Maroroya na Veisau
Ena vukui Jisu Karisito, sa soli vei keda na kaukauwa me tudei na veisau eda vakayacora. Ni da gole yani Vua ena yalomalumalumu, ena vakalevutaka o Koya na noda rawa ni veisau.
E marautaki dina na tiko kei kemuni.
Raitayaloyalotaka mada e dua e gole ki na makete mo volia e dua na iyaya. Kevaka sa sauma vei dauveivoli na isau e levu cake mai na isau ni yaya, ena solia vei koya na veisau o dauveivoli.
Vakavulica na Tui o Benijamini vei ira na nona tamata e America makawa na levu ni veivakalougatataki eda ciqoma mai vua na iVakabula, o Jisu Karisito. E bulia o Koya na lomalagi, na vuravura kei na veika totoka kece eda dau marautaka. 1 Ena Nona Veisorovaki lomani, sa vakarautaka o Koya na sala meda vueti mai na ivalavala ca kei na mate. 2 Ni da vakaraitaka Vua na noda vakavinakavinaka ena noda cakacakataka ka bulataka na nona iVakaro, ena vakalougatataki keda ena kena gauna totolo, ka vakavuna me da na dau dinau tu ga vua.
E solia vakaiyauyau vei keda, ka sivia sara mai na veika eda rawa ni solia lesu Vua. Ia, na cava beka me da solia Vua, o Koya a sauma na isau tawa wiliki rawa ni noda ivalavala ca? Eda rawa ni solia Vua na veisau. Eda rawa in solia Vua na nodaveisau. Ena rawa beka me veisau na vakasama, na veisau ni ivakarau, se veisau ena sala eda mua kina. Me isau ni Nona sausaumi uasivi me baleti keda, sa kerea na Turaga me veisau na yaloda. Na veisau e vinakata o Koya vei keda e sega ni baleti Koya, ia e baleti keda ga. Sega ni vaka na veivoli ena makete ka na taura tale na veisau eda solia yani, na noda iVakabula dau loloma e kacivi keda tu meda maroroya na veisau.
Ena kena rogoci oti na vosa nei Tui Penijamini, era tagi cake mai na nona tamata ka kaya ni sa veisau na yalodra, “Sa vakayacora na yalo ni Turaga Kaukauwa e dua na veisau levu vei keimami,…sega tale ni tiko e dua na gagadre me kitaka na ka ca, ia me keimami kitaka tikoga na veika vinaka.” 3 E sega ni tukuna na ivolanikalou ni ra sa vinaka sara ena gauna ko ya; ia, na nodra gagadre me ra veisautaka e vakasaurarataki ira me ra cakacakataka. Na nodra veisau ni yalo e kena ibalebale me ra biuta tani na itovo vakayago ka segata me ra yaco me ra vakataki Jisu Karisito vakalevu cake.
E vakavulica o Peresitedi Henry B. Eyring: “Na saumaki dina ena vakatau ena vakasaqarai ni yalo galala ena vakabauta, ena sasaga levu kei na mosi. Sa ikoya ga na Turaga me na solia… na cakamana ni veivakasavasavataki kei na veisau.” 4 Cokoti vata na noda sasaga kei na veisau ena cakava na iVakabula vei keda, meda tamata vou.
Niu se gone, au a raitayaloyalotaka noqu taubale voli ena dua na sala e cake, ka vakadodonu ki cake ki na noqu lalawa ni bula tawamudu. Ena veigauna kece au dau cakava se tukuna kina e dua na ka cala, au vakila niu sisi sobu tiko na sala, meu na tekivu vou tale na noqu ilakolako. E vaka nida ro ena dua na lomanibai ena kena vakataucokotaki ni nodra qito ni gone na Chutes kei na Ladders mo tu mai cake qai sisi sobu mai na mai na ulu ni papanivolavola ki na ivakatekivu ni qito! E veivakayalolailaitaki! Ia ena gauna au sa tekivu kila kina na ka e vakatoka o Nifai me ivunau i Karisito 5 kei na sala meu bulataka rawa kina ena noqu bula, au sa kunea na inuinui.
Sa solia vei keda o Jisu Karisito e dua na ivakarau ni veisau me tomani tikoga. E sureti keda me da vakabauti Koya, ka vakauqeti keda meda veivutuni – “ia na vakabauta kei na veivutuni e kauta mai na veisau ni yalo.” 6 Ni da veisau ka vakanamata na yaloda ki Vua, eda rawata na gagadre levu cake meda vakayacora ka bulataka na noda veiyalayalati tabu. Eda vosota me yacova na ivakataotioti ena noda bulataka tiko na ivakavuvuli kece oqo ena noda bula ka sureta na Turaga me veisautaki keda. Vosota ki na ivakataotioti e kena ibalebale veisau tiko me yacova na ivakataotioti. Au sa qai kila oqo niu sega niu tekivu tale mai na itekitekivu niu dau cala, ia ena tomani tiko ga na vakarau ni veisau.
E dua tiko na malanivosa vakauqeti ena itoko ni Goneyalewaka tukuna tiko, “Au vakamareqeta na isolisoli ni veivutuni ka vakasaqara me vakatorocaketaki e veisiga.” 7 Sa noqu masu ni da na vakamareqeta na isolisoli totoka oqo ka sa nakiti meda vakasaqara na veisau. E so na gauna na veisau eda gadreva ena waki vata kei na ivalavala ca bibi. Ia e vaka wasoma ni da dau sasagataka ga me dua vata na noda ivakarau kei na vakarau nei Jisu Karisito. Noda digidigi ena veisiga, ena rawa ni vukei keda se ivakatatao ni noda tubu. Na veisau lalai, ia e tudei, ena vukei keda me da vakatorocaketaki. Kakua ni yalo lailai. Na veisau e dua na iwalewale ni noda bula taucoko. Au vakavinavinakataka ni dau kune na veisau ena veika dredre eda sotava, ka waraki keda tu na Turaga.
Ena vukui Jisu Karisito, sa soli vei keda na kaukauwa me tudei na veisau eda vakayacora. Ni da gole yani Vua ena yalomalumalumu, ena vakalevutaka o Koya na noda rawa ni veisau.
Me ikuri ni kaukauwa ni veisau e vakatara na Veisorovaki ni iVakabula, na Yalo Tabu ena vukei keda talega ena noda sasaga. Ena vukea sara talega na veisau e gadrevi me da cakava. E rawa talega me da kune veivuke kei na veivakayaloqaqataki mai na veimasulaki ni matabete, lolo, masumasu, kei na vakaitavi ena valetabu.
Vakakina, na noda lewe ni matavuvale nuitaki, na iliuliu, kei na noda itokani era rawa ni veivuke ena sasagataki ni veisau. Niu se qai yabaki walu, keirau dau qito kei Lee, na tuakaqu, vata kei iratou na neitou itokani ena dua na vunikau ena itikotiko raraba. Keimami dau taleitaka na qito vata ena ruku ni vunikau oya. Dua na siga, eqai lutu o Lee mai na vunikau, mani kamusu na ligana. Na ramusu ni ligana e vakadredretaka na nona kabata vakataki koya na vunikau. Na bula ni kaba ena vunikau e sega ni vaka ga me tiko o koya. Keitou sa qai saga me kaba cake o koya, eso e saga me dreti koya cake ena ligana vinaka, ka sega ni bera sa tu tale o Lee ena vunikau. Se ramusu tikoga na ligana, ia sa marautaka na nona rawa ni tiko vata kei keitou ni waraki tiko me mavo na ligana.
Au dau vakasamataka vakalevu na ka au sotava na gauna ni noqu qito tu ena vunikau me vaka e dua na mataqali itaviqaravi ena kosipeli i Jisu Karisito. Ena rurugu ni veitabana vakosipeli, eda marautaka kina e vuqa na veivakalougatataki e sema ki na noda veiyalayalati. Eso ena lutu tani mai na tataqomaki ni nodra veiyalayalati ka gadreva me ra kabata cake tale na tabana veitaqomaki ni kosipeli. E rawa ni dredre vei ira me ra lesu mai vakataki ira. E rawa li meda veivuke vakamalua ka dreti ira cake me vukea me mavo ka rekitaka noda veitokani?
Kevaka o sotakaya tiko e dua na mavoa mai na lutu, kerekere vakatara eso me ra vukea na nomu lesu tale ki na nomu veiyalayalati kei na veivakalougatataki e vakarautaki. E rawa ni vakabulai iko ka veisautaki iko na iVakabula, ni ko vakavolivoliti tu, vei ira era lomani iko.
Vakawasoma noqu dau raici ira noqu itokani sa vakayabaki tu na neimami sega ni sota. Eso na gauna era dau kaya, “o sega ni veisau vakadua!” Veigauna kece au rogoca kina na vosa oya, au dau ririko baleta au vakabauta niu sa veisau ena veiyabaki sa sivi yani. Au niutaka niu sa veisau mai na noa! Au nuitaka niu na dau yalololoma, ka lailai noqu vakalelewa, ka loloma vakalevu cake. Au niutaka me dau totolo noqu sauma na veivuke vei ira na tani, ka rawa niu dau vosota vakadede.
Au taleitaka na kabata na veidelana volekata noqu vale. E vakavuqa, da curuma tiko na noqu ivava e dua na vatu lailai niu taubale voli. Kena itinitini, au sa tu vakadua ka kuretaka na noqu ivava. Ia au dau kurabui ena dede ni noqu dau vakatara meu mosi tu ni bera niu kuretaka laivi na vatu lailai.
Ni da lakova tiko na sala ni veiyalayalati eda dau tomika ena loma ni noda vava na vatu e vakatautauvatataki me itovo ca, kei na ivalavala ca. Na totolo ni kena kuretaki tani mai na noda bula, na kalevu ni noda na marautaka na noda ilakolako ena bula oqo.
Na dei tiko ni veisau e taura na sasaga. Au na sega ni rawa ni raitayaloyalotaka meu cegu ena ilakolako oqo meu biuta tale ena loma ni noqu vava e dua na vatu mosimosi vaka koya au au se qai vagalalataki au ga. Au na sega ni via cakava tale oya, me vaka ga e dua na bebe me digitaka me lesu tale ki na nona vale.
Au vakadinadinataka baleti Jisu Karisito, eda rawa ni veisau. E rawa ni da vakamoica na ivakarau ni bula e matau vei keda, veisautaka na noda vakasama, ka vakavinakataka cake sara na noda ivakarau tudei meda vakataki Koya vakalevu cake. Ena Nona veivuke, e rawa ni da maroroya na veisau. Ena yacai Jisu Karisito, emeni.