Arou ni Kunea Katokan Man te Mwakuri n Tangako

Te Ara e tauaki

I a tia ni maiuakina te mii buaka. Ma imwiina I reiakinna bwa n tain au tai n roo, I kona n onimakina au Tia Kamaiu.

E moa mii buakau ngke ai tibwa itiua au ririki ao tinau e a manga mare. Ti rangin n tangira tamara ae boou. E akoi ao e bon tau nakon ara utu. I namakina te kamanoaki irouna. A bane n nakoraoi bwai ni kabane ni karokoa te taina, ngke a bane n tabetabe, e bwainikirinai n tauai.

I aki ataa te bwai ae e karaoia nakoiu. I namakina te maaku, te mangaongao, ao ni maama. Ma I rangin ni maaku n tuanga temanna. I taku bwa e na urua kukurein au utu ae tibwa reke ao ana akea ae na kona ni kakoauaai. Ngaia ae I iangoia bwa n na aki karongoa.

E a tia n ti kamarakai ti n te tai anne, ma ururingan te mwakuri n iowawa e tiku ni matoa n au iango. I bon riki bwa te aomata ngai ae raraoma bwa mwiina tabeman a noora marakiu ao ni kaota te bwai ae I karabaa are I kataia ni karabaa iai te koaua man arou n riki bwa te rao ae raoiroi nakon tamau te kauaei. E bon rang n akoi riki nakoiu, are I a manga waaki n tatangiria iai.

Ma imwiina ao e a bon rangi ni korakora aki raoiroin te waaki. Ngke e waaki tinau ni mwakuri n te bong, ao tamau te kauaei e a waakina ana mwakuri ni bwainikiriinai ni katoatai. I rangi n namakinna ae akea buokau. I tangiria n tuangiia aomata ibukin te mwakuri ni bwainikirinaki, ma tamau te kauaei e bon tangira arona aei, ao I taku bwa tabeman a na bon boutokaia. Ngaia are n teuana te tairiki ngke tii ngai, Ia bubutia te Atua bwa e na buokai ni karabaa te bwai ae riki nakoiu.

Kaotii Bwaai Aika Riki

N tebong teuana ao te mwakuri ni bwainikirinaki e toki. I aki ataia bwa bukin tera. I taku bwa e aki manga kammarakai, I aki toki n namakina te bareka ao te maamaa. I ribaai. Tabetai ao I bon kauntaeka irou bwa te mate e na kona ni kabebeteai nakon are I bon rinanona. I bon tangiria ni kan kaotii bwaai, ma I maaku bwa tera ae na riki ngkana e oti te koaua.

N teuana te Taabati n tain te taromauri ngke 14 au ririki, ao I ongoraeakina te reirei iaon karaoan te rinerine are iaona riki. Au tia reirei e kaungaira bwa ti na aki mamatam ao n tataro ao e berita bwa te Uea e na bon kakorakoraira ni karaoan ae e raoiroi. Imwiin te taromauri, I teimatoa ni iangoa te bwai are e a tia n taekinna. Ngkana arona bwa I bubuti, e na bon kona te Atua ni buokai n taetae ni kaotii bwaai?

Te bong are imwiina ao I aki mamatam ibukin te kaunganano bwa n na kona n tuanga tinau aron bwainikiriinau. I aki kona ni waaki raoi n tain te reirei bukina bwa bwaai ake I iangoi bon arona bwa e na kanga ni kaekaai. Ma ngke I a okira mweengau, I a bon namakina naba te aoraki ae korakora. I a manga tataro naba ibukin kakorakorakiu, ma I aki namakina ae I tauraoi n tuanga.

Te tairiki anne, I a kawara tinau ngke e tabe ni kuukana te katairiki. I aki ataa te bwai ae n na taekinna, ma ngke I tarai matana, I kunea te ungannano ni waaki bwa n na taetae. Ngke I a waaki, bwaai akea I kakarabai inanon ririki aika a mwaiti a otinako.

Ngai ao tinau tia kaai n tekateka n te kai n tekateka ao ni kaai n tang. Imwiin anne, ti reitaki ma ara beretitenti n te mwaanga ao ni weteia bureitiman. Tamau te kauaei e bon bukinaki ibukin te bwai ae e a tia ni karaoia nakoiu, ao I anganaki kamanoakiu ae I kainanoia—N na aki manga kona n nooria riki.

Te Kawai nakon te Kamaiuaki

N te tai anne, e bon kaangaanga manga taekinan te bwai ae I a tia n rinanona nakoia naake iai te kariaiakaki irouia n aroia bureitiman ke rooia ao raoraou ake a titirakinai bwa e mena iaa tamau te kauaei, ma man aia boutoka au utu, ao I aki tiku ni maroa. Ngaira ni kabane, ti boonanoa ara boto n iango n ara utu: “I bon konai bwaai ni kabane ni karaoi iroun Teuare e kakorakorai” (I-Biribi 4:13). Ara utu ae bubura aio a kaota aia tangira ao aia boutoka ao,n taainako, ti kaai ni kamaiuaki.

Ngai ao tinau ti kaai ni ira te marooro ae bubura, are e a bon riki bwa te ibuobuoki ae bubura! Au tia ibuobuoki bon ngaia raoi ae I bon kainnanoia. E buokai ni kamatataai ni kabane rootakin au iango ake I namakinii ao ni buokai n tabeakin au ururing aika buakaka. I aki bae n ataia ae e bon korakora marakiu ni karokoa ae I a manga namakinna riki ae bwanin.

I aki bae ni iangoia bwa te maraki e na mauna nako bukina ngke I kaotii bwaai ni bane, ma I aki naba bae n ataia ae manraa te tai (ao te tataninga) ibukin kamaoana. Ibukin te tai ae maan, I a tia n namakina te aki kororaoi. N na riai ni manga reireinai n tangirai I bon irou.

I kunea te rau ae korakora ngke I onimakina au Tia Kamaiu ao Tamau are I Karawa. Ngke I a ataia ae A ataa raoi te bwai ae I namakinna ao e a anganai te kakorakoraaki ao te kaantaninga. I onimakiniia naakai inanon au tai n rawawata. N tokin te tai ao te ururing anne e a karaurau korakorana, ao I a namakina te rau inanon ana tangira te Tia Kamaiu.

Teuana mai ibuakon te kanuanga ae nang kakawaki iaon te mwakuri ni kamaiu bon ataakin ae iai nakoau ae tamaroa nakon taai aika a na roko. Ngke I a tia ni bwainikirinaki, ao I aki kan iangoia bwa e na raoiroi aron maiu. I namakina te uruaki n nano ae korakora. Ma rinanon te ibuobuoki ao te kamaeuaki, I a kunei bwaai ake nna kona n ingainga nako iai. I a moana karakinan au karaki aio nakoia aine ake a kammarakaki, ao I a tia naba ni iangoia bwa n na karaoa au mwakuri ni mitinare. Tibwauaakin au koaua nakoia tabeman e bon kakorakoraai.

Bwaai ake e a tia ni karaoia tamau te kauaei nakoina a bon aki riai ao man aki kabwarabwaraai bwa I rangi ni kakawaki. E a tia ni bita maiu, ma I rineia bwa n na kabonganai bwaai ake I a tia n rinanoi ni buokiia iai tabeman. N taai tabetai e bon kanganga, ma inanon bwaai ni kabane, ao te Uea e a tia ni kakorakoraai, ao I ataia bwa e na bon teimatoa naba ni buokai. I a tia ni bita te aomata ae e rootaki n te kaangaanga nakon te tia kamaiu.