna a moanna n raraoma ngke a kunea bwa iai buun Jake mai imwaina ao natina are e tuai ni kaotia nakon Jenna. A wetea buuna mai imwaina, are e taku bwa Jake iai anuana ae buakaka ao e rang kokooko. Ngke e a ataia Jake e a moanna n rang n un. E taku bwa ana karo Jeena a “tauaninne” ao e taekina te tai are aki kukurei iai n ana manikangare are e taekinna ni wanawanan Jenna. Jake e kabitara n taekinna bwa Jenna e karaoa oin ana babaire bwa e na katoka te reitaki ma ngaiia. Ana karo Jenna a rang n raraoma ngkai aia tareboon ao aia tekiti a bon aki kakaekaaki.

Aomata ni kabane a tangira te utu ae kakukurei, ma riki ngkana aomata a kataia ni maiuakina te euangkerio, te reitaki e kona n rang kammaraki. Tabeua kangaanga a riki imwiin te aki oota ao te kauntaba irouia utu n aron ae ririki. E ngae n anne, inanon mweenga aika nakoraoi, aomata a kabwarabure ibukin anuaia aika aki raraoi ao a kanakoraoa te reitaki, ma n aro aika aki nakoraoi, iai waaki aika a kakaraoaki aika kateibuaka ke n ribuaka are e kona n riki bwa te mwakuri n iowawa.

Mwakuri n Iowawa n te Mweenga ao te Euangkerio

“Kam a tia n uru nanoia buumi aika a raraoi, ao ni kaakea karineami irouia natimi” (Iakobwa 2:35).

Kanoan te mwakuri n iowawa te kan kaikoaki ke te tauaninne. Iai inanona anua aika a mwaiti ake a kona n raonaki ma te bakaine, mwamwanaa te aba, wii ni kabuakaka, ao te oro ke mwakuri n tangako.¹ Ma te kanganga, anua n iowawa a bon ririki, ma irouia tabeman taan rabakau a katautaua bwa tao te kuata ni mwaitiia ataei ni kabuta te aonaaba a bwainikiriinaki n rabwataia, mwakuri n tangako ke n aia namakin.² Ikawai naba e korakora mwaitiia aika a bwainikiriinaki, ma te katautau 1 inanon 4 aine ao 1 inanon 10 mwaane ake a rinanona te bwainikiriinaki ni mwakuri n iowawa n taibaoaki irouia buuia.

Te bwainikirinaki e kona n riki inanon aekakin nako te reitaki, ao a uaia mwane ao aine ni kona ni bukinaki. E ngae n anne, mwane a kona riki n rang n tautaeka ao ni bukinaki ibukin te kaikoaki ao te mwakuri n tangako, ao aine a kona riki ni kakamakaki, tautaekanaki, ke ni kaikoakaki irouia buuia.³

Mwakuri n iowawa e kona n roota tamnein te tia kaikoaki ke te aomata are e kaikoakaki ao e kaitara ana reirei te Tia Kamaiu. Burabeti n taai aikai a tia n taekinna bwa naake a “bwainikiriniia buuia ke natiia … n te bong teuana a na bon bukintaeka imatan te Atua.”⁴ Taan iowawa n angiin te tai a katinanikui ke a kabonganai reirein te euangkerio nakon bon oin nanoia. Te katoto, I reireiniia te taanga are te buumwaane e karekea te anua n rereitaki ma aine tabeman ao e kemborona aia katikumwane, ma n onean mwiin te kabwarabure, e kairoroa buuna bwa e na kabwara ana bure ao e berita bwa e na “korakora riki ana bure” ngkana e aki kabwara ana bure. E kanakoa marakin buuna ao e taekinna bwa e bon eti imatan te Atua bwa ngke e aki ao e na bon aki riki bwa te tia mwakuri n te tembora. Ngke e taetae kainabana te aine ma taan kairiiri n te Ekaretia, te mwaane aei e kamemerea bukinana ao e kamemerea ana raraoma, n taekinna bwa e bon rotaki kainabana n te bwaranano. Te buumwane e katinanikui “reirein te … karinerine, tangira [ao] te nanoanga”⁵ ao e bwainikiriina buuna. Ana kekeiaki ni maiuakina reirein te euangkerio e aki kona ni kanakoraoa te kangaanga are e karikia.Ngaira n tatabemaniira ti kona n taenikai man anua aika aki nakoraoi. Iai aekakin anua aika okioki nakon aekakin nako mwakuri n iowawa, ao ngkana e rikirake ni korakora ao n ririki aekaki aikai, e na bon aki nakoraoi te reitaki. Aikai nimaua aekakin tein mwakuri n iowawa aika nonoraki ake a kona ni buokiko ni kinai anua aika aki nakoraoi iroum ao irouia tabeman.

1. Ribuaka

“E mena aia bwai ni kamamate naeta I an riaia: … wi[ia] a on n te karereanti ma te taetae ae mai” (I-Rom 3:13–14).

Temanna te mwaane e roko irou ibukin buokana ni kaitara nanon buuna, are e bwainingareia ibukin “kainnanoan buokana.” N te taromauri e bon rang n iraorao ao ni kakaonimaki, ma ni mweengana anuana n ribuaka e oro kammarakina. E kabuakaka ana bwakabwai ao e arana nakoana n tia reirei bwa te “mwakuri n aine.” E tuanga natina te mwaane, “Au kantaninga bwa ko aki riki bwa te aomata ae kimamaku n ai aron tamam,” ao ei kabanea ana tai ni katoabong iaon te tareboon ma tinana, ake a bwabwainikiriniia buuia. Aomata aika a buakaka a rau nanoia ngkana a kammarakiia tabeman ao “n tangiriia bwa tabeman a na rawawata” (Reirei ao Berita aika Tabu 121:13). Utu aikai a urua ana tua Iesu are a na “tai kabuakaka” ao “aki kabureia aomata” (Ruka 6:37) ngkai a kabuakaka, n kaota te winrang, ke ni kario ara.

2. Te Kewe

“Ko bon niniaki iroun te tamnei ae kewe, ao ko a tia ni katuka Tamnein te Atua bwa e na akea nnena iroum” (Aramwa 30:42).

Te kewe e rang n ririki n te mwakuri n iowawa ngkai taan bure a kauarerekea aia mwakuri, ni bukiniia tabeman, ao ni kabitaraei karaki. Aio e karika te minotaki, ngkai temanna au tia kakae are e iri e kabwarabwara: “[Kainnabau e na] rang n un ao imwiina e karaoa te kabwarabure ao imwina e na taku, ‘Eng bon am bure naba’ … ao n tounako man touanako ni karokoa I a moanna ni kakoaua anne.”⁶ Te kakewekewe n ana kakoaua temanna e aranaki bwa te bobokewe, ao e katuka te aomata are e bukinaki bwa e na nanououa ao n aki koaua n aia ururing ao aia iango. N aron tein kewe tabeua, te bobokewe e kabonganaaki ni kaminoa te maroro ao ni kaota taraakia ke anuaia n te bwai are a kan karaoia bwa te kewe.

Naake a bwainikiriniia tabeman a rangi n rawa ni butimwaia bwa a riibuaka ao n tainako a na taekinna bwa ngaiia aika a bwainikiriinaki. Ngke Jenna e kaota te aki rau ibukin ana riribai Jake irouia ana karo, e roko unna ao n taku bwa e “kabwainrangnga”. Jake e mena i buakoia “naake a tang n riaoa te tua … ao bon nati n aki ongeaba ngaiia.” (Reirei ao Berita aika Tabu 121:17). E aki tii boutoka ana karaki ae kewe ma e kaota ribakin te koaua.⁷

3. Te Kario

“Kaota am kairua ma te bure are ko a tia ni karaoia.” (Aramwa 39:13).

Te aomata ae nanorinano e namakina te nanokawaki ngkana e kammarakia tabeman ao e raira nanona ao e nakoraoi riki. Te aomata ae e iowawa e rawa ni kabwarabure ao e karioi bukin unna. E uringa temanna are e ira buakon au reirei, “I rang aki mweengaraoi n te mwakuri n iowawa, ma imwiina I taku bwa e na bon aki riki ngke arona bwa e kawakina kainakin wiina neienne.” “Nanokawakina bon tiaki ibukin te rairannano” (Moomon 2:13) ma e bitia nakon te un ao te ibukibuki.

N tain au reirei iaon te kamarurung, I tuanga te buuaine bwa I tuai man nonoora ae e kaota te raraoma inanon ririki ni kakabuakaka buuna. Ana kaeka e aki kaota ae nanokawaki ma e urarake n un: “E tamaroa, aio te bwai teuana ae I aki karaoia!” Aomata aika a unun aki butimwaea katabeaia ao a rang kakai un ao n rarawa ni bukintaeka. A rang kakai un ni bwaai aika a uarereke.

4. Kainikatonga

“Kam na nanorinano n atongia raomi bwa angkoa a raoiroi riki nako imi.” (I-Biribi 2:3).

Te kainikatonga e raonaki n te kan bwaibwai ao e iangoia ibon irouna. Te mwane temanna e tatakarua nakon buuna ao natina ni katoa tai are e taku iai bwa a “aki karinea”. Ngkana a aki bootau aia iango ma ana kantaninga, irouna a “kakanikoa” ke a “bon aki kan ongotaeka.” Te kainikatonga e kaiangatoa ao e boboto iaon te mwaaka ao te kan tokanikai. Ni kaitarana, te utu ae iai te inanoi iai e nakoraoi, iai te baeranti n te aroaro imarenaia, ao kaina a “bon eti raoi aroia imarenaia.” (4 Nibwaai 1:2). Kainnaba a riai ni katiteboaki,⁸ ike a uaia n iai aia baire ao ni kabane iango a kabonganaaki raoi.

5. Te Taumatoa

“Ngkana ti … karaoa te tautaeka ke te taumatoa nakon tamneia natiia aomata, … a na bubai karawa” (Reirei ao Berita aika Tabu 121:37).

E ngae ngke e kakaawaki te inaomata n rinerine, e bon kamimi aroia kain te utu n tainako n tuangiia imarenaia aroia n iango, namakin ao ni mwakuri. Tabeman a tautaeka rinanon kairoro, kamaemae, te aki tatangira ke te kakamaku. Temanna te buumwane iai ana kantaninga ae matoatoa bwa buuna e na riai ni katauraoa te kaingabong ni katoa bong n taia ae baireaki, kaitarai bubuti aika onoti, ao n ongora irouna ni kaineti ma ana “tabeaianga,” are n angiin te tai e irekereke ma arona ni kona n tamaroa riki. E tau mwiin ana kabanemwane ao e kona n un ngkana e aki waekoa ni kaeka nakon ana tekiti.

Te tina temanna e kaota unna n tainako nakon natina ae tebwitabun ana ririki n te tai are e kaota iai te nanokawaki natina ke e aki roko n ana kainibaire te tina ni maiuna. Ngkana e aki roko n are e kantaningaaki, ke kainnabana e kaota te raraoma, e anganiia aomata nako te anua n aki kan tabe ni bakan aki nooria.

Kantaninga ao Kamaoaki

“I ongo am tataro, I nori ranni matam: noria, I a kamaiuko” (2 Uea 20:5).

E ngae ngke mwakuri n iowawa a urua te nano, te bitaki e kona ni karaoaki n tainako. Naake a rootaki a kona ni kakaea buokaia n te maiu n tamnei ao taan ibuobuoki aika a mwaatai ao n ukoukora mwaakan ana Mwakuri ni kamaiu te Tia Kamaiu ibukin kamaoan ikoakiia. Ni karekean buokam, nakon abuse.ChurchofJesusChrist.org.

Naake a tia n rang ni iowawa a riai n rairi nanoia ao n karekea buokaia. Aio e kainnanoia “ni kananorinanoia nakon kabin te nanorinano ” (3 Nibwaai 12:2) ao ni butimwaai te bukintaeka ae bwanin ibukin anuaia. Bitaki a anaa riki ae mwaiti nakon te berita n te tai ae uarereke ao kekeiaki aika a ti oti i momoara. Kammarakin te rairannano ae nano bon te uruaki n nano, ao tabeman a na bon aki tauraoi ni kan karaoia, are e katikuia taan kaikoakaki ma babaire aika a kangaanga bwa a na kanga ni kamanoia.⁹

Tamara are i Karawa e tabeaianga ibukira n aron te karo are e tabeaianga are e weteai ibukin natina te aine. Ana tangira te Atua ae e “taangaki n aron are akea tokina” (Mote 7:41), ao E nano marakina ngkana Natina a uaia ni kaikoakiia imarenaia. Inanon te maroro ae beebete ma Enoka, e tang. “Nooriia tarim aikai; boni ngaiia ake I karikiia n oin baiu, … ao [I a tia] n anga naba te tua, bwa a na itangitangiri imarenaia, … ma nooria, bon akea aia tangira, ao a ribaia aika oin raraaia” (Mote 7:32–33). Iai te tanginiwenei i karawa ao iaon te aba ngkana a ikoaki rabwata ao tamnei. Ma, n te nanorinano, mwaakan te Atua, ao te ibuobuoki mairouia aika a mwaatai ngkana e riai, e kona ni katokaki te urubwai n te anua ao ni karika karineam ibon iroum, kamanoaki, ao te tangira n te mweenga.

Bwaai aika a na taraaki

1. Ibukin rongorongo riki ni mwakuri n iowawa, taraa abuse.ChurchofJesusChrist.org. Ibukin riki rongorongo iaon mwakuri n tangako ao kaikoaki, taraa Benjamin M. Ogles, “Agency, Accountability, and the Atonement of Jesus Christ: Application to Sexual Assault” (Brigham Young University devotional, Jan. 30, 2018), speeches.byu.edu; and Chieko N. Okazaki, “Healing from Sexual Abuse” (Brigham Young University conference, Oct. 23, 2002).

2. Taraa Maryam Ajilian Abbasi, Masumeh Saeidi, Gholamreza Khademi, Bibi Leila Hoseini, Zahra Emami Moghadam, “Child Maltreatment in the World: A Review Article,” International Journal of Pediatrics, vol. 3, no. 1 (2014), 353–65.

3. Taraa Hamby, S., “Current controversies: Are women really as violent as men? The ‘gender symmetry’ controversy,” in Claire M. Renzetti, Jeffrey L. Edleson, and Raquel Kennedy Bergen, Sourcebook on Violence Against Women, 3rd ed. (2018), 78–82.

4. “Te Utu: Te Katanoata Nakon te Aonaaba,” Liahona, May 2017, 145; tara naba abuse.ChurchofJesusChrist.org.

5. “Te Utu: Te Katanoata nakon te Aonaaba.”

6. Jason B. Whiting, Megan Oka, and Stephen T. Fife, “Appraisal distortions and intimate partner violence: Gender, power, and interaction,” Journal of Marital and Family Therapy (2012), suppl: 1:113–49.

7. Ibukin riki katooto tabeua iaon koroboki aika a tabu ni kaotakin te koaua, taraa Ioane 3:19–21; Makuri 7:54; 2 Nibwaai 1:25–26; ao 2 Nibwaai 4:13.

8. Taraa “Te Utu: Te Katanoata Nakon te Aonaaba”; tara naba H. Burke Peterson, “Unrighteous Dominion,” Ensign, July 1989, 6–11, ibukin riki rongorongo iaon te reirei n te katiteboaki ao titiraki ake a kaineti ma reitaki inanon te berita.

9. Naake a mena inanon aro n iowawa a riai ni karaoi rinerine ni kamanoia, ke irouia tabeman, ao aron naba ngkana a kainnanoa ni katea te tia ke n tiana aia reitaki ma naake a kaikoaki. Beretitenti James E. Faust (1920–2007) maroroakina te aro ae kangaanga ngke temanna e mwane inanon “reitaki ae a maan ao e aki kona ni kamaiuaki are e a urua aron te aomata anne n arona n aomata” (“Enriching Your Marriage,” Liahona, Apr. 2007, 3); tara naba te “Help for Victims” mwakoro iaon totokoan mwakuri n iowawa n te Ekaretia ibukin rongorongona riki ao rinerine.

Ukoukori aika Mwaiti Riki

Ni karekean rakan riki rongorong reitaki ma burobetiono ao bwaai n ibuobuoki tabeua, nakon ana webutiaite te Ekaretia n abuse.ChurchofJesusChrist.org.

N reiakina riki taekan aron buokan te aomata are e rootaki, wareka te tiaitebwa “How Can I Help? Ibukiia Raao ao Taan Kairiiri” in the digital version of this article at liahona.ChurchofJesusChrist.org ke n te Gospel Library app.

N na Kanga n Ibuobuoki? Ibukiia Raao ao Taan Kairiiri

“[Ti] na tang ma ake a tang; eng, ao ni karau nanoia ake a kainnanoa karauan nanoia” (Motiaea 18:9).

Angiira a ataia naake a rootaki man mwakuri n iowawa, ngkana ti ataia ke ti aki. Taan kairiiri a na kawaraki irouia naake a maraki aika kain te uoote, ao bon angiina aomata nako iai raraoia ke aia utu ae a tia n aki karauaki. Aomata ake aki irekereke ma te kangaanga a nanoanga ma aki ataia bwa a na kanga n ibuobuoki. Aikai kainibaire aika a na iangoaki ngkai ti ibuobuoki inanon kangaaga akanne.

Bwaina te boutoka, tiaki te kakan eti. E aki karaua te nano ongoraean te maraki, ao ti kona ni kaota te namakin ae korakora ao te reirei, n aron: “Ko riai ni kitanna ngkai ” ke, “reitaki ma te roia.” E aki rang ibuobuoki te kairoro, tii ngkana aomata a aki mano ni katan rabwataia ke maiuia. N aro aikai, e kakaawaki te reitaki ma taan mwakuri n te tua, katanaia aina, ke rain aika tauraoi. Ngkana ataei a kakoaua ke n rinanon mwakuri n iowawa ke mwakuri n tangako, taabo n ibuobuoki ibukin katanakiia ataei a riai naba ni kaongoaki. E ngae n anne, n angiin itabarara, naake a rootaki a buokaki riki man te boutoka nakon te kairoro, are iai korakorana nakoia ni kainabwabu ke n aki kabongana inaomataia n rinerine. Naake a mena inanon aro aika kamamate a kaitara ma rinerine aika kanganga ao ti a tia n iangoia aroia inanon abwakin te tai. Kakauongo raoi bwa kona ota n te kabwarabwara ao titiraki nakon kauaotaoan te rawawata.

Tai motikitaeka ke ni kabwarabwara. Inanon te Ekaretia ti a tia n iangoi aroia utu, ao angiina a namakinna bwa a bon aki maiuakin. Inanon utu aika a kangaanga reitakiia, te marena aei e karaka riki, ni kairiia nakon kamamana riki ao te karaba. Naake a korakora nanoia ni karaoi bwaai aika tamaroa riki n angiin te tai bon ngaiia ake a bwainikirinaki ao a bukintaeka. E kona n rang bukintaeka ngkana naake aki irekereke a taekina ae aron aei: “Iai te bwai ae ko karaoia ni kanakoia?” ke “Ngkana ko taotaonannano ao ni kakabwarabure, I kakoaua bwa e na rikirake n tamaroa.” Aio bukina teuana ake naake a mena inanon kangaanga a rawa ni maroroakinna—a aki tangiria bwa a na taraaki bwa a taennikai ke n namakina te mweengabuaka.

Karaoia ao taua ma nanom. Tabeman ake a waekoa n taekina bwainikirinaia a kaitaraki ma te riribai ke te nanokokoraki. Aio e kona n riki ibukina bwa naake akea rekerekeia e aki bwanin irouia ao n tabetai e kairua aia taratara. Te katooto, iai te karaki are taan kakeru e bon ti riki irouia kamwarua ake a tara n maiubuaka. E ngae n anne, angiin mwakuri n iowawa n te utu a riki mairouia aomata aika mwaatai ake a kona n tei imatan te koraki ni kabwarabwara. Ti inimaki ma te koaua aei. E na kanga raora ae bobo ibuako ae te tia reirei n te Reirei n Tabati n iai naba ana itera ae roo ni mweengana? Ngkana te karaki e aki bootau ma ana kantaninga te tia ongora, e kona n aki ongoraeaki ke ni kamemereaki. Ma taan kakae a kaotia bwa te ibukibuki ae bure n te mwakuri n iowawa, riki mairouia naake a memeere korakoraia inanon te utu, a karako, ao angiina naake a rootaki a bon aki kona n taetae. Karaoi ni kabane ribooti n taua ma nanom ao waaki man te nne ae kakoaua.

Tai waekoa ni motikitaeka. Taan kairiiri ao taan rabakau n angiin te tai a ongo karaki aika kaokoro mairouia kain te utu, ao e kona ni kaririaki n tei ibukin te iterana. N aro tabeua, iai taan rootaki ao taan kabuakaka, ma tabeua e kairua n itera aika a mwaiti ao te koaua e kuri kanganga ni kabwaranakoaki. Ni kamwaita riki te nanououa bon te koaua are ngkai e kakawaki bwa kona kakoaua te aomata are e taennikai, angiina taan karaoi mwakuri n iowawa a rang akoi ao a na kona naba n taekinna bwa taan taenikai ao a kona ni kabuakaka te aomata are karaoaki te mwakuri nakoina bwa taan moan karaoa te kairua. Te katooto, te kainnaba ae taumatoa e kona ni butimwaea te bitiobi ke te tia rabakau n reirei te ibuobuoki ni moantaai n tareboon ni katei karaki aika a kabuakaka iai raoia are temana. Naake aki rekereke n angiin te tai a taku bwa a kona n ata te kewe, ma taan tina ni kewe a katokai ribaia n rang n anainano. Te Uea e kauringiia taan kairiiri bwa “iai bwaritaio i buakomi, ake a tia ni mwamwanaia tabeman” (Reirei ao Berita aika Tabu 50:7), ao inanon taai te kewe aei e kananououa nakoia naake a kataia n ibuobuoki.

Taratarai kanikinaean kanikina. Akea tokin aekakin nako aro aika aki raraoi ake a riki inanon taian utu, ma iai aekakin kauring ni kanikina ake a riai ni maroroakinaki n ae nano riki ngkana taan kairiiri ke rao a ongo taekaia. Aikai ake a raonaki ni bwai ake a kaotaki inanon te rongorongo aei: ribuaka, kewe, kario, kainikatonga, taumatoa. N reitia riki, bon te kanikina ae buakaka ngkana iai te kokoo, tararua, iowawa, karaki ni karaka, kairoro n irekereke ma kinano ke te mwane, ke te rawa ni kan karekea te ibuobuoki. Aekakin nako kakeru n te oro ke mwakuri n tangako a riai n tainako n rinanoaki ma te taratara raoi ao ni marroroakinaki ma taan rabakau. Ngkana a irekereke ataei bwa ngaiia aika a karaoaki mwakuri n iowawa nakoia ke taan kakoaua, te mwakuri n iowawa e riai ni ribotinaki.

Te kakukurei bwa mwaitin mwakuri n iowawa n te mweenga a kerikaaki n aba aika a mwaiti, ao kauring nakoia te botannaomata e a tabe n rikirake.¹ E ngae n anne, a mwaiti aika a teimatoa n rootaki n ti ngaiia, ao “a waerake tangin nanoia iroumi nakon te Atua” (Iakobwa 2:35). Tia anga baira nakon nano aika marakiia ma te tangira ae ana Tangira ao ana boutoka Kristo.

Bwaai aika a na taraaki

1. Taraa Bureau of Justice Statistics, National Crime Victimization Survey, Concatenated File, 1992–2015 (U.S. Department of Justice); Steven Pinker, The Better Angels of Our Nature: Why Violence Has Declined (2011).

Bwaai n Ibuobuoki ibukiia Taan Kairiiri

Taan kairiiri ake a atai mwakuri n iowawa ake a irekereke iai ataei ke taan kakoaua a riai n reitaki ma ana rain n ibuobuoki te Ekaretia n counselingresources.ChurchofJesusChrist.org.

“Te bwana are e kaota te koaua ae moan te tamaroa, anga tataro ni kaunganano, anenea kunan Tion kona n riki te bwana naba anne are e takutaku ao ni kabuakaka, kamamae ao ni kamangori, karika te maraki ao n uruana tamnein temanna ao tabeman inanon te waaki. ‘E oti nako te taetae ni kakabwaia ma te karereanti naba man te wii ae ti teuana’ e nanokawaki Iakobo. ‘Tariu [ao mwaaneu], a bon aki riai baikai’ [Iakobo 3:10].”

Unimwaane Jeffrey R. Holland Man te Kooram n Abotoro n te Tengaun ma Uoman, “The Tongue of Angels,” Liahona, Meei 2007, 16.

Ukoukori aika Mwaiti Riki

Mataniwi a kona ni karekea te ibuobuoki iaon te mwakuri n iowawa iaon ChurchofJesusChrist.org. Ni kabane taan kairiiri ao aia tia reirei ataei ke kairake a riai ni kabanea te kataneiai iaon “Protecting Children and Youth” inanon te teuana n namwakaina are a weteaki iai. Te kataneiai e kona n reke n ChurchofJesusChrist.org/callings/church-safety-and-health.