Ngkana Ngkoe Are Ko Rotaki Imwiin te Bwainikirinaki
Tera te Bwainikirinaki?
Te bwainikirinaki bon kakeaan bonganaia ke bwainikirinaia tabeman (n aroia ataei, te aomata ae e a kara, te aomata ae mwauku, ke tabeman riki) n te aro are e a karika te kaikoaki nakon te rabwata, te iango, ke waaki ni wenenibure. E bon kaitarai ana reirei te Tia Kamaiu.
“Ana tabo te Ekaretia e kangai bwa te bwainikirinaki e aki kona n tokanikai iaon te aba n aekan rikina” (General Handbook: Serving in The Church of Jesus Christ of Latter-day Saints (Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong Aika Kaitira [2020], 38.6.2). Te bwainikirinaki e urui ana tua te Atua ao ni kona naba n riki bwa uruakakin tuua n te bootaki.
Karinanin te Bwainikirinaki
Te Bwainikirinaki n Rabwata: Te katei n unun ke n iowawa iroun temanna te aomata nakon are temanna are e na karika te kaikoaki n te rabwata.
Te Bwainikirinaki n te Wenenibure: Te waaki ke te bootaki ni wenenibure ae aki tangiraki, irouia taan iowawa ni kabonganai korakoraia, karaoi bwaai aika kakamaku, ke n anai aia raka irouia taan bwainikirinaki ake aki kona n anga aia kariaia. Ni kabane waaki ni wenenibure imarenan te ikawai ao te ataei bon te bwainikirinaki e ngae ngke iai ana kariaia bon te bure naba.
Te Bwainikirinaki n te Taetae ke n te Iango: Te katei are temanna te aomata e buakana te manna n oin nanona ao ni kaokiokia ni kawai aika tiaki n te rabwata, n aron taeka aika matoatoa, kanako nano, te matoa, ke kaburababakin te aomata. Aio are e a karika kerikakin kakawakim ao karinerine nakoim. E ngae ngke tiaki n te rabwata, te aeka ni bwainikirinaki aei e roota ni kabane ana iango ao marurungin te aomata.
Ko na Kanga ni Karekea te Ibuobuoki
E kantaningaira te Uea bwa ti na karaoa ae ti kona n totokoa te bwainikirinaki ao ni kamanoa ao ni buokiia naake a tia n reke irouia te bwainikirinaki. Akea ae kaantaningaaki bwa e na rotaki man te katei ni bwainikirinaki. Tao e riki ngkai ke n taai ake a bwakanako, ko kona ni kakaai ibuobuoki n te abuse.ChurchofJesusChrist.org.