Veika Vakasakiti mai nai ka 190 ni Koniferedi Raraba Vakayabaki

Ena loma ni veilecayaki, e milioni na tamata era a kunea e dua na gauna ni vakacegu ena koniferedi raraba ka vakayacori enai ka 3–4, ni Okotova, 2020. Era a dusimaki keda na iliuliu ni Lotu vei Jisu Karisito ena itukutuku eso ni duavata kei na loloma, inuinui kei na veivakabulai, kei na vakacegu ena inaki vakalou.

E vakavulica vei keda o Peresitedi Russell M. Nelson na sala meda rawata kina na veivakalougatataki ni da yaco meda tamata ni Kalou.

“Ni ko sa digitaka mo laiva me qaqa ena nomu bula na Kalou, ko na qai kila vakataki iko ni sa ‘Kalou ni cakamana’ na noda Kalou [Momani 9:11].”—Peresitedi Russell M. Nelson (raica na tabana e 92)

E vuqa era a vosa me baleta na tubu ni tamata yadua ena noda muri Jisu Karisito, nuitaki Koya, ka solia na lomada ki Vua.

“Ni da vuki ena yalomalumalumu vei [Jisu Karisito], ena vakalevutaka o Koya na noda rawa ni veisau.” —Becky Craven (raica na tabana e 58)

Vakadua tale, na coronavirus vou oqo a tara na veika eda raica ka rogoca ena koniferedi. Ia, ena ikuri ni veika sotavi oqo a yaco mai e dua na rai cecere ni ra vakanamata o ira era vosa sega walega ena inuinui ia ena noda kila talega vakalevu cake na ituvatuva ni Kalou me baleta na noda marau tawamudu.

“Na veitarogi se na vakatovolei ena koronivuli ni bula oqo era sa tiki bibi sara ni noda toso e na bula tawamudu. … Sa noqu masu ni da … sa vulica tiko na lesoni yaga duadua e rawa ga ni vakatavulici keda kina na veika dredre e sotavi.” —Elder David A. Bednar (raica na tabana e 8)

Ena yavavala ni veimaliwai ena vuqa na veiyasai vuravura, era sa vakacala na iliuliu na veivakaduiduitaki kei na ivalavala kaukauwa. Era sa kerei keda vaka Yalododonu Edaidai me da duabau ena ivalavala dodonu, vakaraica na duavata ena duidui, ka veivuke ena tarai cake ni dua na bula veimaliwai e savasava ka veilomani.

“Eda bula ena dua na gauna e kaukauwa kina na tatawasewase. … E rawa ni da kaukauwa me da laveta ka vakalougatataka na isoqosoqo taucoko.” —Elder Quentin L. Cook (raica na tabana e 18)

Ni o nanuma lesu tiko na koniferedi ena ilavelave oqo, keitou nuitaka ni ko na vakila tale na inuinui kei na veivakauqeti o a vakila ena imatai ni gauna, vakakina na nomu rawata na vakasama vovou ena nomu vulica tiko ena veivula mai oqo.