Faifekau ko Fanevá
Naʻe sio ʻa Faneva ki tuʻa ki he hala femoʻuekina ʻi tuʻa ʻi hono ʻapí. Naʻá ne lava ʻo sio ki he kakaí ʻoku nau toho e ʻū saliote vesitapolo, laise, tupenu, mo e ʻū koloa kehe ke fakatau atu. Naʻá ne fanongo ki he fakapiipi ʻa e meʻalelé mo e kālou ʻa e fanga kulií. Hili iá, naʻá ne fanongo leva ki ha ongo ʻe taha.
“Mama, ʻoku ʻi ai e taha ʻoku tukituki!” Ko e ui atu ia ʻa Fanevá. Naʻe fakaava ʻe Mama ʻa e matapaá. Naʻe tuʻu mai ʻi he sitepú ha ongo talavou ʻokú na tui suti mo e hēkesi. Naʻe teʻeki ʻaupito ke sio ʻa Faneva ʻi ha taha kuo teuteu pehē ʻi honau feituʻu ʻi Matakasikaá.
Naʻe pehē ange ʻe ha taha ʻiate kinaua, “Ko ha ongo faifekau kimaua mei he Siasi ʻo Sīsū Kalaisi ʻo e Kau Máʻoniʻoni ʻi he Ngaahi ʻAho Kimuí Ní. ʻOkú ma akoʻi ki he kakaí fekauʻaki mo Sīsū. ʻE lava nai ke ma vahevahe ha pōpoaki mo kimoutolu?”
Naʻe fiefia ʻa Faneva ʻi he fakaʻafeʻi mai kinaua ʻe Mama ki lotó. Naʻe fakatahataha mai ʻa e fāmilí kotoa ke fanongo fekauʻaki mo Sīsū Kalaisi pea mo e founga ne toe ʻi he māmaní ai ʻa Hono Siasí.
Hili e ʻaho ko iá, ne toutou ʻaʻahi mai ʻa e ongo faifekaú ki he fāmili ʻo Fanevá. Naʻá na ʻomi ha tohi naʻe ui ko e Ngaahi Talanoa ʻo e Tohi ʻa Molomoná. Naʻe saiʻia ʻa Faneva ʻi hono lau ia mo hono fāmilí!
Naʻe pehē ʻe Faneva ʻiate ia pē, Te u hoko ʻi ha ʻaho ko ha faifekau pea te u vahevahe ʻa e Tohi ʻa Molomoná mo e niʻihi kehé.
ʻI ha taimi ʻe taha naʻe haʻu ai ʻa e ongo faifekaú, naʻá na akoʻi ʻa e fāmili ʻo Fanevá ki he founga ʻo e lotú. Naʻe ako ʻe Faneva ʻe lava ke ne talanoa ki he Tamai Hēvaní ʻi ha taimi pē, pea ʻi ha feituʻu pē.
Naʻe fakakaukau ʻa Faneva, Te u hoko ʻi ha ʻaho ko ha faifekau pea te u akoʻi ki he kakaí fekauʻaki mo e lotú.
ʻI ha ʻaho ʻe taha naʻe ʻi ai ha fehuʻi mahuʻinga ʻa e ongo faifekaú.
Naʻe fehuʻi ange ʻe ha taha ʻiate kinaua, “Te ke muimui nai ki he sīpinga ʻa Sīsū Kalaisí ʻo papitaiso?”
Naʻe ongoʻi fiefia ʻa Faneva ʻi hono lotó. Naʻá ne tali ange, “ʻIo!”
Naʻe pehē ange ʻe hono tokoua mo Mama, “ʻIo!”
Naʻe talaange ʻe Papa naʻe teʻeki ke ne mateuteu ke papitaiso. Ka ʻoku sai pē ia ki ai kapau ʻe papitaiso e toenga ʻo e fāmilí. Pea naʻa nau papitaiso leva! Naʻe papitaiso ʻa Faneva ʻe ha taha ʻo e ongo faifekau naʻá ne akoʻi ange kiate ia fekauʻaki mo Sīsuú.
Naʻe fakakaukau ʻa Faneva, Te u hoko ʻi ha ʻaho ko ha faifekau pea te u tokoniʻi e kakaí ke nau papitaiso.
Ko e taha e ngaahi konga lelei taha ʻo e hoko ko ha mēmipa ʻo e Siasí ko e ʻalu ki he Palaimelí. Naʻe saiʻia ʻaupito ʻa Faneva ʻi he ngaahi ʻekitivitií mo e fetaulaki mo e ngaahi kaungāmeʻa foʻoú. Ka ko e meʻa naʻá ne manako taha aí ko e hivaʻi e ngaahi hiva Palaimelí. ʻI ha Sāpate ʻe taha ʻi he Palaimelí, naʻa nau hivaʻi ha ngaahi hiva fekauʻaki mo hono vahevahe ʻo e ongoongoleleí.
Naʻe hiva ʻa Faneva, ”ʻOku ou fie hoko leva ko ha faifekau. ʻIkai te u fie tali ke u lahi.”
Naʻe fakatokangaʻi ʻe Faneva, Te u lava ʻo kamata ngāue fakafaifekau he taimí ni. ʻOku ʻikai fie maʻu ia ke u tatali ki ha ʻaho kehe!
Talu mei ai, mo e fekumi ʻa Faneva ki ha ngaahi founga ke ne lava ʻo vahevahe ai e ongoongoleleí. Naʻá ne feinga ke hoko ko ha faʻifaʻitakiʻanga lelei. Naʻá ne fakaafeʻi e kakaí ki he lotú. Naʻá Ne tokoni ki hono kaungāʻapí. Hili ha ngaahi taʻu siʻi mei ai, naʻá ne matuʻotuʻa feʻunga ke tokoni ki he ongo faifekaú ʻo akoʻi e kakai ʻi hono koló. Hili ha toe ngaahi taʻu mei ai, naʻá ne ngāue fakafaifekau—fetaulaki mo e kakai foʻou pea vahevahe e ongoongoleleí, ʻo hangē pē ko ia kuo vahevahe ʻe he ongo faifekaú mo iá. ●